Нина Васильевна ды Михаил Иванович Лётинтнэ весе эрямост перть эрить Орданьбуень Колазелесэ. Аволь умок сынь тешкстасть покш кенярксчи – вейсэнь эрямонь 45 иетнень!

Сынь чачтсть-кастсть колмо эйкакшт, ней улить вете нуцькаст. Вана кода ёвтни вейкесь эйстэст, Алина Сумкина:

«Бабам ды покштям ней пенсиясот. Ансяк тевтеме вейкеяк минута а аштить. Бабам полады важодеме почтальонкакс. Сынь кирдить скал, бука, тувот, саразт. Кизэнь перть важодить пиресэ-садсо, анокстыть теленень ярсамопельть. Сынь свал вейсэ! Эрямост перть мелявтыть эйкакшост ды нуцькаст кисэ.

Аволь умок минек весе покш семиясь пурнавкшнось вейс, тешкстынек бабань чачома чинзэ. Каштомлангсо аштезь, «Гвоздики алые» весень марто баян мельга покштянь вечкевикс моронзо моразь, мон прок понгинь эйкакшпингезэнь. Вана чиян велеванть, пейдян, мельган капши бабам. Кедте кундазь ютатано кудов, косо васты эйсэнек покштям, чевте седей ломанесь. Валске марто сыргозинь, судосон куцти прякань тантей чинесь, конатнень панинзе бабам. Те кудось – истямо сэтьме тарка, косо ютасть эйкакшпингень сехте паро читне. Тезэнь свалшкас кадовсь оймепелькскем. Кадык Пазось максы тенк кеме шумбрачи! Эрядо седе кувать!»