Среда, августа 12, 2020
Важное

Дмитрий Васильевич Цыганкинэнь, филологиянь наукань докторонть, эрзянь-мокшонь кельтнень кафедрань профессоронть лемезэ содавикс аволь ансяк сонзэ тонавтницятненень ды мартонзо важодицятненень. Сон ветиця финно-угроведтнэстэ вейкесь, эрзянь ды мокшонь кельтнень коряс вадря специалист.

 

Войнань китне-янтнэ

Дмитрий Васильевич кандови се поколениянтень, кона идесь эсь тиринь масторонть фашистэнь ятонть эйстэ. 1943 иень эйзюрковсто сон эсь олясо туи фронтов. Теке иень сундерьковсто понги Западной фронтов, мейле – 1944 иень даволковсто – 3-це Белорусской фронтов, косо звукометрической батареянь 9-це запасной разведывательной полконть юрсо пачкоди Кёнигсбергенть видьс.

1946 иестэ саезь 1948 иес Д.В.Цыганкин эсь службанть канды Белорусской военной округонь (Поставы ошось) войсковой частьсэнть, мейле 1950 иенть самс – Галле ошсо (Германия).

Д.В.Цыганкин казезь Отечественной войнань II степенень орденсэ, «За отвагу», «За взятие Кёнигсберга», «За победу над Германией в Великой Отечественной войне 1941-1945 гг.» медальтнесэ.

1950 иень аштемковсто Дмитрий Васильевич Цыганкин демобилизовави Советской Армиястонть ды ушоды тонавтнеме Мордовиянь А.И.Полежаев лемсэ педагогической институтонь историко-филологической факультетсэнть (ней Мордовской государственной университетэсь).

 

Учёноень тевесь

1954 иень ожоковсто Д.В.Цыганкин кучови аспирантурав СССР-нь Наукань академиянь Келень тонавтнемань институтонть юрсо (финно-угрань кельтнень секторось). Филологиянь наукань докторонть, профессоронть К.Е.Майтинскаянь вановт ало сёрмады «Шугуровский диалект Большеберезниковского района Мордовской АССР»  кандидатской диссертациянть, конань вадрясто идесы 1958 иестэ. Аспирантуранть прядомадо мейле, 1957 иестэ, Д.В.Цыганкин кучови Мордовиянь А.И.Полежаев лемсэ пединститутов эрзянь-мокшонь кельтнень кафедрань ассистентэкс. 1962 иенть самс Дмитрий Васильевич роботы Н.П.Огарёв лемсэ МГУ-со старшей преподавателень таркасонть, мейле – эрзянь-мокшонь кельтнень кафедрань доцентэнь.

Дмитрий Васильевич явови домка превсэ, эрьва тевенть чарькодемасо ды прявтонть явомо маштомасо.

1962 иень умарьковсто Д.В.Цыганкин аравтови М.Е.Евсевьев лемсэ МГПИ-нь тонавтомань ды научной роботань коряс проректоронь таркантень. Теке шкастонть Дмитрий Васильевич топавты эрзянь-мокшонь кельтнень кафедрань прявтонь тевтнень. Неть иетнестэ вешкасто од институтонть пурнамонзо, сонзэ материальной базанть ды тонавтома лувонть ладямонзо, ёроков кадратнень пурнамонть марто Д.В.Цыганкин ушоды важодеме аспиранттнэнь марто ды полады научной тевенть.

1972 иестэнть саезь 1991 иес Дмитрий Васильевич роботы Мордовиянь Н.П.Огарёв лемсэ госуниверситетэнь эрзянь-мокшонь кельтнень кафедрань прявтокс. 1974-1975 иетнестэ важоди «Морфология имён существительных (словоизменение и словообразование) в эрзянских диалектах» докторской диссертациянть лангсо. 1978 иестэ филологиянь наукань докторонть, Тартуской государственной университетэнь профессоронть Пауль Алврень (Эстонской ССР) вановт ало вадрясто сонзэ идизе. 1979 иестэ Цыганкиннэнь максозь филологиянь наукань докторонь учёной степенесь, а 1979 иень ацамковонь 7-це чистэ ВАК-нть мереманзо коряс сонензэ кемекстазь профессоронь учёной лемесь.

1980 иестэ Дмитрий Васильевич Цыганкин ладяви Н.П.Огарёв лемсэ МГУ-нь филологической факультетэнь деканокс. Те таркасонть сон роботы 1987 иес.

1985 иестэ Мордовской АССР-нь Верховной Советэнь Президиумонть Указонзо коряс научно-педагогической тевсэнть изнявкстнэнь кис Д.В.Цыганкиннэнь максови «Заслуженный деятель науки Мордовской АССР» почётной лемесь, а 1997 иень медьковонь 19-це чистэ РФ-нь Президентэнть Указонзо коряс кемекстави «Заслуженный деятель науки Российской Федерации» почётной лемесь. Дмитрий Васильевич – Мордовия Республикань Государственной премиянь лауреат (2000 ие), Мордовия Республикань Прявтонь премиянь лауреат (2005 ие), Н.П.Огарёв лемсэ премиянь лауреат (1980 ие).

