Тедеде «Торама» фольклорной ансамблясь тешксты 30 иень юбилеензэ. Сон пурназель-теезель 1990­-1991 иетнестэ музыкантонть ды этнографонть Владимир Ромашкинэнь мелензэ коряс. Ансамблянть теемстэ прявт бажамокс ульнесь невтемс эрзятнень ды мокшотнень моронь койтнень-кирдатнень, конатнень икелень гайгемаст ёмавтозель.

Ве шкасто эрзянь ды мокшонь ламо вайгелень моротнень марто ансамблясь невтсь кезэрень койтнень-кирдатнень. «Торамась» вечкевикс Мордовиясо (ансамблянтень максозь Мордо­вия Республикань Государствен­ной премия) ды Россиянть келес (1994 иестэ «Голоса России» раськень музыкань весероссиянь пелькстамонь сырнень медалень ды прявт премиянь саиця). Ансамблясь содавикс весе масторонть келес. Сон свалшкане эсь шкинеманть невти Эстониясо, Финляндиясо, Латвия-со, Швециясо, Польшасо ды Англиясо ютавтовиця концерттнэсэ. Коллективесь кемекстась кеме сюлмот Кастренэнь обществанть, Ян Сибелиусонь музы­кальной академиянть, Финнэнь-Угрань обществанть марто.

Ансамблянь участниктне витнизь-теизь зярыя ёмавтозь ды аламо кинень содавикс инструменттнэнь, теке марто гарзань скрипканть ды нудеенть. Инструмен­тальной композициятне творчествазост совавтозельть 2002 иестэ, ды се шкастонть саезь сынь кармасть репертуаронть касомасо-кепетемасо прявт ёнксокс.

2002 иень панжиковсто ансамблясь ульнесь этнофестивальсэ Вильнюссо. Теке иень аштемковонь 12-це чистэ «Торамась» вейсэ Мордовиянь делегациянть марто ульнесь Московсо Россиянь чинть тешкстамосо.

2002 иень умарьковонь 29-це чистэ кувать шкань перть сэредемадонть мейле эрямосто тусь ан­самблянь пурныцясь ды ветицясь Владимир Ромашкин. Группанть прявтокс аравтозель Андрей Нико­лаев, конась вети сонзэ неень шкастояк. Кочкуровань райононь Вирь Тавла велесэнть жо, косо Владимир Ромашкин рамакшнось кудо, панжсть «Этно-кудо имени В.И.Ромашкина» этнографиянь музей.

2012 иестэ Мордовия Республикань Правительстванть кармавтоманзо коряс теезель «Фольклорный ансамбль «Торама» государственной автоном­ной учреждениясь.

Течи «Торама» фольклорной ансамблясь - сюпавдояк сюпав история марто коллектив. Эсь творческой важодеманть сон вети уш колоньгемень иетнень перть.

Коллективенть важодемазо алтави кезэрень ды неень шкань фольклоронть невтемантень, кезэрень койтнень-кирдатнень, раськень творчестванть вельмевтемантень.

«Торамань» артисттнэ свал творческой вешнемасот, а лотксить саезенть лангс ды свалш­кане варчнить эсь вийтнень музыкань весе ёнкстнэсэ. Коллек­тивенть шкинемасо улить проектт, конатнесэ невтезь фолкось джазонть, фолкось роконть марто ды натой симфонической музыканть юткс фолконть совавтомазо.

«Торама» ансамблянть ды «Биг-бенд «Саранск» джазонь оркестранть вейсэнь важодеманть лувсо сёрмадозельть зярыя композицият, конатнесэ мазыйстэ сюлмавсть фольклорось, эрзянь- мокшонь ламо вайгельсэ морамось ды джазось. Тень коряс, фольклорось човорявсь джазонть марто ды макссь од гайгема.

«Торамань» лия проектсэнть вадрясто невтеви раськень музы­канть ды роконть сюлмавомась. Неень шкань барабантнэ ды бас-гитарась лездасть сюпалгавтомс ды мазылгавтомс фольклорной музыканть гайгеманзо.

Од гайгеманть вешнезь, чачсь од проектэсь, кона вейсэндинзе фолконть ды классической музыканть. Истя, «Тораманть» ды симфонической оркестранть вейсэнь важодеманть лувсо свалшкань фольклоронтень максовсь овсе од гайгема. «Раськень» ды «классической» инструменттнэнь човорямось пештинзе раськень моротнень сэтьмечиде, чевте ды мазый музыкадо.

