«Кургоня» каймакось кочкавсь кемень сехте вадря ярсамопельтнень юткс региональной брендтнэнь раськень пелькстамосонть. Весемезэ ванновсть 508 брендт масторонь 79 регионтнэстэ. Мордовиясь невтизе позанть, «Кургонянть», кочкодыкень алтнэнь ды кочкодыкень сывеленть.

«Вкусы России» Весероссиянь пелькстамось ютавтови васенцеде. Арсицятне-анокстыцятне тешкстызь, проектэнть ули вандынь чизэ – сон карми эрьва иень. Сонзэ тевс нолдамозо решасынзе ламот аравтлувтнень, конатнень ютксо – экспортонть ды туризманть келейгавтомась-виевгавтомась.

РФ-нь Велень хозяйствань министрась, конкурсонь комиссиянь председателесь Дмитирий Патрушев мерсь: «Пелькстамосонть изнямось аволь ансяк невтьсынзе брендтнэнь. Изницятнень туртов тевс нолдавить сынст продуктатнень невтемань мероприятиятне».

Региононь брендтнэнь кисэ эсь вайгелест максызь миллиондо ламо ломанть. «Минек кочкить», «Минек велестэ», «Варчик, вечкеви», «Тантейчинь ярмунка» – весемезэ кавксо номинацият. Вейкесэнть эйстэст минек каймакось совась кемень вадрятнень юткс.

РФ-нь Велень хозяйствань министрань полавтыцясь, конкурсонь комиссиянь председателень полавтыцясь Оксана Лут ёвтнесь: «Кургонясь – эрзя-мокшонь раськень ярсамопель. Эрьва иестэ истямо лем ало Рузаевкань районсо ютавтневи гастрономической фестивалесь. Анокстамонь туртов прявт продуктатне – модамаресь ды велень топось. «Вкусы России» пелькстамосонть сон невтевсь «Вкусное рядом» номинациясонть».

Изницякс лисемс эзь удала. Икельдизь татаронь костязь мацеесь, арктикань ягодань пастилась ды Костромань сырась. Теде башка, пелькстамосонть невтезельть Мордовиянь лия брендтнэяк. Невтемга, Рузаевкасто – Николай Архиповонь позась. Ковылкинасто  Алексей Кулагин ёвтнесь мокшонь кочкодыкень алтнэде ды сывельденть. Чизэнзэ сонзэ фермасонть анокставить 23 тёжат алт, конатнень ускить Московов, Саратовав ды Пензав.

Сехте вадрятнень юткс кочкавомс мереви 2021 иестэнтькак. Анокстыцятне ёвтасть кемема: сы иестэ пелькстамось юты очной форматсо.

фотось Н.Гагаринэнь