Четверг, августа 06, 2020
Важное

«Урал» федеральной трассась таргавсь Москов ёндо Екатеринбург ды Челяба видьс. Сонзэ эзга ардомсто Пенза малав пачкодемстэ Кижеватовась кодаяк а менстяви. Посёлканть пачка кись таргави зярыя вайгельбес. Кижеватовакс те эрямо таркась кармась 1963 иестэ. Седе икеле сон кандтнесь Селикса лементь. Тесэ чачсь Советской Союзонь Героесь пограничной заставань начальникесь, мокшонь цёрась Андрей Митрофанович Кижеватов.
Зяро кинофильмат эйстэнзэ снимазь: «Брестская крепость», «Бессмертный гарнизон» ды ламо лият. Ульнесть шкат, зярдо неть кинофильматнень ваномо сакшныльть велень клубтнес веленек. Андрей Митрофанович Кижеватовонь подвигесь токась ламо ломанень седейть. 2010 иестэ прокатс лиснесь «Брестская крепость» кинофильмась. Андрей Митрофанович Кижеватовонь роленть налксесь содавикс артистэсь Андрей Мерзликин, конанень пек удалась невтемс Героенть оймеёжонзо, обуцянзо.

Феликс Эдмундович Дзержинский лемсэ Краснознамённой пограничной группань «Брест» пограничной заставась кандтни Советской Союзонь Героенть Андрей Митрофанович Кижеватовонь лементь. Сон чачсь 1907 иень августонь 20-це чистэ Пензань областень Пензань уездэнь Селикса велесэ. Военной службав тердезель 1929 иень ноябрянь 15-це чистэ. 7-це отдельной артиллерийской дивизионсо ульнесь младшей начсоставонь курсантокс. Мейле кучизь служамо пограничной войскас. Се шкане ломантнень тозонь пек кочксильть. Погранвойскасо служамонь васенце тарказо ульнесь Тимковичской заставась. Тей сон сась 1931 иестэ. 1940 иестэ Кижеватов ладязель 17-це Краснознамённой пограничной отрядонь 9-це заставань начальникекс.
Войнанть Кижеватов лейтенантось вастызе 1941 иень июнень 22-це чистэ. Эсь пограничниктнень марто сон ульнесь васенцетнень ютксо, кить стясть немецтнень каршо. Сонзэ солдаттнэ, кинень удалась кадовомс живстэ виев бойтнеде мейле, эсь командирдэст ледстнесть: «Те ломанесь пек паро, покш смелчи марто командир. Пек вечксы семиянзо». Од пограничниктне Кижеватовонь ловсть тетянь таркас.

Истя уш лиссь, 9-це погранзаставась ульнесь Брестской крепостьсэнть. Зярдо немецтне каявсть сонзэ лангс 1941 иень июнень 22-це чистэ, А.М. Кижеватов эзь талакадо, крепостень вейке участкасо тейсь виев оборона. Войнань васенце чистэнть Кижеватов эсь пограничниктнень марто котоксть ёртокшнызь немецтнень эсь позициятнестэ ды зняроксть жо сыргакшность контратакас. Июнень 23-це чинь веньперть немецтне яволявтокшность крепостень ванстыцятненень ультиматум. Кижеватов позициятнень ванстомо кадсь зярыя солдатт, сонсь жо седе ламо пограничниктнень марто саизь аватнень ды эйкакштнень крепостень подвалонь помещениятнес. Тосо лия командиртнэнь марто таго тейсть крепостенть виев оборона. Немецтне сыргасть атакас. Андрей Кижеватов сайсь мель стямс контратакас ды сеземс немецень позициятнень. Крепостень Тереспольской ортатнень вакссо сынь вастовсть фашисттнэнь марто. Уставась рукопашной тюрема. Вийтне ульнесть авейкеть. Савсь таго потамс крепостентень.