Д.В.Цыганкинэнь покш путовксозо кода финно-угрань, истя эрзянь ды мокшонь кельтнень тонавтомасо. Научной важодемань весе шканть перть сон сёрмадсь ды нолдась 300 ламо научной, научно-методической роботат, конатнестэ ламотне кармасть теоретической ды методологической юрокс эрзянь-мокшонь кельтнень научной тонавтомасо, ды сынст вельде течияк ветяви важодемась кода Мордовиянь школатнесэ ды вузтнэсэ, истя сонзэ томбалеяк.

Наукас путовксось

Учёноесь ламо роботась эрзянь-мокшонь кельтнень финно-угрань лия раськетень кельтнень ютксо прявт ёнкстнэнь ванноманть лангсо. Сонзэ нолдавт исследованиятнень ванномантень совить финно-угрань языкознаниянь кевкстематне («Тенденции развития литературных языков восточных финно-угорских народов», «О типах этимологических словообразовательных связей в финно-угорских языках», «О соотношении исконных и иноязычных элементов в системе эрзянского словообразования», «Русско-мордовские языковые контакты на лексическом уровне» ды лият). Неть ды Д.В.Цыганкинэнь лия роботатнеяк тешкставсть раськеютконь финно-угрань ёнкссонть.

Аволь аламо Д.В.Цыганкин тейсь эрзянь-мокшонь кельтнень этимологической ды ономастической аспекттнэнь тонавтомасо. Те парсте невтеви «Память земли», «Топонимическая система мордовских языков», «Мордовская микротопонимия», «Этимологиянь валкске», «Память, запечатлённая в слове. Словарь географических названий Республики Мордовия», «От Суры… до Мокши: названия рек и озёр Республики Мордовия» ды ламо лия роботатнесэ.

Ареальной диалектологиянь мелявкстнэнь ванномга, сон васенцеде эрзянь-мокшонь языкознаниясо макссь явома эрзянь диалекттнэнень фонетико-морфологической ёнкстнэнь вельде, эрьва диалектэнть башка теориянтень кемекстазь. Д.В.Цыганкинэнь лементь марто сюлмавозь морфонологиянть эрзянь-мокшонь языкознаниясо кода башка разделэнть чачомазо.

Д.В.Цыганкин, кода содавикс учёной-финно-угровед, кочказь Финляндиянь Финно-угорской обществань член-корреспондентэкс, ашти раськеютконь ды эсенек финно-угрань конгресстнэнь, симпозиумтнень ды научной конференциятнень участникекс ды истя жо ловови «Linguistica Uralika» (Таллин), «Onomastika Uralika» (Дебрецен – Хельсинки), «Сятко» (Саранск) журналтнэнь ды «Мордовия» энциклопедиянь редакционной коллегиянь членэкс.

Ламот иетнень перть учёноесь ашти Мордовской университетэнь кандидатской диссертациятнень идемань коряс специализированной советэнь членэкс. Ламо иеть ульнесь Мордовия Республикань Правительстванть юрсо НИИГН-нь учёной советэнь членэкс ды Удмуртиянь университетэнь кандидатской диссертациятнень идемань коряс специализированной советэнь членэкс.

 

Ветеранось течи

Неень шкане Дмитрий Васильевич вети «Языки народов России: эрзянский язык» ёнксонть коряс магистранттнэнь научно-исследовательской роботанть, покш мель яви кафедранть научно-исследовательской тевентень, нолды научной статьят сеть изданиятнесэ, конат совить Scopus ды WoS раськеютконь реферативной базатнень юрс, РФ-нь ВАК-нь ды РИНЦ-нь научной изданиятнесэ. Ашти «Ареальные исследования мордовских диалектов Заволжья и Южного Урала» РФФИ-нь грантонь топавтыцякс.

Сонзэ пек покш мелезэ важодемантень. Сон университетэнь профессор, од специалисттнэнь научной руководитель, научной конгресстнэнь, конференциятнень ды эрьва кодамо промкстнэнь участник, эсь темань коряс диссертациятнень оппонент, чарькодиця ды а сизиця лингвист-исследователь.

Дмитрий Васильевич – превей, виде мель, кемевикс ды эсь кой марто ломань. Сонзэ, кода учёноенть ды ломаненть марто кортамось лезэв ды седейс токиця.

И.Н.Рябов, Н.П.Огарёв лемсэ МГУ-нь филологической факультетэнь эрзянь-мокшонь кельтнень кафедрань прявт.

Маень 25-це чистэ тешкстави Филологонь чись. «Эрзянь правда» газетань коллективесь ёвты поздоровт Д.В.Цыганкиннэнь те кенярксчинть кувалма.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».