Понедельник, октября 18, 2021
Важное

«Эйдень кужось, кода лисьмапрясь, косто ушодови эрьва леенть чудемазо. Кодамо карми ведезэ, истямокс карми лееськак», – вечки кортамо Раиса Сергеевна Зорькина. Эрзянь те аванть весе эрямозо, ловт, сюлмавозь эйдень кужонть марто. Колоньгеменде ламо иеть макссь Саран ошонь 86-це эйдень кужонтень, косо топавтсь музыкальной прявтонь тевтнень. 
Сонзэ пингстэ те кужосонть эрямось, апак кавтолдо мертяно, аволь мольсь – лаказь лакась. Ютазь пингень 90-це иетнестэ, зярдо масторсонок ладявсть од койть, Мордовиясояк седе покш мель кармасть явомо эрзянь, мокшонь раськень культурантень. Саран ошонь 86-це эйдень кужось ульнесь васенцетнень ютксо, косо эрямос кармасть совавтомо од ушодкстнэнь.

Вана кода ледстни сонсь Раиса Сергеевна: «Монень маряви, 86-це эйдень кужосо минь васенцекс ушодынек ютавтнеме эрьва кодат вастовомат эрзянь койтнень-кирдатнень коряс».
Ушодоманть ушодсть, ансяк эзть учне: эшкевить певтеме стакачис. Васняяк, эйкакштнень а мейсэль оршавтомс. Сынст туртов эрявсть эрзянь оршамкат. Паро, те тевсэнть васня лездасть тенст тетятне-аватне. Оршамотне, Раиса Сергеевнань ледстнеманзо коряс, лиссть аволь истят, кодат эрявсть. Пелест мокшонь, пелест эрзянь. Мейле савкшнось пшкалемс лезкс мельга лия эйдень кужотнев, кинь азорокс лововсь кодамояк сюпав предприятия ды ставтсть паро оршамопельть. Кармасть сынст кедьстэ вешеме. Весть вешат, омбоцеде, колмоцеде молят – а варштытькак лангозот. Сестэ Раиса Сергеевна тейсь истя: тердинзе весень ды мери: «Эряви минстенек стамс оршамот!» Мерезь – теезь. Шкатне кадык сестэ аволь шождатольть! Вешнесть, косто муемс аволь питней коцт. Те таркась муезель. «Резинотехника» заводсто содавикс ломань ёвтась тенст, келя, тосонь важодицятненень макснить коцтпанкст станоконь нардтнемс-ванськавтомс. Бути эряви, тосо миить тенст аволь питнейстэ.

Курок коцтось рамазель. Сон кодазель чуронь-чуро суресэ. Тюсозояк аволь пек ашоль. Ялатеке маштовсь оршамопелень стамс. Раиса Сергеевна те шкас а стувтсы, кода эйстэст стасть эрзянь оршамопельть. Сонсь вень-вешка эзь удсе. Онкстниль-керсиль, стакшныль-каярдыль эйсэст. Истя стазельть кемготово оршамот.
Теде мейле тевест тусть седе шождасто. Эйдень кужосо кармасть ютавтнеме эрьва кодат вастовомат, эрзянь койтнень коряс кенярксчить. Сынст редизь журналисттнэ, кармасть сакшномо, сёрмадомо газетасо, невтнеме телевидениява.

Седе тов журналисттнэнь мелест 86-це номер эйдень кужонть лангс седеяк покшолгадсь. «Чумось» – музеесь, конань пурнызь-теизь эсест вийсэ. Весе, кить важодсть эйдень кужосо, кандсть кинь мезезэ ульнесь. Эсест кедьсэ тейсть каштланго, лангозонзо озавтсть «атя». Масторо – пряха, экшсэнзэ штерди «ава». Музеесь лиссь седе а ков паро.

