Вторник, марта 19, 2024
Важное

 Чарькодеви, од, асодавикс тевентень кундамось канды ушодыцянзо туртов мельспарояк, талномаяк. Икелепелев а содави, топавтови-арась сон истя, кода эряви. Теке марто туезэ лиятнень мельс, улезэ эрявикс ды лезэв. Кортамось туи вана мезе ланга.

Меельце шкастонть мон, Михаил Михайлович Потапов, низэ Мария Арсентьевна ды Павлина Михайловна Пакшина, англань келень тонавтыцянть марто анокстынек эрзянь эйкакштнень туртов од проект, тевтеема: ютавтынек англань кельстэ эрзякс «Dora the Explorer» – «Даша-путешественница», эрзякс – «Якиця-пакиця Даря», эйкакштнень туртов американь содавикс ёвтнеманть. Эйкакштне содасызь сонзэ мультфильманть коряс, кона ветешка иеде икеле невтевкшнесь «Карусель» каналсонть.

Секскак, зярдо невтия уроксо те ёвтнеманть, эйкакштне мизолдозевсть ды паро мель марто ловность эйсэнзэ эрзякс. Мазый артовкстнэ жо лездыть рузонь эйкакштненень чарькодемс, мезе ланга моли кортамось, ды шождасто ютавтомс сонзэ.

Икелепелев, койсэнек, седеяк паро улевель сравтнемс те кулянть эрзянь велетнева, эрзянь келень ды литературань тонавтыцятнень ланга ды невтемс тосонь школатнесэ. Те пек парсте невтевлизе – минек келесь эрий, мазый ды лия кельтнеде а седе берянь.

Проектэсь лиссь аволь вишкине – эйсэнзэ мельстуиця артовкс марто кемгавтово ёвтнемат, конатне уш ульнесть англань вариантсонть. Васняяк эрявкшнось теемс англань кельстэ рузонь кельс валдо валс ютавтома, мейсэ лездасть Михаилэнь низэ Мария Арсентьевна ды Павлина Михайловна.

Павлина – Орданьбуень райононь Жарёнки велень эрзянь тейтересь. Жарёнки велесь рузонь, ансяк Павлина тонавтнеме якась Чукало эрзянь велень школав, косо тонадсь кортнеме эрзякс. Ды тетянзо-аванзояк эрзят. Ней сон англань ды французонь кельтнень тонавтыця. Меельце шкастонть тонавтни финнэнь келентькак.

Мейле Михаил марто вейсэ ютавтынек ёвтнематнень эрзякс, бажинек теемс ютавтовксонть англань келентень седе малавиксэкс, теке марто редявольть эрзянь келенть мазычизэ ды башка ёнксонзо.

Истя, те проектэнть лангсо важодинек ниленек. Сонзэ топавтомга ютасть кавто ковт. Ней сон целанек путозь Интернетс, ды бути кинь ули мелезэ невтемс сонзэ эйкакшонзо туртов, инескеть, минь ансяк кенярдтано. Теке марто ёвтнематне молить мазый артовкс марто, сынь шождасто таргавить ды путовить конёв лангскак.

Ней, седе домкасто эряви ёвтнемс, кие истямось Михаил Потапов, эдь сонтемензэ мезеяк истямо бу аволь лисе. Сонзэ марто теевинь содавиксэкс Интернетэнть вельде, зярдо сон пшкадсь монень путнемс эрзянь кельсэ ёвтамот https://vk.com/rav_adol келень куронтень.

Те ёроков эрзянь цёрась чачсь Самара ёнксонь Борское велесэ, тетянзо-аванзо секе жо буень Коноваловка велень эрзят. Вишкинестэ Михаилэнь тетятне-аватне бажасть тонавтомс цёрыненть рузкс кортамо ды а покш мель явсть сенень, кода цёрынесь правты эрзянь келень тонавтнемантень. Тень лангс апак вано, цёрынесь кармась тонавтнеме эрзянь келенть сонсь, ды ней, эряви меремс, ськамонзо ламо мезе теи эрзянь келень ванстомантень ды касомантень Интернетэнь паксятнесэ. Натой Самарасо ютавтнесь эрзянь келень коряс курсат.

Теде башка, Михаил ледстни, келя, эрзянь васенце книганть тензэ казизе Шентала велень чуваж ялгазо университетэнь колмоце курссо тонавтнемстэ. Те ульнесть Нуянь Видязонь «Сырнень човалят» валксозо ды Маризь Кемалень «Ёвксонь кужо» пусмозо.

Ней сон эри Самара ошсо, Рав леенть чиресэ. Вальманзо, келя, ваныть те ине леенть лангс. Мейле чачсь тензэ мель панжомс Вконтакте сайтсэнть RAVO куронть. Раво – те кезэрень леень лемтнестэ вейкесь, корты Михаил. Те куросонть муевить малав весе проекттнэ ды эрзянь келень тонавтома кедьёнкстнэ, конат улить Интернетсэ. Истя жо RAVO куросонть Михаил путни Маризь Кемалень «Ёвксонь кужо» пусмостонть ёвкстнэнь рузонь ютавтовкс ды гайгема марто. Тень кисэ сайни тевс Twine панжадо Интернет-платформанть, кона теезь истямо интерактивной литературанть путнеманзо кисэ.  Кой-кона ёвкстнэнь Михаил ловнынзе сонсь, лиятнень – эсест Самара ошонь эрзянь келень вейсэндявксонь тейтерь. Гайтенть ды артовкстнэнь марто сонензэ лездыть истя жо Самарань ялганзо. Вана а умок OYME куронь морсицясь Лариса Зыбкина истя жо лездась ловномс ёвкс эрзякс, кона муеви секе RAVO куросонть. Лемезэ: «Ривезть-псакат». Каткань артовксонть теизе Самарань студенткась Татьяна Чекина.

