Ацамковонь 7-це чистэ Саранскойсэ капитальной витнемадо мейле панжовсь Мордовия Республикань Някань государственной театрась. Мероприятиясонть ульнесть Мордовиянь Прявтось Владимир Волков ды Россиянь Культурань министрань полавтыцясь Ольга Ярилова.

Мордовия Республикань Някань государственной театрась масторсонть кармась васенце объектэкс, кона панжовсь вишка ваныцятнень ды някань региононь ды муниципальной театратнень капитальной витнемань программанть коряс «Культура» нацпроектэнть топавтоманть юрсо. Сонзэ витнеманть лангс явозельть малав 42 миллионт целковойть. Седе покш пельксэсь ютась оборудованиянть рамамс, теке марто производственной мастерскойтнень туртовгак. Полавтовсть сценань технической ёнкстнэ, валдомтомань ды звуконь технологиятне, ладязь озамонь од таркат. Весемесь – ваныцятнень туртов.
Аламодо седе икеле театрань топавтомантень ды гастрольга ардтнемань туртов автобустнэнь рамамонть лангс ульнесть явозь 15 миллионт целковойть «Единая Россия» партиянь проектэнть юрсо.

«Ёвтан поздоровт Някань театрань коллективентень истямо учовикс ды покш чинть кувалма! – мерсь Мордовиянь Прявтось Владимир Волков. – Од условиятнень учость весе: театрань труппаськак, ваныцятнеяк. Ды вана «Культура» нацпроектэнть вельде Театрань иестэнть миненек удалась теемс истямо казне коллективентень, кона ютазь иестэ тешкстынзе 80 иетнень. Покш сюкпря Культурань министрантень Владимир Ростиславович Мединскойнень ды тыненк, Ольга Сергеевна, республикасонть культурань сферасо проекттнэнь топавтомасо лезксэнть кисэ».

«Мон пек кенярдан, нацпроектэнть вельде минь вельмевттяно, витнетяно ды тейтяно истят учрежденият. Арсян, штобу эрьвась эйстэнк тей самсто пештяволь паро ёжодо ды валдо мельде-арсемадо», – мерсь Ольга Ярилова.