Вторник, марта 19, 2024
Важное


Истямо лем ало аволь умок Орданьбуесэ ютавтовсь научно-практической конференция, конась алтавсь Симферополень ды Крымень Архиепископонтень Лука Войно-Ясенецкойнень (мирсэ сонзэ лемезэ Валентин Феликсович). Сон ульнесь тевензэ парсте содыця врач, медицинантень ламо одонть ды лезэвенть совавтыця учёной ды виев священнослужитель, кинь эрямозо пек стакаль. Ансяк мезеяк лангс апак вано, сон ванстызе кемеманзо ды тюрьмасо улемстэяк эзь лотка озномадо ды кажос понгозтненень лезксэнь максомадо. Наукасо покш изнявкстнэнь, медицинасо од лувсо ормалгадозтнень лецямонть кисэ, сехте пек сыявксонь (гнойной) хирургиясо, покш эскелькстнэнь теемга советской шкатнестэ тензэ максозель Сталинэнь премиясь. Мезесь минек пек кенярдовты, сы шкань Симферополень ды Крымень Лука Архиепископось медицинасо васенце покш важодевксэнть ушодызе Мордовиясо, Орданьбуень моданть лангсо.



Сонзэ ине тевензэ эзть стувтово. Вейксэ иеде икеле Орданьбуень ды Отяжелень епископонть Вениамин Владыканть ушодксонзо ды баславамонзо коряс Орданьбуень Епархиянть юрсо ушодовсть иневанькс Луканень алтазь ловноматне. Иестэ иес кармасть ламолгадомо эрьва кодамо ёнкстнэстэ тей сыцятне. Кода мерсь Владыкась, неень шкане ламотнень, лия регионсо эрицятнень, ули покш мелест самс минек республикав научно-практической конференцияс. Те покш чинтень састь Ульяновскоень, Пензань, Татарстанонь ды лия ёнкстнэстэ врачт-учёнойть ды лия содавикс ломанть. Вейсэ сынь анокстыть ламо паро арсемат ды совавтыть сынст эрямос.
…Валскень 10 часонтень эрьва ёндо сыця инжетнень вастсть Орданьбуень Культурань кудосо. Вакска ютыцятнестэ ламот лоткакшность ушосо понгавтозь покш экранонть икелев ды кунсолость од ломантнень мелест-арсемаст сень коряс, кить сынст туртов течи алкуксонь геройтне ды кода сынь чарькодить неень ды умонь шкань геройтнень ине тевест.
Теде ёвтнесь документальной фильмась, конась алтазель Лука Святителентень.

Научно-практической конференциянть ушодызе Орданьбуень ды Отяжелень епископось Вениамин. Икельце валсонзо сон пачтясь, кодамо смусть путови те покш конференциянть ютавтомантень. Владыкась кортась седе, кодашка покш тарка минек эрямосонть путови одтнэнь марто ине тевтнеде кортамонтень, седейстэ молиця сынст арсематнень чарькодемантень.

– Эрьва шканть эсензэ героензэ, эрьвась юткстонок кочки сень, мезе ды мезесь сонензэ седе малавикс, – мерсь епископось.
Сон ледстинзе истят содавикс иневанькс ломантнень, кода Александр Невский, Дмитрий Донской, Сергий Радонежский ды лиятнень, кить эсест примерсэ эйсэнек тонавтыть ваньксчинтень, васняяк, лиятнень вечкемантень ды певтеме паронь теемантень. Седе тов Орданьбуень ды Отяжелень епископось Вениамин Владыкась пачтясь: Лука Святителенть эрямозо кеместэ сюлмавозель эрзянь-мокшонь моданть марто. Васняяк, сон ульнесь алкуксонь священнослужителекс, цидярдсь ламо майсемат. Тень лангс апак вано, Пазнэнь кемеманзо ванстызе. Кода врач, лецясь весень, ков ансяк сатотсть виензэ. Ламо пингес кадовсть сонзэ научной важодевксэнзэ, конат эрявикст нейгак, кода икелев бу аволь эскельдя течи медицинась.

Седе тов пурнавозтнень икеле кортась Орданьбуень муниципальной райононь прявтось А.Н.Антипов. Александр Николаевич тешкстынзе неть ловноматнень эрявиксчист ды домка смустест.
Мордовия Республикань Культурань, туризмань ды архивень тевень министранть пельде научно-практической конференциянь участниктнень лемс паронь арсематнень ловнынзе сонзэ полавтыцясь Н.В.Бычков. Сон башка мель явсь Орданьбуень Епархиянть марто наукань, культурань ды ламо эрьва кодамо тевтнесэ вейсэнь важодемантень. МР-нь Образованиянь министранть пельде кортась С.Н.Кугута.

