Вторник, сентября 29, 2020
Важное

… Минь таго Ламбаське эрзянь велесэнть. Неень шкасто сонзэ ульцятнева молемстэ а вастат истят, кить тев аразде лытавольть.

– Течи, зярдо моли сюронь урядамось, арази кадоват ве ёнов сюронь кастыцятнень эйстэ, – ве вайгельсэ видькстасть «МАПО «Восток» велень хозяйствань предприятиянь бухгалтериясо важодицятне. – Веенстнэ сюронть нуить, омбонстнэ сонзэ паксясто ускить, колмонстнэ тинге лангсо костить-ванськавтыть ды истя седе тов. Минек велень эрицятне покш мель явить сюронь урядамонтень. Важодемань чись ушодовкшны рана валске ды прядовкшны позда чокшне. Важодемань те графикесь колавкшнось ансяк весть, зярдо зярыя чить валсь пиземе.

Тешкстасынек, «МАПО «Восток» велень хозяйствань предприятиясо маштыть аволь ансяк ламбамо якстерькаень, истя жо сюронь кастомояк. Истя, мелят Ламбаське велень трудий ломантне сайсть 38 тёжат тоннат сюро, эрьва гектарсто 45,7 центнерт, озимойтнень алов явозельть 1,5 тёжат гектарт. Комбайнертнэнь эйстэ явовить Александр Киринкин, Евгений Эрзяйкин, Дмитрий Трофимов.
– Тедеде сюротнень алов явозь 19,500 гектарт мода, – ёвтни хозяйствань прявт агрономось Н.И.Слугин. – Эйстэст 4,400 гектарт озимойть, 2,154 гектарт яровой товзюро, 4,750 гектарт шуж, 372 гектарт кснав, 262 гектарт рапс. Кснавонть урядынек шкастонзо. – Эрьва гектарсто саинек 30 центнерт, весемезэ – 921 тонна. Кснавонть эйстэ а ёми вейкеяк центнер! 500 тоннат каинек видьмексэкс, кадовиксэнть миинек.

Апак сёпо мертяно, «МАПО «Восток» велень хозяйствань предприятиясо виевстэ кундасть сюронь урядамонтень. Сюронь паксятнес лиссть 28 комбайнат. Эйстэст 11 – «ACROS» ды 17 – «Дон-1500Б». Сынст эйсэ важодить эсь тевень содыця специалистт, сюронь алкуксонь кастыцят. Ютксост – Евгений Эрзяйкин, Михаил Сошников, Александр Киринкин, Дмитрий Трофимов.
«МАПО «Восток» велень хозяйствань предприятиянь прявт агрономонть Н.И.Слугинэнь валонзо коряс, августонь 20-це чинтень урядазь 3900 гектарт озимой товзюро. Эрьва гектарсто саеви 42 центнерт, кой-кона таркатнесэ – 62 центнерт сюро. Шужонть эйстэ урядазь 1100 гектарт, эрьва гектарсто саеви 42 ды седе ламо центнерт сюро.
Велень хозяйствань предприятиянь тинге лангов ускозь 20 тёжат тоннат сюро.

Эряви меремс, весе комбайнёртнэ важодить виевстэ. Ялатеке эйстэст явовить Евгений Эрзяйкин ды Александр Киринкин. Эйстэст эрьвась уш пивсэсть 13 тёжат тоннат сюро.
…Вана сюронь паксяванть, теке ине ведьганть, юты «ACROS-580» комбайнась. Сонзэ вети комбайнёрось В.И.Волков. Мартонзо кортазевинек.

