Четверг, июля 09, 2020
Важное


Отечествань ванстыцянь кенярксчиденть икеле якинек инжекс «Республиканская клиническая больница № 5» Мордовия Республикань здравоохранениянь государственной бюджетной учреждениянтень.
Те иестэнть топодить 25 иеть, кода тесэ прявт врачокс важоди Мордовия Республикань ды Российской Федерациянь заслуженной врачось, МР-нь Прявтонь премиянь лауреатось, Мордовия Республикань Врачонь ассоциациянь прявтось А.Н.Пинямаскин. Текенень поладсынек, Анатолий Николаевич республикасонок вети общественной покш робота. Сон кавксть кочкавкшнось Саранск ошонь Советэнь депутатокс, шкань ютазь – МР-нь Госсобраниянь ветеце, сисемеце тердемань депутатокс.

Неень шкане А.Н.Пинямаскин – МР-нь Госсобраниянь Социальной политикань коряс комитетэнь член, граждантнэнь марто важодемань законодательстванть топавтоманзо мельга ваномань ды депутатонь этикань кевкстематнень коряс комиссиянь прявт.

Тешкстасынек, те эрзянь цёрась, кинь чачома ёнксозо Кочкурова ёнксонь Морд. Давыдова велесь, ков сатыть виензэ весенень лезды, кинень тевсэ, кинень седеймарямонь валсо. Невтемакс, ютазь иестэ Анатолий Николаевичень ульнесь покш путовксозо минек «Эрзянь правда» газетань проектэнть топавтомасо, кона алтавсь республикасонок ды масторсонок содавикс ломаненть, Ине Отечественной войнань участникенть, Мордовиянь здравоохранениянь икелень министранть Н.Я.Назаркинэнь валдо лемензэ ледстямга книганть нолдамосо ды сонензэ алтазь вастовоманть ютавтомасо.
Республиканской 5 номер клинической больницясо улемстэ лецицятнень ды ормалгадозтнень марто кортамсто А.Н.Пинямаскиндэ савсь марямс ансяк лембе валт ды прявтсонзо коллективенть лемс паронь арсемат.

Течи минек ловныцятненень ёвтнетяно больницясонть кавто важодицятнеде: вейкесь эйстэст ультразвуковой диагностикань врачось В.С.Кузнецов, омбоцесь – Я.Ш.Юмаев хирургось.


«ХИРУРГОНТЕНЬ СВАЛ УЛЕМА АНОК ЛОМАНЕНЬ ИДЕМЕ»

Малав ниленьгемень иеть алтась эрямостонзо медицинантень Республиканской ветеце номер клинической больницянь хирургось, МР-нь заслуженной врачось Якуб Шайхелислямович Юмаев. Сонензэ прась уцяска чачомс ламо эйкакшонь триця семиясо. Эштё вишкинестэ содасы седеймарямонь ёнксонть. Те шкас эзть стувтово эйкакшпингень ледстнематне, конат ютасть Ромодановань райононь Белозерье велесэ. Тетязо-авазо – Шайхи Калимуллович ды Няймя Ахметовна – трясть-кастсть сисем эйкакшт. Семиясост медицинанть васня кочкизе Хафиз Шайхелислямович лелязо, кие пингень перть мейле важодсь педиатрань тевсэнть.

1968 иестэ парсте школанть прядомадо мейле Якуб Юмаев ушоды тонавтнеме Саранскоень медучилищасо. Теде мейле туи армияв масторонть икеле долгонзо топавтомо. Тосто самодо мейле од цёрась тонавтнеманзо поладсы Мордовиянь Н.П.Огарёв лемсэ госуниверситетэнь медицинской факультетсэ.
Кодгеменце-сизьгеменце иетнестэ сехте пек эзть сатокшно республикань райбольницятнесэ врачтне. Тень ловозь, од специалистэнтень Я.Ш.Юмаевнень эзть максо шка интернатуранзо прядомскак. Сеске кучизь важодеме Лямбирев, васняяк ульнесь хирургокс, седе тов прявт врачонь полавтыцяль ды теке шкасто топавтсь хирургонь тевенть.

Хирургонь васень эскелькстнэнь теемстэ сонензэ покш лезкс макссь республикасонок содавикс хирургось, Российской Федерациянь ды Мордовия Республикань заслуженной врачось В.Т.Ипатенко. Сондензэ кортамсто Я.Ш.Юмаев тешкстась, те тевензэ парсте содыця, лиятненень лездамо маштыця алкуксонь врач.

Эдь сеть шкатнестэ весе райононть келес ульнесть ансяк кавто хирургт, конат чить ды веть важодема таркасольть. Зярдо эйстэст вейкесь кудов туиль, ялатеке тосояк оймсемс эзь савкшно. Куш кодамо шкасто сыненст гайневтсть больницясто, ды сынь свал ульнесть анокт самс операциянь тееме.

– Лиясто ансяк озат ярсамо, а кенерят кургозот кшисускомонь путомо, тонеть гайневтить ды пачтить кодамояк апаро куля, – ледстни Я.Ш.Юмаев. – Кие-бути томбавсь, керявсь, порксавсь. Сеске напустят больницяв.

Шкань ютазь сонзэ тердьсызь важодеме Саранскоев, Республиканской ветеце номер клинической больницяв.

Кадык нейгак сон важодема таркас сы весемеде икеле, ялатеке соды, чокшнень 19 часто мейле сон карми улеме кудосо, семиянзо вакссо. Тетянзо тевенть истя жо полады Нелли Якубовна тейтерест.
Цёратнень ды аватнень кенярксчитнеде икеле Я.Ш.Юмаев арси кеме шумбрачи ды кармавты весень од шкасто теде мелявтомс. Седе ламо якамс ды свал эрямонь шумбра лувонть нолдамс тевс. Сонсь ламо иень перть кирякстни сокссо, ламо вайгельбеть эрьва чистэ юты ялго.

