Пятница, августа 14, 2020
Важное

«Сабанчеевское» велень хозяйствань прявтонть Дмитрий Николаевич Игушкинэнь умок содаса. Аволь весть сёрмалинь те хозяйстванть изнявкстнэде, сюронь кастыцятнеде, скалонь потявтыцятнеде ды сетнеде, кить шождалгавтыть велесэ эрямонть. А хозяйствань прявттонть Д.Н.Игушкиндэ сёрмадоманть каднынь яла вандыс.

Ды кода-бути сеске сась мель сёрмадомс Д.Н.Игушкиндэ. Эсь арсемам ёвтыя Дмитрий Николаевичнень. Сон мизолдозевсь ды мерсь: «Фотографиям ламоксть лиснесть «Эрзянь правдасо». Бути уш ули меленк, сестэ садо Сабанцелев, тесэ весе толковасынек. Вансынк, кода эрятано».

Ды вана минь таго ардтано Отяжелень райононь Сабанцелев. Машинасонть лембе, гайги весела музыка. Морыцясь кемевти, зярдо ломанесь шумбра, сестэ эрямоськак маряви уцяскавокс. Вальмаванть неявить раужо паксятне. Курок лангсост увнозевить трактортнэ, ушодовить тундонь-паксянь тевтне.

Апак фатя пачкодинек Сабанцелев, «Сабанчеевское» велень хозяйствань предприятиянь правлениянть ваксс. Совинек Дмитрий Николаевичень важодема таркантень. Сон таркасонзоль. Дмитрий Николаевич мартонок кортамонзо ушодызе истя:

– Ялгат! Шкам ламо арась, ансяк зярыя минутат, паряк, час! Тенек алтась самс Отяжелень райононь администрациянь прявтось Виктор Григорьевич Прокин. Ванкшносы, кода анокстынек тундонь паксянь тевтненень.

Тешкстасынек, «Сабанчеевское» велень хозяйствань предприятиясо важодицятне тундонь паксясо тевтнень топавтомо анокстасть вадрясто. Сынь нейке анокт лисеме паксяв. Анокстасть сатышка видьмекст, удобрения, горюче-смазочной материал (ГСМ), прицепной инвентарь.

– Тундонь паксянь тевтненень анокстамо кундынек загодь, – ёвтни велень хозяйствань предприятиянь прявтось Д.Н.Игушкин. – Шкастонзо а лисиндерятано паксяв, сестэ иля учо изнявкст. Тень содасызь хозяйствасо весе важодицятне.

Д.Н.Игушкин келей лавтов, шумбра эрзянь цёра. Чачсь Отяжелень райононь Ульяновка велесэ 1956 иень сентябрянь 3-це чистэ колхозникень, Николай Филиппович ды Екатерина Яковлевна Игушкинтнэнь семиясо. Тонавтнесь Поляна велень начальной школасо, мейле тонавтнеманзо поладызе Дубенкань райононь Антоновка велень кавксо иень школасо. Парсте прядызе Поваделень средней школанть. Средней образованиядо аттестатсонть ульнесть ансяк «нилеть» ды «вететь».

Дмитрий Игушкин эйкакшпорасто кармась содамо кши сускомонть питнензэ. Тетязо, Николай Филиппович, важодсь «Поляна» колхозсо, косо кирдевсть колоньгеменде ламо лишметь. Сон сынст вансь. Пингензэ перть важодсь лишмень ваныцякс. Дмитрий тетянзо вакссто эзь тукшнояк. Пек вечксь лишметнень, якась мельгаст, ды, нама, ардтнесь ласте…

Авазо, Екатерина Яковлевна, пенсияс туемазонзо важодсь колхозсо. Сестэ весе тевтне топавтовсть кедь вийсэ. Екатерина Яковлевна нейгак ледстни сеть стака иетнень, зярдо мольсь сюпав урожаень кис бороцямось. Сестэ Полянасо кирдевсть 4 тёжат реветь. Сынст эрявсь андомс.

Дмитрий Игушкин, зярдо прядызе Поваделень средней школанть, икелензэ эзь ара кевкстемась: кодамо тев кочкамс, косо поладомс тонавтнеманть. 1973 иестэ документэнзэ максынзе Кемлянь велень хозяйствань техникумонь-совхозонь «Агрохимия» отделенияв. Тонавтнеме кенерсь ансяк вейке ие. 1974 иень ноябрясто Дмитрий Игушкинэнь саизь советской армияв.Служась стратегической назначениянь ракетной войскатнесэ. Аволь весть ульнесь боевой ды политической анокстамонь отличникекс. Служамонь кавто иетне эзть марявояк, кода ютасть. 1976 иень ноябрясто сон велявтсь тиринь ёнксов ды поладызе техникумсо тонавтнеманть.

