Ютазь оймсема читнестэ «Шумбрат, Мордовия!» фестивалень концерттнэнь поладокшнызь Зубова-Полянань, Лямбирень, Покш Игнатовань ды Ковылкинань районтнэ.
Недлячистэ «Шумбрат, Мордовия!» фестиваленть-пелькстамонть эрзятнень пельде поладызе Покш Игнатовань районось. Инжетнень ды ваныцятнень вастсть гармониянь седямосо, весёла моросо ды киштемасо. Омбоце этажсоль кедьчелькев ломантнень выставкась, конасонть невтезельть умонь фотографият, «Восход» райгазетасто саевкст «Шумбратонь» историядо, содавикс писателенть Александр Доронинэнь книганзо, Наталья Ермушевань кескавонь коцтсто ды джутсто теезь мазыйдеяк мазый цецянь паннотне, кодазь чевте налкшкеть, эрьва кодамо техникасо теезь картинат, уськень, калень тарадонь кептереть, ленгень кодавкст...
Концертэнть ушодовомадо икеле сцена лангс тердезель Покш Игнатовань райононь прявтось Татьяна Николаевна Полозова. Сон кортась районсонть молиця тевтнеде ды патриотизмадо. Ды те сонзэ ульнесь сцена лангс аволь вейке лисемазо. Сон лиснесь режиссёронть Анатолий Занкин марто Наталья Темасовань «Русский вальс» моронть мельга киштеме, мейле ёвтнесь валморо ды кадовсь сцена лангс весе участниктнень марто «Россия моя» меельце моронть морамо.
Концертэсь ушодозель «С чего начинается Родина?» моросонть, конань морызе Ольга Полякина. Мейле ульнесь эрзянь моронь пельксэсь. Пек вадрясто моразельть «Вирьга моли Машура» (Андрелень «Истоки» фольклорной ансамблясь), «Мейс тон, Дуня...?» («Пизелнэ» Покш Игнатова велень ветеранонь народной ансамблясь), «Ваня леляй, ков молят?» («Вастома» Ташто Селищань фольклорной ансамблясь) моротне. Пек мазыйстэ невтезель эрзянь свадьбань ютавтома коень пельксэсь – кудань вастомась, конань невтизе Андрелень «Лейне» народной театрась.
Покш Игнатовань «Толнэ» вокальной ансамблясь морась «Попурри мордовских песен». Седе тов моразельть рузонь морот, конатнесэ морыцятне ёвтызь эсь вечкемаст минек покштояк покш масторонтень: «Россия» (Киржеманонь «Нежность» вокальной ансамблясь), «Минуты тишины» (Калыша посёлкасто) ды «Салют» (Покш Игнатовань «Светлица» вокальной квартетэсь) моротне.
Седе тов ваныцятнень кецявтызь вишка артисттнэ. «Никанориха телегу продала» рузонь раськень моронть аволь ансяк морызе, истя жо невтизе «Кнопочки» эйкакшонь фольклорной ансамблясь. Мария Понеева морызе «Мир, который нужен мне» моронть. «Аллилуйя» моросонть весень седеест токизь ашо платиясо оршазь «Карамель» ансамблянь тейтерькатне. «Лунтики» киштемань курось цитниця сэнь палинесэ невтизе «Вкусняшки» моронть коряс киштеманть.
Весемезэ путозельть 23 номерт, конатнень анокстызь райононь велетнень культурань кудонь важодицятне. Сюкпря, Покш Игнатовань буе, паро ёжонть ды певтеме мазычинть кис! Тынк лембе ёжонк ды тиринь масторонтень вечкеманк пачкодсь эрьва сыцянть седейс. А стяко РДК-нь залось ульнесь тыц пешксе ломанде. Кадык свал истя карми тынк концертсэ!
Марина Агафонова
Фототне Э. Ретунскиень