Ламо лембе валт ды паронь арсемат пурнавозтненень ёвтась Мордовия Республикань Общественной палатань прявтось, исторической наукань кандидатось И.В.Капитонов. Иван Владимирович тейсь домка доклад, конасонть токинзе кезэрень ды неень шкатнень эрямонь ламо ёнкстнэнь, конат течи талновтыть кода одтнэнь, истя сыретненьгак. Сон тешкстась, неть научно-практической конференциятне, косо сон эрси свал, кандыть тензэ покш кеняркс ды мелень витема.
Иневанькс Луканень алтазь ловноматнес свал мезеяк од ды мельспаросо кунсоловиця пачтямот аноксты Н.П.Огарёв лемсэ МГУ-нь тонавтыцясь, исторической наукань докторось, профессорось О.Н.Марискин. Те разнэ сонзэ докладось лемдевсь «Войнань а содавикс геройтне – Ардатовань уездэнь эрицятне».

Ардатовасо медицинадонть, сеть содавикс врачтнеде, конат совасть минек республикань ды масторонь историяс, пачтясь Н.П.Огарёв лемсэ МГУ-нь тонавтыцясь, лучевой диагностикань ды лучевой терапиянь курс марто онкологиянь кафедрань прявтось, медицинань наукань кандидатось, доцентэсь А.З.Альмяшев.

Научно-практической конференцияс сыцятне седейшкава кунсолызь Н.П.Огарёв лемсэ МГУ-нь тонавтыцянть, культурологиянь кандидатонть, традиционной мордовской культурань ды неень шкань искусствань кафедрань доцентэнть С.Б.Бахмустовань ды теке жо вузонь факультетской теориянь кафедрань ассистентэнть Фади Кузманонь (Сирия) докладонзо. Сонзэ презентациясь лемдевсь: «Аравийские Сирийские Косма и Дамиан – подвиг врачевания».
Теевсь паро коекс шабра регионтнэстэ сыця инжетнень докладост кунсоломась. Те разнэ Чувашиянь И.Н.Ульянов лемсэ государственной университетэнь психиатриянь, медицинской психологиянь ды неврологиянь кафедрань ассистентэсь, Чебоксары ошонь 1 № больницянь сосудистой отделениянь прявтось Р.С.Максимов невтсь «Личностная характеристика врача инсультного отделения» теманть коряс презентация.

Орданьбуе ошонь И.А.Пожарский лемсэ Орданьбуень аграрной техникумонь воспитательной роботань коряс завучонть Е.Б.Лукинань докладось лемдевсь «Герой Хасана».

Научно-практической конференциясь прядовсь кенярксов кулясо: Епархиясь вейсэ образованиянь управлениятнень марто школасо тонавтницятнень ютксо яволявтокшнось эрьва кодамо номинациянь коряс пелькстамот. Те чистэнть ёвтазельть изницятнень лемест ды тенст максозельть Почётонь грамотат ды казнеть. Эрявсь неемс, кодамо мельспаросо эйкакштне лиснесть сценанть лангс. Ютксост ульнесть истяткак, кинь те казнесь васенцель. Кемеви, неть эйкакштне, кить варчизь виест артомасо, сёрмадомасо ды лия ёнкссо, касыть алкуксонь ломанекс, а эйкакшпингень ушодксось карми улеме эрямонь тевекс.

* * *
Кода уш пачтинек тиринь газетань лопатнесэ, ожоковонь 19-це чистэ эштё покш мелень витемань тев ульнесь Орданьбуесэ. Иневанькс Луканень алтазь образовательной IX ловноматнеде мейле сеске Культурань кудосто весе инжетне ульнесть Орданьбуень епархиянь историянь музеень панжомань торжественной пелькссэнть. Сонзэ панжизе Орданьбуень ды Отяжелень епископось Вениамин Владыкась.
Сонзэ кенкштне панжовсть кода эсенек республикасто, истя жо сонзэ томбальде сыця паломниктнень, школасо тонавтницятнень туртов. Бути кинь ули мелезэ, музейсэнть экскурсиятне ютавтовить аудиозаписень коряс. Музеев сыцятне неить тосто кезэрень ламо пазават ды чуросто вастневиця книгат.
Башка таркасот иневанькс Феодор Ушаковнень ды Лука Войно-Ясенецкойнень алтазь экспонаттнэ. Кемеви, те музеесь Пазнэнь кемицятненень, сехте пек од ломантненень, лезды седе парсте содамс минек историянть ды православиянь культуранть.

Валентина ЮДИНА.
Орданьбуень район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».