Кодамо мелявксось свал ашти седе пштистэ? Те – кадрань кевкстемась. Ды, нама, кортамось аволь снимкатнеде. «Кадратнеде» кортамсто минь мельсэ кирдтяно ломантнень, конат важодить эли кить арсить важодемс те эли тона тевсэнть.

Мекс истямо мелявкс лисни? Ламот а арсекшнить седе, мезе карми мейле, кие сы сынст таркас ды кода карми ветявомо роботась сы шкастонть. Зярдо жо те кевкстемась сти пштистэ, лисни, арась истямо маштыця ломань, кие поладсы ушодозенть.
Самай истямо кевкстема макссь эстензэ «iВолга» од ломанень форумонь грантонь пелькстамонь изницясь Елена Дерябина. Минь вастовинек ды кортынек мартонзо мелявтовтыця кевкстематнеде.
– Лена, шумбрат! Ёвтнек седе домкасто эсь проекттэнть. Мекс арсить токшемс кадратнень резервань кевкстеманть?
– Эсь проектэнть мон алтыя те темантень секс, эдь руководящей составонь кадратнень резерванть пурнамось – те прявт тев «Российские студенческие отряды» общественной организациянть туртов. Кадратнень резервань системанть теемадо мелесь примазель Мордовия Республикань Студентэнь отрядтнэнь стратегической сессиянть лувсо, ды теде мейле сон совавтозель проектс.
Студентэнь отрядтнэнь ютксо мон уш сисем иеть, ды эсь команданть пурнамсто ды одкстомтомсто аволь весть вастовкшнынь кадратнень арасьчинь мелявксонть марто.
– Мезе жо истямось – кадратнень резервась, ды кинь эйстэ сон пурнави?
– «Создание системы кадрового резерва студенческих отрядов Республики Мордовия «Кадры под ключ» проектэнть юрсо арсеви пурнамс ды ютавтомс образовательной ды информационной мероприятият, конат лездыть пурнамс Мордовиянь региональной отделениянь базанть. Те эряви эсь опытэнь лиянень явоманть туртов, лидертнэнь ды активисттнэнь содамочитнень кастоманть туртов. Ды, бути карми конкуренция ды теке должностентень кармить бажамо кавтодо ламо резервистт, сестэ сынст ютксо карми седе виев бороцямо, мезесь максы седе вадря кадрат.
– Ёвтнек, мезе карми теевеме кадратнень анокстамга?
– Проектэнть лувсо арсеви:
- кортамот региональной отделениянь эрьва членэнть марто;
- лидертнэнь вейс пурнамось, конат ютызь кочкамонть;
- «Лидер» профессиональной мастерствань online-марафононь ютавтомась;
- кадровой резервань системас совицятнень ютксо «Формирование компетенций и навыков: hard- и soft-skills» тонавтомань программань ютавтомась;
- форумтнесэ, конференциятнесэ, семинартнэсэ ды студенческой самоуправлениянь важодемасонть улемась.
Весе те арсеви «Школа кадрового резерва» проектэнть юрсо.
– Те весе пек вадря. Мезе жо те ёнкссонть учови седе тов?
– Седе тов важодемась карми ветявомо проектэнть келейгавтомасо. Проектэнть тевс нолдамонть лувсо анокстазь методической материалтнэнь мереви нолдамс ПФО-нь регионтнэсэ истят базатнень теевемасо.
– Меельцекс ёвтнек, кода те иестэ ютась «iВолга» форумось?
– Тедеде эпидемиологической тевтнень коряс форумось целанек ютась online-форматсо. Ансяк те эзизе ёмавто сонзэ эрявиксчинзэ. Монь туртов форумось ашти масторонь ёроков од ломантнень вейсэндявома таркакс, косо ули весемесь эсь мельтнень-арсематнень ёвтамонть ды од содамочитнень пурнамонть туртов. Ды, кодамо эрявикс тевесь – улемс эсь командань пельксэкс!