Вторник, марта 19, 2024
Важное



Отяжеле ёнксонь Покш Манадыши велесь ашти аволь васоло райононь куншкакуронть эйстэ, мазыйдеяк мазый таркатнесэ. Велесь аволь вишкинетнестэ, эрямось моли эсь лувсо, ломантне котьмить эрьва чинь тевсэст ды кемить вандынь паро эрямонтень.



Аволь умок содавтынек те веленть ды вастовинек Покш Манадышинь администрациянь прявтонть Александр Владимирович Гурьянов марто. Александр Владимирович ёвтнесь веленть течинь эрямодонзо, тесэ эрицятнеде, эрямонть вадрялгавтомга од мельтнеде-арсематнеде.
Покш Манадыши велень администрациянть юрс совить ниле велеть: сонсь Покш Манадышись, Тетюшись, Рузонь Дубровкась ды Чебудасысь. Те­чинь чинтень эрицятнеде тесэ лововить 1175 ломанть. Поселениясь Отяже­лень районсо сехте покштнестэ вейкесь.
- Апак кавтолдо тенк ёвтаса, веленек пек паро! Ломантнеяк тесэ эрить панжадо седейть, сэтьметь, инжень вечкицят, куш кодамо роботадо ды стака тевде а пелицят. Арсян, минь, Покш Манадышинь эрицятне, пек уцяскавтано. Вадря эрямонть туртов ули весеменек: важоди велень хозяйствань предприятиянок - «Агрофир­ма «Искра» ОАО-сь, кона ашти градообразующей предприятиякс. Покш сюкпря сонзэ прявтонтень Павел Степанович Шиловнень, сон пек ризны-мелявты веленек кисэ ды теи весементь тесэ эрямонть вадрялгавтомга. Ули школа, эйдень кужо, Культурань кудо, ФАП, почта, - ёвтни Александр Владимиро­вич. - Нама, сехте прявтось: улить важодема таркат. А течинь шкане те васень тев.
Ды неть валтнэ алкукс ви­деть. Течинь чине эрить сеть велетне, косо улить важодема таркат ды вадря эрямонть туртов теезь весемесь. Покш Манадышинь эрицятнестэ седе ламотне важодить тескень «Искра» агрофирмасонть, лиятне - Отяжелень ды шабра Чаунзань райононь предприятиятнесэ. Нама, улить Московов ардтницяткак, ансяк истятнэде аволь ламо. Эдь а стяко кортыть, кудосо роботазь трёшникесь ков седе питней томбалень целковойденть.

- Веленть ды эрямонть вадрялгавтомга минь ветятано покш робота. Ютазь иестэ 1972 иестэнть саезь васенцеде тевс нолдынек экономикань истямо ёнксонть, кода самообложениянть. Пурназь целковоенть лангс государствась миненек явсь эштё целковой. Истя, пурназь 180 тёжат целковойтненень государстванть пельде получинек эштё 180 тёжат ды неть ярмактнень лангс теинек покш робота. Васняяк, вадрялгавтынек калмазыртнень, витнинек ялго якамонь туртов кавто сэдьтнень. Неень шкане роботат ветявить Рузонь Дубровкасо - витневи Ине Отечественной войнасо чавовозтненень кеврунгось. Неть читнестэ истямо жо кеврунгонь витнеманть коряс роботатне ушодозь Тетюшисэ. Истя жо ветявить роботат культурань наследиянь кеврунгонть - Советэнь властенть кисэ бороцицянть С.С.Васинэнь калмолангонзо витнеманть-вадрялгавтоманть коряс. Те культурань объектэсь ашти Рузонь Дубровка велесэнть. Нама, аволь весе течи Советэнь властенть кирдицят, ансяк те - историянок. Теке марто минек велетнень куротнева кавксть седе ламолгадсть валдомтомань лампатне. Нама, неть весе роботатне топавтовить аволь ансяк самообложениянь ярмактнень лангс, ансяк сынь истя жо тевсэть.

Эряви меремс, поселениясонть ветяви робота националь­ной проекттнэнь тевс нолдамонть коряскак. Истя, Покш Манадышисэ маласо шкастонть панжови эйкакштнень туртов налксемань площадка. Сон тееви «Жильё и городская среда» нацпроектэнть лувсо. Спортонь-налксемань туртов комплекс сы иестэ арсеви теемс Тетюшисэ, стявтови эйдень од кужо. Кода содатано, маласо шкастонть тесэ карми эрямонь од комплекс (стявтовить 300 ламо кудот) социальной весе эрявикс инфраструктуранть марто. Кудотнень теемасо семиятненень максови лезкс федеральной программатнень тевс нолдазь.

