Среда, июня 03, 2020
Важное


ТАТЬЯНА ТУМАЙКИНАНЬ СОЦИАЛЬНОЙ СЕТЬСЭ ЛОПАСОНЗО МЕЗТЬ АНСЯК А НЕЯТ. ВАНА ЭЖНИ ЛЕМБЕ ЧИНТЬ АЛО АШОДОЯК АШО ПСАКАЗО, МУРНЫЦЯСЬ ВАНЫ КУДОСО ЭРИЦЯ МЕТЬКАЗТНЭНЬ ЛАНГС. ВАРШТАВКСОНЗО КОРЯС А ЧАРЬКОДЕВИ: КУНДАВЛИНЗЕ ЭЛИ ПЕЛИ ЭЙСТЭСТ? ЛИЯ ФОТОТНЕСЭ ТЕЙТЕРЕСЬ УШОСО ЯКСИ МАЗЫЙДЕЯК МАЗЫЙ КИСКА МАРТО, СОНГАК АШО. КИСКАНТЬ УШ СОДАСЫЗЬ ОШОНЬ КУНШКАКУРОСО МАЛАВ ВЕСЕ ЭРИЦЯТНЕ.



Вишкапингстэ саезь Татьяна пек вечксь кудонь ракшат. Кудосост свал ульнесть псакат. Мейле сон кирдсь чеернеть. Ансяк сынь эрить аволь кувать, 2,5 – 3 иеть. Ней тейтеренть ули Люцифер псаказо, калонзо, сакало марто агамазо ды йеменэнь хамелеонозо (лиякс меремс, метьказт). Ламот кирдить кудосо кискат, псакат, а вана метьказт! Кода кирдемс метьказт кудосо, кода сынь ветить пряст ды мезде андомс? Теде тенек ёвтни Татьяна:

– Мон кувать арсинь, кирдемс-а кирдемс кудосо метьказт. Неть ракшинетне лия ёнов а молицят, превейть. Минек ошсо аволь шожда муемс сынст туртов ярсамопель. Метьказтнэ ярсыть унжадо. Цирькунтнэнь, таракантнэнь ды лия унжатнень пек питнейстэ микшнить ансяк вейке-кавто зоолавкатнесэ. Ялгам лездась тень: тейсь террариум, косо самай эрить метьказтнэ. Ультрафиолет марто лампатнень раминь Интернет вельде. Неть рептилиятнень туртов мезе эряви? Температура, ультрафиолет, витаминт ды паро ярсамопель. Бути весе теемс видестэ, метьказось пек куроксто касы! Васня рамия Яша метьказонть.

Омбоценть коряс эзинь арсеяк, нупалем вишкине. Мейле неинь яволявтома, косо микшнесть йеменэнь хамелеон. Зярыя ковонь перть ванынь яволявтоманть мельга. Монсь пряван арсинь, козо путомс эштё вейке террариумонть, зяро унжат эрявить кавонест андомс. Истя жо ловнынь сындест ламо информация. Эзинь цидярдо, рамия Парагононь (эштё вейке лемезэ Гошка). Васняяк сон вешксь ды автниль кургонзо, кода мон сылинь террариумонть ваксс. Ней мездеяк апак пеле моли кедезэнь. Авань марто прянзо вети лиякс. Парагон пувави, тюсозо тееви валдокс ды сёрмав, пулонзо мендясы спиралекс. Истя сон прок ёвты – «те таркась монь, мон покш ды тандавтыця». Мейле редясы, сондензэ кияк а пели, сеске полавтсы ёжонзо, моли кенкшкенть малас ды венсти кеднензэ. Бути панжомс кенкшенть – кузи лавтов лангс ды бажи куземс пряс. Аволь умок карминь нолдтнемензэ кудова якамо. Путан стул, сонзэ кувалт валги кияксос. Ды якси кудова. Зярдо кельми, кузи мекев террариумс лампа алов.

Рептилиятне – ракшатне ламонь а вешицят. Кодаткак стакачить мартост арасть, бути парсте мельгаст якамс ды андомс, сэредить чуросто, аллергияст а эрси. Кудосо эриця метьказтнэ эрить сисемшка иеть. Малав весе шкаст ютавтыть лампа ало валдосонть ды лембесэнть. Лиясто ушодыть вешнеме эстест ят, сакалост раужкадыть, чамабокатне пувавить ды прясост кавто ёнов кайсить. Агамась машты укшномояк, недлязонзо весть экшелян эйсэнзэ ваннасо. Хамелеоноськак лиясто сырги охотав. Сельмензэ те шкане чарыть-ваныть эрьва ёнов. Весе ёжост чарькодеви! Хамелеононть тюсозо полавтови ёжонзо ды бажамонзо невтемстэ. Кавто атякат террариумсо а кирдить.

