Воскресенье, февраля 23, 2020
Важное


Пондельникстэ Мордовиянь Прявтось Владимир Волков важодемань содавтома марто ульнесь Чаунзань ды Отяжбуень ёнкстнэсэ. Ваннынзе сеть объекттнэнь, конат стявтовить кочкицятнень кармавтомаст коряс.

Васняяк Мордовиянь Прявтось ульнесь Чаунзасо водозаборонть строямонь таркасонть. Тешкстызе, объектэнть эряви прядомс 2021 иень умарьковонтень. Панжомадонзо мейле эрицятненень карми пачтявомо ванькс, вадря ведь.
Владимир Волков ледстизе, 2020 иень якшамковсто саезь «Комплексное развитие сельских территорий» программанть лувсо максови велень льготань ипотека, весемезэ 3% иезэнзэ, башка эрицятненень – 0,1%. Тень кувалма Мордовиянь Прявтось кармавтсь районсонть анокстамс седе ламо таркат кудонь стявтомань туртов, ветямс весе коммуникациятнень, ацамс ки.

Комсомольской посёлкасо Владимир Волков якась «Красная Шапочка» эйдень кужонтень, кона панжозь те иень якшамковсто. Тесэ ваннынзе весе нупальтнень, кортась эйкакштнень ды тетятнень-аватнень марто.
– Школадо икеле образованиясь – эйкакштнень анокстамонь прявт пелькс. Васенце классос эйдетне сыть уш парсте анокстазь. Кото иетнень перть Мордовиясо строязь 60 эйдень кужот. Маласо шкастонть панжовить эштё вейксэ. Те важодемась поладови, – мерсь сон.
Владимир Волков кортась здравоохранениянть виевгавтомадонзо. Республикасонть поладови ФАП-нь строямось. Ансяк тедеде арсевить панжомс 73. Тешкстызе, витневить Комсомольскоень поликлиникась ды больницясь.

Мордовиянь Прявтось истя жо ульнесь «Чамзинская» птицефабрикань од площадкасонть, кона панжозь ютазь иенть прядовомсто. Тесэ 24 корпуст, эрьвасонть кастовить 58 тёжат бройлерт. Теезь 47 важодемань од таркат, средней зарплатась – 31 тёжа целковойть.
– Миненек эряви вадрялгавтомс минек ломантнень эрямост, иляст туе уцяскань вешнеме республикань томбалев. Тень туртов теевить паро зарплата марто важодемань таркат. Минь панжтано производстват аволь Саранскойсэ, а минек велетнесэ, – мерсь Владимир Волков.
Уш обедтэ мейле Мордовиянь Прявтось пачкодсь Отяжбуень ёнксов. Тетюши велесэ сон ванызе, кода анокставить модань участкатне кудотнень строямост туртов. Отяжбуень ёнксонь прявтось Виктор Прокин ёвтнесь, кода тесэ моли анокстамось велень льготань ипотекань программанть коряс. Тетюши веленть маласо стявтозь кавто од кудот. Весемезэ тесэ анокстазь 320 участкат.
Кода тешкстызе Владимир Волков, строямонть туртов кочказь вадря тарка – райцентрась маласо. Мелят ушодозь газонь ды ведень ветямось. Тедеде инженерэнь коммуникациятнень ветямонь коряс важодемась прядови. Теде башка, тесэ строявить ФАП, эйдень кужо, стадион ды бассейна.

Сон кортась Ютяевтнень ды Зоткинтнэнь семиятнень марто, конатне сайсть мель строямс тесэ кудот. Ютяевтне кастыть ниле эйкакшт, сыненст, кода АПК-со важодицятненень, максозь социальной выплата. Неть ярмактнень лангс сынь уш стявтсть кудо. Зоткинтнэ макссть документт банков льготань кредитэнь саемс.

– Васенце семиясь, кить строясть тесэ кудо, – ламо эйкакшонь кастыця, те пек паро, – тешкстызе Мордовиянь Прявтось. – Минь арсетяно, маласо колмо иетнень перть тесэ весе кудотне улить стявтозь. Тенень лездыть сеть тевтне, конатнень кемекстынзе Россиянь Президентэсь Владимир Путин эйкакш марто семиятненень лездамга.
Кода ёвтнесь МР-нь Правительствань Председателень васенце полавтыцясь – Велень хозяйствань ды продовольствиянь министрась Владимир Сидоров, велетнесэ кудотнень строямонь программантень совасть Ромодановань, Чаунзань ды Краснослободскоень районтнэ.
Владимир Волков тешкстызе, те программантень соваст республикань муниципальной весе образованиятне.

Республикань Прявтось истя жо якась «Атяшевский» МПК-в, косо топавтови инвестициянь од проект. Тесэ панжозь зярыя од объектт, конат лездыть предприятиянтень важодемс отходтомо производстванть лувсо, те лади экологиянь весе вешематненень. Инвестициянь те проектэнть топавтоманзо вельде теезь малав 300 важодемань таркат – те покш невтевкс райцентранть туртов. Пандови вадря зарплата. Кода ёвтнесть цехсэнть важодиця аватне, сыненст пандыть малав 50 тёжат целковойть.
Мордовиянь Прявтось Владимир Волков кортась предприятиясонть важодицятнень марто, кунсолынзе пшкадемаст ды кевкстемаст.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».