Теде мейле тевтне тусть седеяк веревпандт. Арасель вейкеяк покш чи, конань сынь аволизь тешкста. Эрьва кодат вастовомат, чокшнеть, утренникть, моронь кужинеть ды истя седе тов. Тень туртов эрявсть сценарийть. Сынст сёрмадыцясь – Р.С. Зорькина. Прев мельга якась библиотекав, вешнесь-таргсесь весе сень, мезесь сюлмавозь минек койтнень марто. Курок сценарийтнеде таштавсть зняро, сатотсть нолдамс башка книгас. Сон лиссь 2010 иестэ «Шумбрачи, тиринь мастором!» лем ало. Пусмось аволь покш. Эйзэнзэ совасть 12 сценарийть. Тень лангс апак вано, сон пек питней ды эрявикс. А стяко те книгась сеске срадсь. Ней сонзэ а мусак костояк. Пароль бу сонзэ нолдамс одов ды питневтеме явшемс эйдень кужотнева ды школатнева.

Раиса Сергеевна маштсь муеме вейкине кель-вал эйкакштнень марто, сыремтеме оймесэст эрзянь келентень вечкема. Тонавтсь эйсэст аволь ансяк киштеме ды морамо, тонавтсь валморонь ловномояк. А стяко сонзэ кедьсэ тонавтниця эйкакштнень сеедьстэ тердтнесть эрьва кодамо вастовомас. Те шкас ломантне эзизь стувто вишка цёрыненть, кона апак визде ды апак пеле лиснесь сцена лангс ды ловнось эрзянь кельсэ валморот ды ловнось истя – весе мейле цяпасть тензэ стядо.

– Те цёрыненть лемезэ – Саша Савинов, – мельспаросо поладсь Раиса Сергеевна, зярдо кевкстия, кода се цёрыненть лемезэ. – Сон ней кассь, велявтсь од цёракс. Минек кужос ветизь овсе вишкинестэ, колмо иеть тензэ ансяк ульнесть. Пек превейнель. Мерят тензэ тонавтнемс валморо, сеске тонавтнесы. Весть вейке концертсэ сцена лангс нолдамс минек кадымизь меельцекс. Учоманть эйстэ виень допрок маштокшность. Саша якиль сценанть удалга, мучкиль таго-мезть, кевкстниль эйсэнь: те мезе, тона – мезе. Эзинь цидярдо, меринь режиссёронтень, мезекс кадымизь меельцекс. Режиссёрось каршон: те секс – тынк сехте вадря номерэнк.

Раиса Сергеевна ней пенсиясо. Седеезэ ялатеке эйдень кужосо. Сеедьстэ пачколить тензэ кулят, тосо ней эйкакштнень марто истят вастовомат-мезть а ютавтнить. Тень кувалма Раиса Сергеевна пек апаргали. Кода икелеяк, истя нейгак сон лови: тиринь келесь а ванстови, бути а ушодомс сонзэ тонавтоманть эйдень кужосто саезь.
Сонсь Раиса Сергеевна, пенсияв туезьгак, эзь кекше сеть тевтнень эйстэ, конат лездыть ванстомс минек раськень койтнень, тиринь келенть. Сон морси «Ламзурь» ансамблясо, налкси эрьва кодамо сценкасо, конатнень сёрмадыть ды путнить «Литова» эрзянь авань вейсэндявксос совицятне. Прянь апак шна мертяно: истя, кода налкси неть спектаклятнесэ Раиса Сергеевна Зорькина, стака муемс натой профессионалтнэнь юткстояк. Тенень кемевтемакс ульнесь «Кулдор-калдор» финнэнь-угрань юморонь 3-це фестивалесь, кона ютась 2015 иестэ. Тосо невтезь «Таньшкавтозь курго» спектаклясь саизе васенце таркатнестэ вейкенть. Теньсэ покш путовксозо ульнесь Раиса Сергеевна Зорькинань.

Раиса Щанкина


Умарьковонь 11-це чистэ Раиса Сергеевна Зорькина тешкстызе чачома чинзэ. «Литова» эрзянь авань вейсэндявксос совицятне ды «Ламзурень» морыцятне ёвтыть тензэ седейстэ молиця лембе валт. Арсить кеме шумбрачи, валдо васолкст, шожда ки ды кувака эрямо.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».