Тесэ, Кемлянь совхозсонть-техникумсонть, Дмитрий Игушкин вастызе вечкевиксэнзэ, эрзянь тейтеренть Любовь Васильевнань. Сон истя жо Отяжелень райононь Аловелестэ, тонавтнесь зоотехникекс-селекционерэкс.

1978 иестэ совхозонть-техникумонть прядомадо мейле сынь кавонест састь важодеме Отяжелень райононь «Путь Ильича» колхозов. Сестэ колхозонь прявтонь тевтнень топавтсь Н.М.Баринов.

– Николай Михайлович вастымим лембестэ, – ледстни Д.Н.Игушкин. – Сон аравтымим 1-це тракторно-полеводческой бригадань прявтокс. Тевтне ламольть. Седеяк пек сюронь ды ламбамо якстерькаень урядамонь шкасто. Д.Н.Игушкин оймамо эзь сода. Чинек-венек паксясоль. Бригадазо парсте топавтсь весе максозь тевтнень. Виевстэ важодемась стяко эзь юта. Се шкасто бригадась эрьва гектарсто сайсь 30 центнерт сюро. Удалакшнось ламбамо якстерькаеськак ды кормовой культуратнеяк. Сюронь саемань коряс «Путь Ильича» колхозонть ланга паро славась мольсь аволь ансяк районсо, сонзэ томбалеяк. Ютко шкасто ардыль тиринь велев. Мелявтсь тиринь кудонть кис, удалганзо таргавсь латко, иеде иес пирень модась лондадыль, секень вант, латкось малавгады кудонтень. Тень кувалма 1982 иестэ тетянзо-аванзо ютасть эрямо Сабанцелев.

Д.Н.Игушкин бригадирэнь тевенть топавтсь 1986 иес. Эрямось таркасонзо а ашти, велень хозяйствасо тевс нолдавить сюронь, ламбамо якстерькаень кастомасо од технологият. Эрявить содамочить. Ды Дмитрий Николаевич заочна тонавтнесь Н.П.Огарев лемсэ МГУ-нь велень хозяйствань факультетсэ агрономокс.

Отяжелень КПСС-нь райкомонь сестэнь васенце секретаресь А.Т.Куняев редизе – од цёрась ёроков, кель-вал мукшны велень трудий ломантнень марто ды, кувать апак арсе, саизе важодеме райкомов, аравтызе организационной отделс инструкторокс. Тесэ Дмитрий Николаевич важодсь аволь кувать, ансяк вейке ие.

1987 иень апрелень 6-це чистэ Отяжелень райононь Андрелень Культурань кудосо ютавтозель покш промкс, кона алтазель «Андреевский» колхозонь прявтонь кочкамонтень. Эйзэнзэ састь веленек. КПСС-нь райкомось ёвтызе колхозонь прявтокс Дмитрий Николаевич Игушкинэнь кандидатуранть. Те меленть шнызь весе пурнавозтне. Эдь сон эсь тевень алкуксонь специалист.

Зярыя шкань ютазь «Андреевский» колхозонть таркас теевсь «Андреевский» СХПК-сь. Сонзэ ульнесть 2 тёжадо ламо гектарт соксевиця моданзо. Андовсть-трявсть тёжадо ламо скалт. Эйстэст 350 – потявтовицят. Тувонь фермасо кирдсть кавтосядто ламо тувот. Колхозонь од прявтось ламо ловсонь потявтомга, ламо сывелень саемга, ды, нама, колхозонть виевгавтомга од специалисттнэнь марто сеедьстэ ютавтнесь промкст, косо ванкшновсть-тонавтневсть велень хозяйствасо од технологиятне. Велень специалисттнэ: агрономтне, зоотехниктне, ветеринарной врачтне, эсь ёрокчист кастомо кучневсть тонавтнеме Саранскоев.

Андрелесэ Д.Н.Игушкин важодсь 1996 иес. Колхозонь од прявтось маштсь виевгавтомс велень хозяйствань предприятиянть. 1988 иень невтематнень коряс «Андреевский» колхозось животноводствань коряс казезель РСФСР-нь Министрань Советэнь Якстере Знамясо, 1989 иестэ хозяйствантень максозель КПСС-нь райкомонь переходящей Якстере знамясь.