Видьстэ меремс, Михаил весе неть тонавтома кедьёнкстнэнь седе ламо пурны Арина тейтерькинензэ кис, кона зярс пек вишкине. Сонензэ ансяк вейке ды пель ие. Паряк, зярдо касы, сонензэяк чачи мель тонавтнемс тетянзо тиринь келенть. Вана те шкастонть саськак Михаилнэнь мель теемс эрзякс мирэнь келес содавик ёвкскеть тейтерькинензэ туртов.

Эсензэ вишкапингстэ саезь цёрынесь марясь эрзянь келенть леень чудильманзо кондямо гайгеманзо ды седеезэнзэ сыремсь певтеме вечкема те оймень петиця келентень. Сельме икельганзо ютась вишкапингезэ эрзянь велень эрицятнень ютксо, конат абунгавтсть цёрыненть аволь ансяк эсь мазый кельсэст, тевсэсткак. Чарькодеви, тейтерьканзо икеле истямось мезеяк а ули. Секскак эйкакшонть туртов эрявить мазый, мельстуиця тонавтнемапельть, конат сыремтевельть бажамо келень тонавтнемантень. Улезэ те мазый ды эрьва кодамо тюсонь артовкс марто невтема, кона кецявтоволь седейгак, сельмеяк…

Кода уш ёвтазель, Михаил пек парсте чарькоди компьютерэнь эрьва кодамо программас ды эсь содамочинзэ нолдтни тевс эрзянь келенть лезэс, невтемга, карточка вельде сравтни грамматикань коряс лувтнень панжоманть квизлет сайтсэнть. Икелепелев ули мелезэ ютавтомс эрзянь кельс мультфильматкак.

Истя жо тешкстасынек, Михаил сонсь тонавтнизе англань келенть, школасо жо тонавтнесь немеценсенть. Видьстэ меремс, лингвистикась кармась тензэ вечкевикс тевекс. Вана истя Мордовиянь томбальдень ломанесь мелявты эрзянь келенть кис ды весе ёрокчинзэ, содамочинзэ ды юткошканзо нолды тевс келенек сравтнемга Интернетсэ.

Ютавтозь ёвтнематне муевить Вконтакте, «Фейсбук» ды «Одноклассники» социальной сетьнесэ.

Кода уш ёвтазель, ютавтынек кемгавтово ёвтнемат. Сынь нурькинеть, аволь покшкеть ды сюжетэнть коряс апак сюлма вейкест-вейкест марто. Эрьва ёвтнемась – те башка ёвтамо, башка сюжет. Моли ёнов ансяк лувось: эрьва ёвтнемась ушодови кодамояк тевстэ, меньгак событиясто. Апокшке ушодксонть мельга юты тев-валонь (событие) келейгадома, мельганзо конфликт, сюжетэнь тёкш, ды пе, кона свал прядови изнямосо эли парсте тевень прядомасо ды, нама, певтеме кецямосо. Лиякс меремс, эйсэст седе ламось явови эмоциональной ёнксонтень: эйкакшось ловномсто васняяк шумбракстни геройтнень марто, конат тердить мартост кодамояк тевс эли покш чис, кецни тенень, мелявты, зярдо вастови меньгак апаро, ризны, арси, кода лисемс те апаростонть, ды таго кецни, кода весемесь парсте прядови. Истямо лувсо аравтозь эрьва ёвтнемась.

Ёвтнематнень лемест: «Паро чись пильгеоскань туртов», «Киштть Даря марто», «Супер шпионт», «Пезназь фургон», «Мон вечкан парад», «Налксема пирев якамо», «Циркесь ошсо», «Ковонть лангс ливтямо», «Вирень пачк» ды лият. Макссынек ёвтнематнестэ вейкенть.

Марина Агафонова,

3 № МОУ-нь СОШ-нь эрзянь келень тонавтыця.

Нармуньлевкскень идемась

Шумбрат, мон – Даря. Котыне ды мон мольтяно вирень ванномо.

Мон марян лавшо цикнема. Кода тынь арсетядо, те мезе? Минь муинек нармуньлевкс. Паряк, сонензэ эряви лезксэнек.

Мезе миненек эряви теемс васняяк?

Тон томбавить, Ципака? Нармуньлевксэсь корты, арась.

Сон вешни эсензэ аванзо. Нармуньлевксэсь, нать, кадовсь.

Нармуньлевкскенть ули мелезэ велявтомс кудов аванстэнь.

Косо сонзэ авазо? Минь снартсынек вешнемс сонзэ.

Нармуньлевкскесь цикни. Сон симевель.

Кандтано тензэ ведь чудикерьксстэнть!

Косто минь ней мусынек нармуньлевксэнть аванзо?

Сон ведьсэ?

Сон цецятнень ало? Эли сон вишкине сэнь чувтонть прясо?

Истя! Сон вишкине сэнь чувтонть прясо. Минь тень теинек! Вана нармуньлевксэнть пизэсь.

Тесэ сонзэ авазо, лелязо, сазорозо. Сынь истя кенярдыть неемс сонзэ!

Паро тевесь! Нармуньлевксэсь велявтсь кудов.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».