Важное

 

Эрзянь ды мокшонь раськень театрантень – 85 иеть 

Юбилеенть коряс театрасо ютась вастовома. Сакшность ламо инжеть, конат ёвтасть театрантень лембе валт.


– МР-нь Прявтонть В.Д.Волковонь пельде ёвтан тенк лембе валт юбилеенть кувалма! Путнеде од спектаклят, кадык кецнить ваныцятне, кадык сынь марить эсь пряст истя жо лембестэ, кода течи. 85 иеть – те покш история. Мельспаро, зярдо театрась ламо ардтни лия ошка ды невтни путовксонзо. Тедеде тынк ульнесть ламо гастрольть. Ардтниде Марий Элэв, Удмуртияв, Московов, Крымев. Театрась изнясь МР-нь Прявтонь грант. Ды, нама, Театрань иестэнть тесэ улить од путовкст ды мельстуиця проектт. Кадык седе товгак тесэ кармить ламо од спектаклят, – кортась МР-нь Правительствань Председателень полавтыцясь Галина Лотванова.
Кодамо кенярксчи казневтеме? «За заслуги перед Республикой Мордовия» медальсэ казевсь МР-нь народной артистэсь Виктор Гудожников. «Мордовия Республикань заслуженной артист» покш лемсэ казевсть Людмила Антипкина ды Андрей Кипайкин. Нама, ульнесть ламо лия казнетькак.
– Покш сюкпря те казненть кисэ! Сюкпря минек коллективентень ды режиссёртнэнень, конат саимизь налксеме путовкстнэсэ, сюкпря те сценантень, тесэ – минек ливезенек ды сельведенек, – кортась Андрей Кипайкин актёрось.
Весе инжетнень туртов невтезель од путовкс – В.Мишанинань «Куйгорож» спектаклясь. Сонзэ путыцязо – Россиянь ды Калмыкиянь искусствань заслуженной деятелесь Борис Манджиев. Сценографось – Анна Репина (Коми), хореографось – Рамиза Мухаметшина (Башкортостан). «Куйгорож» мокшонь ёвксонть коряс спектаклянть путомга РФ-нь Культурань министерствась макссь 3 млн. целковоень покшолмасо грант.
Куйгорож – мокшонь мифологиянь персонаж, пулыне марто покш пря корш, кона лиси алсто. Сон канды сюпавчи ды теи весементь, мезе кармавты ды мезе веши азорозо. Тевтеме а аштеви. Бути тев а максат – порксасы-яжасы весементь, мезе ули. Спектаклянь геройтне – Пята атя ды Сюмерьге низэ – пек бажасть парсте эрямс ды сюпалгадомс. Секскак Сюмерьге нарвизе алсто Куйгорожонь. Ды тесэ весе эрямост полавтовсь. Васня паро ёнов, мейле… Путовксось парсте сюлмави неень шканть ды ломантнень марто. Невти минек асатыкстнэнь, кармавты арсеме.


Вадрясто налксизе Пята атянь роленть Дмитрий Мишечкин. Сонзэ нинть – Елена Гудожникова. Куйгорожонь – од актёрось Антон Саранкин, кона аволь умок сась важодеме театрав. Эсь героензэ вельде сон кода пейдевтинзе ваныцятнень, истя жо тандавтынзеяк. Сцена лангс эрьва лисемазо ульнесь лия ёнов а молиця. Путовксось виев, мельстуиця, конань эряви ваномс!
Кода уш тешкстынек, Нацтеатрась меельце шкасто ламо ардтни гастрольга ды невти прянзо эрьва кодамо фестивальсэ. Истя, сынь ульнесть «Русский остров» фестивальсэ, Московонь историко-этнографической театрасо невтизь К.Петровань «Ташто койсэ» путовксонть. Тосо сынь тешкставсть кавто номинациява: «Драмань ды музыкань сехте паро сюлмавома» ды «Сехте вадря сценической костюм».
Мейле артисттнэ якасть Крымев, косо ютась «Крымская театральная осень» раськень театратнень фестивалесь. Сынь невтизь И.Тургеневень «Вешние воды» спектаклянть.
Седе тов Чебоксары ошсо «Волжская сказка» раськень театратнень фестивальсэ невтезель В.Мишанинань «Курмай» музыкальной ёвксось.
Эрьва ие Эрзянь ды мокшонь национальной театранть учить Самарань ёнкссо. Тольятти ды Жигулёвск оштнесэ ютасть гастролест. Сынст ваномо сакшныть тосо эриця эрзятне ды мокшотне.
Ноябрянь 28-30-це читнестэ минек артисттнэ содавтсызь Иванова ёнксонь Кинешма ошонть. Ваныцятнень учить колмо комедият. Теке жо шкане Кинешмань театрась сы гастролев Саранскоев.

Татьяна Маторкина

фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».