– Татьяна, мезе мерят сетненень, кить арсить кирдемс кудосо метьказт?

– Сетне, кинь арась ламо юткошкаст, илядо сае. Рамамс метьказ ды путомс террариумс – те вейке тев. Эряви свал ваномс мельгаст, максомс витаминт ды кальций, шкастонзо полавтомс ультрафиолетэнь лампатнень, кочкамс-муемс паро андомапель.
– Кода тень лангс ваны Люцифер псакась? А панси мельгаст?
– Метьказтнэнь нолдамсто аштетяно вакссост. Псакась моли малазост, никсесынзе ды туи ве ёнов. А вана ялгань кискась сы инжекс, озы террариумонть ваксс ды пштистэ ваны «Ящерт-тв», сонсь келензэяк ливтьсы.

– Те кискась аволь тонь?

– Тевесь вана мейсэ. Самоед породань Юша кисканть содаса, зярдо сон эштё ульнесь левкскекс. Сонзэ азораванть марто эрятано шабрацек, тонавтнинек вейсэ ды важодтяно ве таркасо. Мон алтынь тенст лездамс дрессировканть ды ушова якамонть марто. Ды вана уш котоце ие чокшне ланга Юшань марто чийнетяно ушова, лиясто ардтнян мартост ветклиникав, тонавтнетяно трюкт. Азоравазо парсте тонавтызе Юшань. Сон сэтьме, чевте седей ды кунсолы азораванзо. Дрессировкась ды тонавтомась – те кавто ёнкст. Командатнень тонавтомась те кисканть марто – покш важодема, седеяк пек пряудемензэ туртов. Сонзэ эряви тонавтомс ломань ютксо прянзо ветямо, зярдо кодамояк команда арась. Невтемс налксемань правилатнень ды максомс тензэ чарькодемс, кода ветямс прянть те эли тона шкастонть. Тесэ азоронтень эряви покш самодисциплина ды важодемасо мельга-мельцек тевень теема. Бути тонавтомс, кискась зярдояк а карми мезть понгсь мода лангсто кочксеме. Юшань поназо тусто, покш ды чевте. Мейс ёмавтомс понанть? Васня штердинь эйсэнзэ электропрялкасо, мейле – штересэ.
Эряви меремс, тейтерьавась яви мель кодамонтень, сутажонь викшнемантень, арты мазый вакант (точечная роспись). Од иенень ламо артсь кузонь мазылгавтома шарикть. Дивавтыть мазычисэст сутажонь викшнемань брошкатне. Весе сынь улить сонзэ социальной сетень лопасонзо. Артозь вакантнэнь кази ялгатнень ды малавикстнэнь туртов, кинь ули мелезэ рамамс – мии.

Татьяна чачсь Саранскойсэ. Тонавтнесь ошонь 20-це номер школасо. Вейксэ иестэ саезь яксесь Республиканской хореографической школав. Покш классо тонавтнемстэ яксесь школань театрань студияв. Пек вечксь мелодекламациянть. Музыка марто ловнось стихть. Аволь весть ульнесь школань концертэнь ветицякс. Нейгак мельспаросо ледстни, кода А.А.Ульянов режиссёронть марто путнесть рузонь ды немецень кельсэ спектакля. Сонзэ анокстасть иень перть. Немецень келесь Татьянань туртов эзь маряво стакакс, сон тензэ максовсь шождасто. Те предметэнть коряс тейтересь изнякшнось ды лиснесь призёрокс школань ды республикань олимпиадатнесэ.

Школань прядомадо мейле тонавтнесь Н.П.Огарёв лемсэ МГУ-нь омбо масторонь келень факультетсэ переводческой отделениясо. Кельстэ кельс ютавтыцякс эзь карма. Вуздо мейле кавто иеть важодсь немецень келень тонавтыцякс. Седе тов поладызе сынст семиянь коенть – мольсь важодеме «Электровыпрямитель» заводов. Эсь шкасто тосо важодсть покштязо, бабазо ды авазо. Татьянань саизь заводонь газетань корреспондентэкс. Зярыя иень ютазь ладизь редакторокс. Ней сон «Электровыпрямитель» ПАО-нь информационной службань прявт.

Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».