-Национальной проекттнэнь тевс нолдамосо лездыть сынсь эрицятнеяк. Малав 30 % нолдавиця ярмактнестэ - эрицятнень ды спонсортнэнь лезксэсь, - ёвтни Александр Владимиро­вич. - Ули мелем тешкстамс «Агрофирма «Искра» ОАО-нь прявтонть Павел Степанович Шиловонь, индивидуальной предпринимательтнень Александр Викторович Никитинэнь ды Олег Владимирович Ласкинэнь. А вана лелят-ялакст Андрей ды Алексей Вдовинтнэ кирдить мельть сы шкань социальной эрявикс объекттнэнь коряс.
Монь койсэ, эрьва велесэнть улить истят ломанть, кить весе седейсэ мелявтыть тиринь ёнксонть кисэ ды бажить лездамс куш мейсэ. Седе сеедьстэ - те сыре ломантне. Сынь пенсиясояк явить мель велень общественной эрямонтень. Невтемга, пенсионертнэ В.И.Гордеев ды В.И.Фомин чаво, куракшсо касозь таркасонть тейсть парк. Явинек зярыя ярмакт касовкстнэнь рамамс, ды сынь чаво моданть озавтызь кузнэсэ ды каштансо.
Весе тевтнень мельга пштистэ ваныть Т.Ф.Нуждина, З.А.Морозова, Л.В.Софронова. Минь свал ветятано кортамот неть ломантнень марто. Сынь свал содыть, косо кодат мелявкст, мезе витнема-теема.
Тагояк тешкставлия «Ис­кра» агрофирмань прявтонть. Павел Степанович Шилов ломанесь виде, тевень содыця. Чаво, стяконь тевть а вечки. Арсян, минек поселениянть вадря тевтнень топавтомасо покш путовксозо сонзэ. Сонзэ мелявтоманть ды важодеманть вельде минек велетнесэ васенцекс районсонть ветязель газ. Весе велетнесэ калмазыренть видьс ацазь бетонной плитань килангот ды ютамо таркат. Сонзэ тевензэ неявикст ды путовксозо пек покш.

Кода уш тешкстынек икеле, велесэнть ули весе эрявикс со­циальной инфраструктурась. Важоди средней школа, косо лововить малав вейксэньгемень тонавтницят. Ули эйдень кужо, ков якить 26 эйкакшт. Ансяк вишкине эрицятнеде тесэ ков седе ламо, секскак сась мель теемс од кужо Тетюшисэ. Важодить библиотека, лавкат, эрьва велесэнть ули ФАП.

- Те кизэнтень арсеви панжомс од ФАП Тетюшисэ. Сон тееви «Здравоохране­ние» нацпроектэнть лувсо. Тендерэсь уш ютавтозь, изнясь Московонь фирма. Сынь сакшность, ванызь тарканть, маласо шкасто тевтне ушодовить. Объектэсь карми анок тедеде, - тешксты А.В.Гурьянов.

Покш мель тесэнь эрицятне явить культурной эрямонтеньгак. Культурань кудонь прявтось Валерий Михайлович Ануфриев тень мельга ваны пштистэ. Сон - «Шумбрат, Мор­довия!» пелькстамонь лауреат, ды кода лемдизь эрицятне - музыкальной самородок. Эрьва кенярксчинтень аноксты мезеяк од, кенярдовты весень оймень кенярдовтыця концертсэ.

Покш Манадышисэ тееви весемесь ломантнень вадря эрямонть туртов. Покш робота ветяви семиянь питнейчитнень ванстомга. Секскак поселениясонть лововить ламо эйкакшонь триця кеветее семият. Сыненст максови эрьва ёндонь лезксэсь аволь ансяк государстванть, веленть пельдеяк. Те иестэ Калгинтнэнь ды Сю- ваткинтнэнь ламо эйкакшонь триця семиятненень максовсть субсидият кудонь строямс.
- Минек велесь эри ды карми эрямо, зярс улить тевень вечкиця, эсь тиринь ёнксонть кисэ мелявтыця ломанть, - кемекстызе Александр Гурьянов.

Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».