Виктор Гаунин «Тепличное» АО-со важоди ютазь пингень 1994 иестэнть саезь. Сась, ды кода кортыть, муизе эсь тарканзо. Кода васенце чистэнть саезь озавтызь тракторонь руль экшс, течинь чис те тевсэнть, роботы трактористэкс.

В.Г.Гаунинэнь чачома тарказо – Чаунза ёнксонь Мокшалей велесь. Прядсь школа, ютась служба Забайкальянь пограничной войскасо. Цёранть весе эйкакшпоразо, кода ламот велень цёрынькатненьгак, ютась паксясо. Сынь ульнесть трактористтнэнь ды комбайнёртнэнь васень лездыцят. Секскак, паряк, армиясто велявтомадо мейле кувать эзь арсе: ков молемс тонавтнеме седе тов? Кочкизе Кемлянь совхозонть-техникумонть. Кармась тонавтнеме механикень специальностентень. Те тевенть содылизе парсте, секскак кодаткак талномат арасельть. Сонзэ прядомадо мейле тонавтнема шкасто пурназь содамочитнень варчинзе тевсэ, кармась важодеме механикекс эсест колхозсо. Ютась зярыя шка, од цёрась арсесь-тейсь ды тусь эрямо Саранск ошов.
– Тесэ савсь варчамс эрьва кодамо профессият. Ульнинь машинань ветицякс, военной базасо ванстыцякс ды ламо мезекс лиякс, – ёвтни Виктор Григорьевич. – 1994 иестэ сынь тей, «Тепличное» АО-в, карминь роботамо тракторсо. Монь тевем – эмеж марто контейнертнэнь пачтямс складов. Роботась пек тукшны мелезэнь. Коллективенек вадря, чарькодиця, эрьва тевсэ вейке-вейкенень лездыця. Трактортнэ одт, неень шкань. Истямонть экшсэ роботамс арасть кодаткак стакачить, мерят, тарказот весе сонсь теи. Паряк, тень коряскак важодема таркав эрьва чи сан покш мельсэ, – кемекстызе Виктор Гаунин.

Юлия ЕРЕМИНА
Фототне: Эдуард Ретунский