Суббота, октября 24, 2020
Важное


(Ушодксось газетань 46-це номерсэнть).
Коллективесь эри ялгаксчисэ, эйкакштнень туртов содамочитне максовить весе предметтнэнь коряс. Эрьва тонавтницясь пек учовикс, ды тонавтыцятне бажить максомс тензэ весе сень, мезе содыть. Эрзянь келень уроктнень уш ламо иеть вети Елена Николаевна Дорофеева. Сон тешксты, сынст эрзянь велесэ арасть истят семият, конатне молить эрзянь келень тонавтнеманть каршо. Украинасто сазь семиятнень эйкакштнеяк мельспаросо яксить уроктнес, налксить эрзянь кельсэ сценкатнесэ. Тень неинек эсенек сельмсэ, совсинек самай се шкастонть, зярдо тосо ютыль Тонавтыцянь чинтень алтазь мероприятия. Тешкстама, эйзэнзэ тердезельть аватнеяк, сырькайтнеяк, ды ламот эйстэст састь цецяпусмо марто, штобу каземс тонавтыцятнень туртов. Наталья Николаевна ёвтни, алкукскак, школасо вастовоматне теевсть весе велень кенярксчикс, эдь эйкакштне анокстыть спектаклят, эсь кедьсэ теевксэнь выставкат, ловныть эсест стихотворенияст.


Киштеме-морамо – Культурань кудов

Ташто Чамзась – уцяскав веле, 2006 иестэ тесэ строязель мазый, паро Культурань кудо, ды роботыцятнеяк тосо алкуксонь профессионалт, тевень содыця ават. Те культурань храмось ловови Покш Игнатбуень райононь ДК-нь башка подразделениякс. Прявтсонзо ламо иеть Наталья Владимировна Зайкина, художественной руководителесь – Альбина Валериановна Фролова. Культурань кудось а эрси чаво, тесэ панжозь морамонь кружокт эйкакштнень, одтнэнь ды сыретнень туртов. А кодат спектаклят налксить велень эрицятне! Кортамотнеяк мейле ансяк сындест. Интернетэнь тештекс теевсть, зярдо путызь «Любовь и голуби» фильмастонть сценканть, косо Раиса Захаровна сы инжекс Надюханень. Клубсонть кавто театральной кружокт: эйкакшонь – «Экспромт» ды покшонь – «Вдохновение». Покш Игнатовань районось, кода нетяно, те жанранть пек вечксы ды районсонть натой пелькстамоткак ютнить, косо велень театратне невтить эсест путовксост. Ташто Чамзань артисттнэ свал васенце таркатнесэ. Аволь ансяк морсеме, налксеме сакшныть эрицятне Культурань кудов, кортнеме-калярдомо, мелявкстнэнь-кеняркстнэнь ёвтнеме. Тесэ важодить «Сырнень шка» сыре ломанень клуб, «Килейне» фольклоронь ансамбля. Ансяк вана киштемс-морамс а мейсэ – концертэнь костюмтне умок уш таштомгадсть ды музыкань аппаратурантькак бу а берянь полавтомс – виест колонкатнень а пек покш, музыкань гайттне ёмить ломантнень шалтост потс.
Ламо мезе бу эштё можналь ёвтнемс те эрзянь кезэрень веледенть, ансяк седе паро ды виде карми, бути тиринь веледенть эсь мелест газетань лопантень кадсызь сынсь тосонь эрицятне.

Галина Астафеева, Ташто Чамза велень библиотекарь:

– Арсян, эрьва ломанентень эсензэ вишка тиринь ёнксозо неяви сехте мазыекс, вечкевиксэкс ды парокс. Истя моненьгак. Эрьва велень историянть теить сынсь велень эрицятне. А Ташто Чамзасо эрить пек паро ломанть: валдо ойметь, чевте седейть, ёроковт ды важодицят... Эрить тесэ весе ялгаксчисэ, вейкень-вейкень чарькодезь.
Монь важодема таркам – те эрьва чинь вастовомат ломань марто. Сакшныть велень библиотекав аволь ансяк литература мельга. Тесэ ютавтнетяно тематической вастовомат, чайде симемат, кортнемат-калярдомат. Велень библиотеканок, кона ашти Культурань кудосо, зярдояк а эрси чаво. Эрзянь кельсэ книгатнень туртов максынек сехте икельце тарканть. Сынь пек вечкевикст сыре ломантнень туртов, одтнэ, тынсь содатадо, пек книгас а правтыть. Ялатеке школань тонавтницятне сакшныть, вешнить эрявикс литература тонавтыцяст вешемаст кувалма.

Альбина Фролова ды Наталья Зайкина, Ташто Чамза велень Культурань кудонь важодицят:
 

– Минек веленть сюпав историязо. Сюлмавозь сон веленек вакска чудиця Пьяна лейненть марто. Сыре ломантне кортнить, тия ютасть Емельян Пугачёвонь эли, паряк, кодамояк рузонь князень войскатне, ды сынст минек веленть виртнень-лейтнень чиресэ изнинзе татаронь ханонь армиясь. Улить натой кезэрень сёрмадовксткак: «Повесть о побоище на реке Пьяне» лементь ало. Тувталось мейсэль? Келя, тесэнь эрзятне вадрясто симдизь-каванизь князенть ды сонзэ малавиксэнзэ. Сынь пировасть зярыя чить ды эзизь редя татаронь войсканть самонзо. Секскак мейле те таркасонть чудиця леенть лемдизь Пьянакс.
Омбоце версиясь Пьянань лемденть истямо: келя, чуди сон малав 400 вайгельбеть, кичкере ды менчевиця берёконзо молитькак иредезь ломанень обуцянть ёнов.
Марина Девятова. Покш Игнатбуень Ташто Чамза веле
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».