«БИОЛОГИЯ ПРЕДМЕТЭНТЬ ВЕЧКЕМАСЬ ВЕТИМИМ МЕДИЦИНАС»

Виталий Сергеевич Кузнецовонь, Республиканской ветеце номер клинической больницянь ультразвуковой диагностикань врачонть тиринь чачома велезэ – Дубенка буень Поводеле эрзянь велесь. Тетязо-авазо – Сергей Михайлович ды Татьяна Егоровна – трудонь вечкицят, стакачиде апелицят. Сергей Михайлович – строитель, машты эрьва мезень тееме, авазо важоди микшнемань-рамамонь тевсэ. Сынь трясть-кастсть кавто эйкакшт. Веженсесь, Ирина, тонавтни Н.П.Огарёв лемсэ МГУ-нь экономической факультетсэ. Покш цёраст Виталий эштё школасо тонавтнемстэ вечкилизе биология предметэнть.
Виталий Сергеевичень валонзо коряс, Медицинань институтонть сон кочкизе васняяк биология вечкевикс предметэнть ды истят тонавтыцянзо, кода В.П. Паркаевень, Е.В. Силантьевань, П.И. Климкинань пельде содамочитнень саезь. Свал ульнесь мелезэ содамс, кода теезь ломанесь, кода важодить сонзэ органтнэ, сехте пек – седеесь ды пряудемесь.

– Вана нейгак эхокардиоскопиясь – сехте стака ды теке шкасто интересной весе ванкшноматнестэ. Те УЗИ-исследованиятнестэ вейкесь, кона лезды аволь ансяк неемс седеенть, истя жо содамс сонзэ функциянть, кода парсте сон важоди ды улить-арась эйсэнзэ ормат, – ёвтни В.С.Кузнецов.
Ледстясынек, школанзо прядомадо мейле, ков максомс документэнзэ Виталий Кузнецов эзь кавтолдо.
Истя, 2009 иестэ ёроков, ламонь содыця цёрынесь теевсь Мордовиянь Н.П.Огарёв лемсэ государственной университетэнь Медицинской институтонь васенце курсонь студентэкс.

– Мединститутсо васенце занятиясь – ломанень анатомиясь – теевсь сехте вечкевиксэкс. Сонзэ ветясь Виктор Александрович Сорокин – ломань, кие алкукс вечксь предметэнзэ ды маштсь минек эйсэ кирвазтемс ломанень анатомиянтень вечкемань толонть. Те предметэнть коряс савсь тонавтнемс пек ламо. Виктор Александрович маштсь толковамо истя парсте ды шождасто, весе минь седейшкава училинек сонзэ занятиятнень. Неть содамочитне монень пек эрявить важодемань эрьва минутасто, секс ёвтан покш сюкпря тонавтыцям туртов.

Тонавтнемань иетнеде мейле васня важодсь анестезиологиянь-реанимациянь врачонь специальностенть коряс, шкань ютазь, одс анокстамонь (переподготовкань) курсатнень ютамодо мейле, теевсь эштё ультразвуковой диагностикань врачокс. Истя, кавто иеде икеле Виталий Сергеевич ушодсь важодеме Республиканской ветеце номер клинической больницясо.

– Коллективенек эри покш ояксчисэ, кенярдовты, ламо од ломанть ютксонок важодить, – ёвтни В.С.Кузнецов. – Теке марто улить ветеранонок, ули кинь кедьстэ тонавтнемс, пурнамс опыт. А мезть сёпомс, васень шкасто аламо мезе маштынь тееме, секс ёвтан седейшкавань сюкпря весенень, кить тень лездасть. Сынь свал тень явсть шка, стака сэредицятнень вейсэ ванкшнынек. Ульнесть тень алкуксонь наставникекс.

Виталий Сергеевич истя жо сюкпрянь валт ёвты васенце тонавтыцянзо, ультразвуковой диагностикань врачтнень Н.В. Максимовань ды Е.М. Горбушкинань лемс. Нама, сонськак од специалистэсь бажи седе ламо содамс вечкевикс профессиянзо коряс. Нать, а стяко полады тонавтнеманзо Н.П.Огарёв лемсэ МГУ-нь аспирантурасо. Валонзо коряс, те сонензэ пек лезды наукасо весе одонть ды лезэвенть практикас нолдамосо. Чарькодеви, шумбрачинь ванкшноманть эйстэ ашти редяви-арась шкастонзо те эли тона ормась. Эдь васень шкасто сонзэ лангс ливтемась, сехте пек онкологиянь ормась, лиясто идесы ломаненть эрямонзо.

Виталий Сергеевич эштё од, валдо чачо, сельмс а эциця, стамбарнэ кортыця од цёра, сон чарькоди, кодамо покш ответственность путозь сонзэ лангс эрьва чинь тевсэнзэ, парсте соды, ков седе курок ды видестэ редяви ормась, сестэ седе ламо кемема вельми шумбрачинть витемантень. Текенень поладсынек, Виталий Сергеевичень низэ Оксана Ринатовна истя жо важоди теке больницясонть. Сон общей практикань врач. Мирдть-нить теевсть содавиксэкс эштё вузсо, вейке факультетсэ ды мик вейке группасо тонавтнемстэ. Кавонест од специалисттнэ бажить седейшкава важодемс вечкевикс тевсэст. Сынь уш нейке чарькодить, лиякс те тевсэнть а кода. Тешкстасынек, Екатерина Егоровна Василькина, В.С.Кузнецовонь сыре патязо, пинге важодсь медсестракс Дубенкабуень райбольницясо.

Валентина ЮДИНА
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».