Вторник, мая 21, 2024
Важное

Июлень 29-це чистэ Нижней Новгородонь областень Лукояновабуесэ ютась «Эрзянь лисьмапря» регионъютконь эрзянь ды мокшонь раськень культурань фестивалесь. Тедеде сон мольсь 13-цеде.

Кода свал, инжетне пурнавкшность Кельмелисьмалей лисьмапрянть вакссо аштиця этнопарконтень. Тесэ важодсь декоративно-прикладной творчествань ды ярсамопелень выставкась-ярмункась. Каванямотнень пидизь-панизь Лукояновань райононь велетнень аватне. Теде башка, весе сазь инжетнень каванясть сывель ямдо ды тикшень чайде. Эйкакштнень туртов важодсть спортонь площадкатне, косо сынь налксесть ды пелькстасть.

Фестивалесь ушодовсь раськень штатолонь кирвазтемасо. Озксонть ютавтызь Раиса Щанкина, Александр Данильчев, «Ламзурь» фольклорной ансамблясь. Кедте-кедьс кундазь, вейсэнь кирькссэ ютасть кужованть тей сазь ансамблятне ды весе, кинь ульнесь мелест.
Лембе вал марто пурнавозтненень пшкадекшнесть инжетне.
– Те кенярксчись вейсэнди минек раськетнень. Фестивалесь моли 13-цеде ды неяви, кода сонзэ учить весе ломантне. Тей сакшныть сыренек-однэк, этнопаркось кармась весенень вастовома таркакс, косо пурнавить ялгатне, малавикстнэ, ве классо тонавтницятне. Кеман, покшчись седе товгак ансяк виевгады, – кортась Лукояновабуень муниципальной округонь местной самоуправлениянь прявтось С. Н. Малышев.

– Россиянь раськетнень культурась невти – кодамо сюпавчи перьканок, кодат койть-кирдат улить. Виевчинек – раськетнень ютксо ояксчисэнть. Масторонок ламо мезе теи, ансяк гайгевельть бу тиринь кельтне, невтевлинек лия ёнов а молиця культуранок, – кортась МР-нь Культурань, национальной политикань ды архивень тевень министрань васенце полавтыцясь А. И. Карьгин.
– Эрзятне ды мокшотне эрить сравтовозь Россиянть келес. Паро, истят кенярксчитне пурныть эйсэнек вейс, эсенек чачома-касома таркатнес. Минек ломантне вечксызь эсест келест ды коест-кирдаст. Ней тенек эряви весементь ванстомс, максомс эйкакшонок, нуцьканок, поладыцянок туртов, – кортась Эрзянь ды мокшонь раськень регионъютконь общественной вейсэндявксонь исполкомонь прявтось Т. И. Ларина. Казнесэ сон казинзе Лукояновабуень эрицятнень, кить явить покш мель тиринь келенть, культуранть ды койтнень-кирдатнень ванстомантень.
Истя жо вал сайнесть Нижней ёнксонь Лукояновабуень «Лисьмапря» эрзянь ды мокшонь национально-культурной автономиянь прявтось М. К. Голодова, «Ялгат» мокшэрзянь культурань центрань прявтось М. И. Безаев ды лият.

Ледстязель чувтосто керсицянть, артыцянть, этнографонть Николай Иванович Аношкинэнь лемезэ. Самай сон ламо тейсь те этнопарконть пажомасо. Нейгак тесэ аштить зярыя скульптуранзо. Сонзэ ледстнемга июлень 12-15-це читнестэ Лукояновабуесэ ютавтозель «Наследие предков» парковой скульптурань чувтосто керсицятнень пелькстамось. Конкурссонть ульнесть Мордовиянь, Пензань ды Нижней областтнень кедьчелькев ломантне. Истя, этнопаркс путовсть од скульптурат, эрзянь ды мокшонь мифологиясто персонажтне – Ведявась ды Вирявась. Сынь аштить лисьмапрянть вакссо.
Седе тов ушодовсь концертэсь. Сцена лангсо морасть Мордовиянь «Ламзурь», «Вармава» фольклорной ансамблятне. Пек лембестэ вастозель Мордовиянь государственной филармониянь морсицясь Андрей Бочканов. Сон тесэ ульнесь васенцеде. Ды пек тусь мельс инжетненень. Од цёрась кенерсь морамояк, кортамояк ваныцятнень марто. Ламот эзть кирдеве ды лиснесть киштеме.

Тамара Николаевна Корчагина сась тей Сеченовской райононь Васильевка велестэ. Сон важоди культурань кудонь прявтокс ды морси тосонь «Умарина» фольклорной ансамблясо.

– Минек ансамблянок пурнавсь 2000 иестэ. Васенце художественной руководителекс ульнесь Н. В. Колесникова. Ней Л. Б. Гусева. Ледстнян, сестэ сцена лангс лиснинек карьсэ, минсь стакшнынек юбкат. Уш мейле, шкань ютазь, райононь КБО-со стасть тенек эрзянь оршамопельть. Карминек морсеме эрзянь кезэрень морот. Саемга, «Айдо, ялгат, лём паксяв», «Самсон леляй», «Вирев молян». Ней репертуарсонок ламо морот. Баянистэнек арась, те ризнэвти. Кунсолыцянок пек вечксызь «Кавто цёрат тикше ледить», «Пандо прясо тол палы», «Сюк, сюк, ковава» ды лия моротнень. Содатано ламо частушкат. Ков тердьсамизь – тов мольтяно морамо. Ардтнинек морамо Нижнеевгак. Нама, седе сеедьстэ морсетяно райононь кенярксчитнесэ. Невтнетяно эрзянь койть-кирдат. Районсонок эрьва ие ютавтневи Россиянь раськетнень фестивалесь, козо пурнавкшныть рузонь, татаронь, ветькень, эрзянь ды мокшонь раськетне. Репетициянок ютыть культурань кудосо. Аппаратуранок ули эрьва кодамо: микрофонт, микшерной пульт. 2024 иестэ клубсонть карми покш витнема-петнема. Пек учотано одкстомтоматнень! Ансамблясонок кото морсицят, малав весе аватне уш пенсиясот. Истя жо весе морсетяно «Вдохновение» рузонь ансамблясо. «Эрзянь лисьмапряв» сакшнотано эрьва ие. Кунсолотано, кода лиятне морыть. Вешнетяно эстенек од морот.

– Кода эри течи Васильевка велесь?
– Веленек састыне чами. Од ломантне тукшныть ошов. Тедеде школанок пекстызь. Мелят ульнесть 13 тонавтницят. Ней эйкакштнень усксить тонавтнеме Сеченовав. Велесэнек эрицятнеде 242 ломанть, 70% рузт ды ансяк 30% эрзят.
«Эрзянь лисьмапря» фестивалев истя жо сакшность Ульяновск ошсто «Гармония» дуэтэсь (мирдть-нить Овчинниковтне), Чувашиянь Алатырской райононь Алтышева велень «Лейне» фольклорной ансамблясь.

Мельспароль неемс Нижней Новгородонь областень морамонь коллективтнень, неть: Лукояновабуень Иванбиёнь «Родники» народной хорось, Пичингушинь «Эрзяночка», Шандрова велень «Умарина» ансамблятне, Покш Болдинабуень Пикшня велень «Чилисемась», Гагинской райононь Какино велестэ «Ялгат» коллективесь ды ламо лиятнень. Сынь – минек келенть, моротнень, койтненькирдатнень алкуксонь ванстыцят. Кадык седе кувать морсить ды кецявтыть республикань томбале эриця эрзянь ды мокшонь ломантнень.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».