– Мон эрян Трокскужо велесэ. Сюро урядан уш кемкавтово иеть, – ёвтни Виктор Иванович. – Мелят пивсынь малав 20 тоннат сюро. Тедеде аравтлувсон саемс а седе аламо. Сюронь кастыцянь тевенть кочкия Целпанова велень средней школанть прядомадо мейле. Тесэ тень максозельть трактористэнь праватне. Сюронь урядамсосо монень лезды од цёрась, вадря трактористэсь Николай Ободкин. Сон истя жо Трокскужонь. Николай тевензэ вечксы. Те ёнксось редяви тевензэ коряс. Важодеме сакшны пек рана. Паксяв лисемадо икеле комбайнанть нучк-пачк ванносы: иляст уле кодаткак колавкст, весе-аволь ваднезь комбайнань пелькстнэ.Тень кувалма зярс важодтяно яжавкстомо.
Тесэ жо, сюронь паксясонть, вастовинек «МАПО «Восток» велень хозяйствань предприятиянь умонь комбайнёронть М.А.Шебаршов марто.
– Мон чачинь 1946 иестэ Ичалкань райононь Инелей велесэ, – ёвтни эседензэ Михаил Антонович. – Эсь шкасто трактористэкс важодинь «Инелейский» колхозсо. Мон а вечкан мельде-валдо важодеме. «МАПО «Восток» велень хозяйствань предприятиясо сюро урядан «Дон-1500Б» комбайнасо 11-це сезон. Тедеде монень лезды цёрам Владимир. Сон истя жо пек паро тракторист, чарькоди тевентень. Яжавиндеряй куш кодамо техника, витнесы парсте! Сон кочкизе монь кинть. Те, нама, кецявты! Арази берянь сюронь кастыцянь тевесь!
Умонь комбайнеронть М.А.Шебаршовонь валонзо коряс, сюронь урядамсто паксясонть ёмавкст арасть. Тень мельга кеместэ ваны хозяйствань прявт агрономось Н.И.Слугин.
Велень хозяйствань предприятиясонть теезь витнемань бригада. Яжавиндеряй кодамояк комбайна – сеске арды витнемань бригадась. Сынст весемесь ули: сваркань аппаратост, эрьва кодат запасной пельксэст. Яжавозь комбайнанть нурька шкас витнесызь. Тень кувалма хозяйствасонть тевтне молить вадрясто, апак лотксе.
– Мелят мон «Дон-1500Б» комбайнасонть пивсынь 20 тоннадо ламо сюро, – ледстни Михаил Антонович. – Неень шкань аравтлувсонок – пивсэмс 25 тёжат тоннат сюро. Тедеде сюрось пек удалась. Сон тусто, вадря. Куш пертьпельксэсь а пек эйсэнек кецявтсь.
Паксясто сюронть тинге лангов, Саранскоень эли Ромодановань элеваторов ускить «КамАЗ» прицеп марто виев автомашинатне. Сынст рультнень экшсэ ёроков шофертнэ. Вейкесь эйстэст Ф.В.Кузьмин.
– Мон Тазале велестэ, – ёвтни Фёдор Васильевич. – Чачинь 1969 иестэ. Ламбаське велень средней школанть прядомадо мейле тонавтнинь Отяжелень средне-специальной технической училищасо. Сюронь урядамонь шканть пек вечкса, – полады Ф.В.Кузьмин. Тесэ редяви ломаньсэнть истямо ёнксось: нузякс сон эли аволь? Нузякстнэ, нама, киненьгак а вечкевить. Монгак истяттнэнь ялгакс а лован. Мон паксясто тинге лангов весть ардомсто ускан 23-25 тоннат сюро. Койсэнь, те а берянь.
Шоферэнть Ф.В.Кузьминэнь валонзо коряс, сон иень перть тевсэ. Прядови сюронь урядамось, зярыя шкань ютазь ушодови ламбамо якстерькаень таргамось. Якстерькаенть «Ромодановосахар» предприятияв савкшны ускомс ловонть прамс.
Фёдо Васильевич Кузьмин пек шны комбайнеронть Евгений Эрзяйкинэнь.
– Кода а шнамс Евгений Анатольевичень, – видькстась Фёдор Васильевич. – Сонзэ вишка порасто комбайнань ветнеме тонавтызе тетязо – Анатолий Михайлович. Ней сюронь кастыцянь тевентень тонавтни умонь трактористэнть нуцьканзо, Евгениень цёранзо.
Ламбаське веленть эйстэ аволь васоло ашти Целпанова велесь. Тесэ «МАПО «Восток» велень хозяйствань предприятиянть тинге лангось, косо сюрось ванськавтови, костяви ды анокстави видьмексэкс. Тесэ важодить трактористтнэ Александр Пышков, Сергей Мякушин. Утомсонть видьмекстнэнень протравливания теить Алямкин Михаил, Геннадий Беляев.