– 1996 иестэ Дмитрий Николаевич Игушкин ютась важодеме Отяжелень райононь администрацияв – администрациянь прявтонь полавтыцякс, велень хозяйствань управлениянь прявтокс, – ёвтни «Путь Ильича» колхозонь икелень прявтось, велень хозяйствань ветеранось В.П.Бухаркин. – Тесэ сон невтизе прянзо кода пек паро прявт. Сестэ районсонть ульнесть 27 колхозт ды 2 совхозт. Сон покш мель явсь ламо ловсонь, сюронь, сывелень саемантень, велень хозяйствань специалисттнэнь анокстамонтень.

Алкукскак, Д.Н.Игушкин мелявтсь, штобу райононь хозяйстватнесэ улевельть сатышка видьмекст, удобрения, касовкстнэнь ванстомань средстват. Тень кувалма кеме сюлмот тейсь МР-нь «Велень кемекстамо» ГУП-нть марто. Кеме оякс теевсь Самарань областень «Куйбышевазот» заводонть марто.

– Дмитрий Николаевичень покш таликазоль райононь велень хозяйствань весе предприятиятнень паксятнень видеме ды урядамо шкастонзо ливтемасо, – тешкстась Отяжелень райононь администрациянь икелень прявтось, Лямбирень райононь «Атемарская» нармунень фабрикань прявтось М.А.Сурков. – Сон покш мель явсь машинно-тракторной парконть, коромонь базанть кемекстамонтень. Д.Н.Игушкинэнь те тевсэнть важодемань шкастонть Отяжелень районось эсь зонасо аволь весть лиснесь соцсоревнованиясо изницякс.

2005 иестэ Д.Н.Игушкин велявтсь Сабанцелев. Тесэ кармась «Сабанчеевское» СХПК-нь прявтокс, зярыя иень ютазь хозяйствась теевсь «Сабанчеевское» ООО-кс. Важодемань васенце шкастонть Дмитрий Николаевич кемекстызе трудонь дисциплинанть, покш мель явсь материально-технической базанть кемекстамонтень. «Велень кемекстамонь» фондонть вельде рамазельть «Дон-1500» зярыя комбайнат, «МТЗ-1221» тракторт, сеялкат, «КамАЗ» машина, ламбамо якстерькаень урядамонь комбайна, тикшень ледемка ды велень хозяйствань лия инвентарь. Нурькинестэ меремс, сень, мезе эрявсь хозяйствантень пильге лангс стямга.

Ютась ие, омбоце… «Сабанчеевское» велень хозяйствань предприятиясь таштась изнявкст. Эрьва скалсто потявтыть ламо ловсо, эрьва гектарсто саить ламо сюро. 2009 иестэ «Сабанчеевское» велень хозяйствань предприятиясь совась Мордовской агропромышленной вейсэндявксос (МАПО).

– Минек хозяйствас совить Сабанцеле, Таразбуе, Дюрькина, Аловеле, Алашеевка велетне, – ёвтни Д.Н.Игушкин. – Тесэ ней строявить скалонь фермат, социальной объектт. Сабанцелесэ мелят парсте витнемадо мейле панжинек Культурань кудонть, Аловелесэ – ракшань комплексэнть, косо кирдевить тёжадо ламо скалт.

Д.Н.Игушкинэнь мельспарозо – Аловелесэ скалонь фермась, конань мелят строизь эсь ярмак лангс. Тесэ весе тевтне топавтовить аволь кедь вийсэ – автоматсо. Весень эйстэ пек явови скалонь потявтыцясь Татьяна Балыкова. Те тевенть сон топавты 1985 иестэ саезь. Мелят велень хозяйствасо парсте ды кувать важодемань кисэ Татьяна Николаевнанень максозь «Лауреат премии Главы Республики» почетонь лемесь.

Д.Н.Игушкинэньгак ламо государственной казнензэ. Сон – республикань Славань II ды III степентнень орденэнь кавалер, МР-нь Прявтонь премиянь лауреат, Россиянь АПК-нь Почетонь роботник, МР-нь велень хозяйствань заслуженной роботник, Отяжелень райононь Почетной гражданин. Велень хозяйствань прявтонть коллективсэнть вечксызь, ловить паро азорокс

Петр Зиновьев

Отяжелень район

 

 

 

 

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».