Воскресенье, марта 29, 2020
Важное


Пецясто Республикань Культурань кудосо ютавтовсь торжественной промкс, кона алтавсь РФ-нь Внутренней тевень органтнэсэ важодицянь чинтень. Лембе поздоровт пурнавозтненень ёвтась Мордовиянь Прявтось Владимир Волков. Сюкпрянь башка валт ёвтазельть отраслянь ветерантнэнь ды сетнень лемс, кить эрьва кодамо шкатнестэ кандсть эсь службаст «пси точкатнесэ», кить ванстсть минек масторонть вейкетьксчинзэ Северэнь Кавказсо.



– Ютазь ковсто боевой командировкасто велявтсь Мордовиянь полициянь сводной отрядось. Минек сотрудниктне панжсть малав комсь зыянов тевть, кундасть 25 ломанть, конатне вешневсть. Лоткавтозь аволь закононь коряс оружиянь, наркотикень, иредстиця симемапелень миемань сядот тевть. Те талновтыця регионсонть, Северэнь Кавказсо, тынк службань кандомантень путови сехте покш питне, – тешкстызе Мордовиянь Прявтось. – Течи ледстнетяно внутренней тевень органтнэсэ важодицятнень, конат максызь эсь эрямост сэтьмечинть кисэ. Сынст ине тевест свал седейсэнек, сынст семияст, тетяст-аваст, нист ды эйкакшост, ялгаст седейсэ!

Весе пурнавозтне ледстизь чавовозтнень чатьмонемань минутасо.
В.Д.Волков тешкстызе, оперативной тевтне Мордовиясо аштить свалшкань лувсо, вановт ало. Преступностень уровенесь республикасонть масторонь келес сехте алкинетнестэ вейкесь. Зыянов тевтнень панжомань невтевксэсь пек покш.

– Те иень кемень ковтнень перть кассь зыянов тевтнень редямось, – мерсь Владимир Волков. – Ламот эйстэст сюлмавозь экономиканть марто. Те аволь берянь. Меельце иетнестэ МВД-сь правань ванстомань лия структуратнень марто вейсэ вети виев важодема минек экономиканть, производстванть ды строительстванть, кредитэнь-финансонь системанть, жилищно-коммунальной хозяйстванть криминалонть ды коррупциянь схематнень эйстэ ванськавтоманть коряс.

Владимир Волков ёвтызе, Мордовиясо эрязасто топавтовить нацпроекттнэ, конатнень яволявтынзе Россиянь Президентэсь В.В.Путин. Тешкстызе: «федеральной бюджетстэ явовить покш ярмакт, ды миненек эряви пштистэ ваномс сынст видестэ тевс нолдамонть мельга».

Республикань Прявтось мерсь, ютазь иенть коряс закононь коламонь тевтне киртявсть 4%. Аламолгадсть чавомань ды тюремань тевтне, саламотне, нарьгамотне ды зыянов лия тевтне.
– Кардамат организованной преступностень вельмевтемань бажамотнень, покш мель явома правань коламонь профилактикантень, васняяк, од ломантнень ютксо, – толковизе Владимир Волков. – Тевесь стакалгавтови Интернетсэ од тандавтнематнень вельде.
Ёвтызе, а эряви лавшомгавтомс лия ёнкстнэнь коряс ваноманть – коррупциянть, экономикасо преступлениятнень, иредстиця симемапелень аволь легальной оборотонть, мошенничестванть ды ламо лия ёнкстнэнь коряс.

Владимир Волков тешкстызе, касы республикань эрицятнень кемемаст полициянь важодицятненень. Ломантне кемить, учить лезкс ды прявтось – лездыть полициянь важодицятненень.
– Ансяк тень лангс а эряви оймамс. Оперативной обстановкась веши полициянть пельде покш вийть. Эряви кемекстамс изнявкстнэнь, эрязасто решамс лисиця стакачитнень, – мерсь Владимир Волков. – Эсь ёндо республикась седе товгак карми весемесэ лездамо. Эрьва ие лездатано талновтыця кевкстематнесэ. Те важодемась поладови.
Поздоровонь валт пурнавозтненень кенярксчинть кувалма истя жо ёвтасть МР-ва Прявт федеральной инспекторось Михаил Сезганов, МР-нь Госсобраниянь Председателесь Владимир Чибиркин, МР-нь Внутренней тевень министрась Борис Шейнкин, МР-ва ФСБ-нь Управлениянь прявтось Андрей Акулинин, Саранскоень ды Мордовиянь Митрополитэсь Зиновий.

Татьяна ИКОННИКОВА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».