– Тесэ видьмекстнэнь пештить «Бич-бег» кескавс, – ёвтни агрономось Андрей Слугин. – Кескавонтень кельгить 500-550 килограммат сюро. Тестэ видьмекс марто кескавтне усковить паксяв.
Андрей Слугин агрономонь тевенть кочкизе эйкакш пингстэ.
– Эште вишкине ульнинь, тетям агронмось мартонзо сайнилимим паксяв. Кизэнь каникулатнестэ эзинь тукшнояк паксясто, – ледстни агрономось Андрей Слугин. – Зярдо школанть прядыя, сыргинь тонавтнеме Н.П.Огарёв лемсэ МГУ-нь Аграрной институтов. Маныть прядыя бакалавранть. Уш омбоце ие важодян агрономокс.
Тешкстасынек, «МАПО «Восток» велень хозяйствань предприятиясо покш мель явить аволь ансяк сенень, кода седе курок прядомс сюронь урядамонть, истя жо сы иень урожаентеньгак. Тень туртов теить весементь: таштыть паро видьмекст ды ушодсть уш озимоень видеме.
– Содатадо, минь ламо сюро саинек меляткак, тедедеяк тевтне молить вадрясто. Ней арсетяно саемс сюро меленде седе ламо, – тешксты «МАПО «Восток» ООО-нь прявтось А.В.Трошин. – Те тееви од технологиятнень лангс нежедеманть кувалма. Маныть раминек кавто сеялкат. Сынь омбо масторонь. Лемест – «AMASONE». Сеялканть келезэ вейксэ метрат. Бункерэзэнзэ кельгить 4 тоннат видьмекст. Те сеялканть ускси омбо масторонь виев «Джон Дир» тракторось. Эйсэнзэ видемась моли апак сока паксяванть. Уш видинек малав 120 гектарт озимойть. Неть агрегаттнэнь питнепест арась. Сынст тевс нолдатано летькень кирдемга.
Алкукскак, Вечкусы веленть эйстэ аволь васоло паксясонть оймсемань апак сода моли озимоенть видемась. Тесэ те тевенть топавтыть трактористтнэ В.И.Каталов ды Н.В.Кленов.
Тинге лангсто паксяв видьмексэнть ускить шофёртнэ Н.М.Ефимов, Сергей Акимов.
Тесэ теевинек содавиксэкс велень хозяйствань предприятиянь прявт инженерэнть С.В.Шубин марто.
– Мон «МАПО «Восток» ООО-сонть важодян малав кавто иеть, – ёвтни Сергей Вячеславович. – Икеле важодинь Чаунзань районсонть «МАГМА-ХД» предприятиясонть истя жо прявт инженерэкс. Тесэ, Ламбаськесэ, тевтне ладязь вадрясто. Эрьва косо неяви азорксчи. Тракторонь парксонть лововить омбо масторонь виев 11 трактор, колоньгемень ниле «МТЗ – 82, 1221» тракторт ды истя седе тов. Минь покш мель явтано озимойтнень видемантень. Видемань агрегаттнэнь мельга вантано пштистэ. Виде, лиясто сынь яжавкшныть. Вана нейгак яжавсь трактористэнть Валерий Иванович Каталовонь видемань агрегатось. Нацяс минек специалисттнэ витнесызь колавксонть.
Алкукскак, «Джон Дир» тракторонть перька чарасть зярыя од ломанть. Ней прась шка кортнемс трактористэнть В.И.Каталов марто.
– Мон Вечкусы велестэ, 1986 иестэ Кемлянь совхозонть-техникумонть прядомадо мейле кундынь сюронь кастомань тевентень ды те шкас топавтан вечкевикс тевем. Важодинь трактористэкс Вечкусы велень «Мичурин» лемсэ икелень колхозсонть. Неень шкасто озимойтнень видемстэ монень лезды Ламбаське велень од цёрась Николай Инчин. Чинь норманок свал топавтнетяно велькска.
– Тедеде арсетяно видемс вете тёжадо ламо гектарт озимойть, – ёвтни прявт агрономось Н.И.Слугин. – Васенцеде видинек Береговые Сыреси велень модатнень. Видьмекстнэ эсенек. Неть – «Московская-39», «Скиперт» сортонь. 20 тоннат «Льговская-4» элитной видьмекст раматано Чаунзань райононь «Калиновская» велень хозяйствань предриятиясто.
… Обед шка. Шуж паксянть урядыцятне-комбайнёртнэ пуромсть вейсэ. Ламбаське велень столовойстэ усксть ярсамопель. Паксясь комбайнатнень увтонть эйстэ оймси. Марявить нармунень чоледематне. Ютыть зярыя минутат ды таго сэтьме коштось колави комбайнань увтсонть.

Петр Зиновьев
Отяжелень район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».