Од чись таго ушодовсь самолётсто бомбамотнестэ ды артобстрелтнэстэ. Бойтнесэ ранязь пограничниктне Кижеватовонь неильть свал васенцетнень ютксо. Зярдо боесь прядовсь, сон валгиль аватнень ды эйкакштнень юткс, эйсэст оймавтыль. Оятнень маштовомась ды немецень психологической атакатне эзизь синде лейтенантонть обуцянзо. Вейке виев атакадонть мейле Андрей Митрофанович Кижеватов таго валгсь эйкакштнень ды аватнень юткс. Сон парсте чарькодсь, бути азарсь немецтне тезэнь пачкодить, живстэ киньгак а кадыть. Эштё вейке виев атакадо мейле сон ёвтась мель, штобу тонатне ашо флаг марто лисевельть. Ламот мейле те меленть кувалма кадовсть живстэ. Крепостень ванстыцятне жо таго ветясть бой немецень покш вийтнень каршо. Эштё кавксть сынь сыргсесть атакас, штобу ёртомс фашисттнэнь крепостень кудостонть ды вейсэндявомс заставань Чивалгома ёнксонь пограничниктнень марто, конат истя жо леднесть немецтнень ланга. Те эзь удала, вийтне ульнесть авейкеть. Крепостень ванстыцятнень обуцяст синдемга немецтне тевс нолдакшнызь огнемёттнэнь ды химической газтнэнь. Секторонть, конань ванстсь Кижеватов эсь пограничниктнень марто, немецтне артиллериянть вельде калавтызь, ансяк каршо леднематне эзть лотка.

Июнень 29-це чистэ старшей лейтенантось Потапов пурнась ударной группа, кона сайсь мель сеземс немецень оборонанть ды пачкодемс эсенектненень. Пограничниктнестэ вейкесь кевкстизе Кижеватовонь: «Тынь минек марто, лейтенант ялгай?» Кижеватов отвечась: «А ков монень молемс. Тесэ минек заставанок, а мон сонзэ командирэсь», – саизе пулемётонть ды аравтызе амбразурантень.

Стакасто ранязь, А.М. Кижеватов зярыя пограничник марто кирдсь оборонанть. Июль ковонь васенце читнестэ Кижеватов лейтенантось ды зярыя пограничникть тусть понтонной сэденть сеземе, конань немецтне теекшнизь Буг леенть трокс. Те заданиянть топавтомсто 9-це погранзаставань начальникесь Андрей Кижеватов лейтенантось маштовсь. Крепостень казематтнэнь стенатнесэ кадовсть ламо сёрмадовкст тиринь масторонть вечкемадо.

1942 иень сёксня Брестской областень Великорита веленть маласо фашисттнэ леднизь Кижеватовонь семиянзо: аванзо Анастасия Ивановнань, козяйканзо Екатерина Ивановнань ды эйкакшонзо. Сынь ульнесть сетнень ютксо, кинь Кижеватов кучинзе лисеме. Арась мелем покордамс кодамояк раське, эрьва раськесэ улить паро ды берянь ломанть. Истя ульнесь тесэяк. Муевсть кой-кодамо нациянь прянь микшниця ломанть ды ёвтызь Кижеватовонь семиянть немецтненень. Теде а эряви сёпомс. Теде кортыть факттнэ. Ковель ошонть маласо килангсо теезь памятник-обелиск. Мемориалонь лазонть лангсо сёрмадозь: «Здесь покоится прах расстрелянной на территории Великоритского сельского Совета семьи Героя Советского Союза Андрея Митрофановича Кижеватова».

А.М. Кижеватов лейтенантонть подвигезэ апак редя эзь кадово. 1965 иень маень 6-це чинь СССР-нь Верховной Советэнь Президиумонть Указонзо коряс лейтенантонтень Андрей Митрофанович Кижеватовнень максозь Советской Союзонь Героень лемесь маштовомадо мейле. Седе икеле, 1958 иень маень 30-це чинь СССР-нь Министрань Советэнть постановлениянзо коряс Ф.Э. Дзержинский лемсэ Краснознамённой пограничной отрядонь «Брест» заставантень максозь Кижеватовонь лемесь. Теяк эштё а весе. Героенть лемсэ лемдезь оштнень ульцят. Истят улить Пенза, Брест ды лия оштнесэ. Ней сонзэ чачома таркась, Селиксась, лемдезь Кижеватовакс. Тиринь ёнкссо истя жо Героенть а стувтнить. Тесэнь школатнесэ сонензэ алтазь музейть, фотографиянь стендт. Истямо подвигесь а стувтови. Пограничникенть, Брестской крепостень ванстыцянть лейтенантонть Кижеватовонь лемесь таго эйсэнек кармавты марямс каштанчи тиринь масторонок кисэ. Минек туртов те пек паро невтема, кода эряви вечкемс тиринь масторонть ды аштемс сонзэ кисэ.

Николай ЕВДОКИМОВ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».