«Торама» фольклорной ансамблянь коллективесь седе товгак поладсы музыкань ёнкстнэнь вейс човорямонть коряс роботанть, конатнень прявт тевесь - максомс од гайгема этни­ческой музыкантень, теке шкасто ванстомс сонзэ «седеенть» - эрзянь-мокшонь фольклоронть.
«Торама» фольклорной ансамблянть улить эсензэ коензэ-кирданзо гастролень важодеманть ветямосояк. Тесэ ансамблясь тейсь пек ламо. Коллективесь домкасто невти Мор­довия Республикань раськень творчестванть республикань, весероссиянь ды раськеютконь мероприятиятнесэ.
Течи «Торама» фольклор­ной ансамблясь - визитной кар­точка Мордовия Республикань раськень искусствань ёнкссонть. Самай сынь свалшкане вастыть сехте покш инжетнень. «Торамась» невтсь эсь творчестванзо Россиянь Президентэнть Влади­мир Путинэнь, Финляндиянь Президентэнть Саули Нийнистёнь, артыцянть Никас Сафроновонь, актёронть Жерар Депардьень, спортсменэнть Алексей Немовонь, актёронть ды режиссёронть Олег Табаковонь ды ламот лиятнень икеле.
Концерттнэде башка, ансамблясь сёрмады му­зыкань клипть, келейгавты эсь дискографиянть. Истя, 2018 иестэ «Торамась» нолдась «Catch up the time» од альбом.

Башка ёвтнема «Торама» ансамблянть 2018 иень Футболонь коряс масторлангонь чемпионатонтень анокстамосонть улемадонть. Саранскойсэ футболонь матчтнень ютавтомась лездась пек вадрясто панжомс ансамблянь музыканттнэнь ёрокчист. Футболонь ютавтома шканть перть культурань программатнень лувсо «Торамась» макссь малав комсь концертт.

Эряви тешкстамс, самай «Торамась» Саранскойсэ панжокшнызе Болельщикень фестиваленть. Теке марто ансамблясь ульнесь Московсо Якстере площадьсэ ютавтовиця концертсэнть, кона алтавсь Футболонь коряс масторлангонь чемпионатонь панжомантень. Ды сынь пек вадрясто невтизь ми­нек республикань лиятнень ёнов а молиця культуранть.

Ютазь иень умарьковсто «То­рамась» ульнесь Крымень Судак ошсо «Таврида» раськеютконь фестиваленть-форумонть панжомасо ды кармась экспертэкс «Таврида народная» площадкасонть. «Таврида - АРТ» форумось - масторонь шкинемань прявт фестиваль, конань участникекс 2019 иестэ кармасть 45 тёжадо ламо ломанть.

2019 иенть прядовомсто «То­рама» фолк-группась тердевсь Resolution#Resolution2020 проектс. Акциянь партнёрокс кармасть Universal Music музыкань холдингесь ды WWF Пертьпельксэнь фондось. Резолюциянь «седеекс» кармась «World on our Shoulders» морось, конань сёрмадызе Universal Music компаниясь. Эсь койсэ морамс те моронть тердезельть весе масторонь музыканттнэ, конатнень ютксо кармась «Торамаськак». Ламо шкань перть важодеманть лувсо теезель «World on our Shoulders» («Мир на наших плечах») мо­ронть лангс клипесь. Морось ютавтозель рузонь кельс, а вей­ке пельксэсь моразель эрзякс.
Течи ансамблясь полады свалшкань важодеманзо. Неть читнестэ учови од, юбилейной альбомонть невтемазо, конантень максовсь «Эрядо, морот!» лемесь. Сонзэ лангсо важодемась ветявсь иеде ламо. Пусмонтень совасть раськень моротне ды фолконь неень шкань аранжировкатне.

Истя жо, маласо шкастонть ан­самблясь невти кавто од клипть. Сынст теемантень музыканттнэнь кармавтынзе «Торамань» кавто содавикс моротне: «Гарай» ды «Матрянь Алданясь».

Фольклорось ловови культурань сехте покш сюпавчикс. Ванстови жо сон ёроков ломантнень ды морыцятнень вийсэ. Эрзянь ды мокшонь моротнень, культуранть ванстомасо покш путовксозо «Торама» фольклор­ной ансамблянь эрьва музыкантонть. Теке марто коллективесь свалшкане ламолгавтови од, ёроков ломаньсэ, конат касыть вадря музыкантокс чарькодиця прявттнэнь вановт ало. Весероссиянь ды раськеютконь проекттнэсэ улемась, од аравтлувтне аштить «Тораманть» туртов виев стимулокс седе тов касомасонть- виензамосонть.

Фольклорось - «Торама» госу­дарственной ансамблянь шкинемань седеесь. Секскак вана уш колоньгемень иень перть ансамблясь моли кемекстазь кияванть - моры эрзянь ды мокшонь кезэрень морот.

Анокстызе Юлия ЕРЕМИНА