Важное

 

Ацамковонь 23-це чистэ Саранскоень Изнямонь площадьсэ ютавтовсь мероприятия, конань лувсо республикань зярыя школатненень ды больницятненень максовсть эйкакштнень усксемс од автобуст ды медицинань куроконь лезксэнь максомань автомобильть. Транспортонтень панжоматнень явшесь Мордовиянь Прявтось Владимир Волков.



– Истят мероприятиятне минек республикасо теевсть паро коекс, – мерсь Владимир Волков. – Меельце вете иетнень перть Мордовиясо рамазь 180 ламо автобуст школатнень туртов ды 80 медицинань куроконь лезксэнь максомань машинат. Ды теньсэ покш лезксэзэ масторонь Президентэнть В.В.Путинэнь.

Эряви тешкстамс, од автобустнэ ды автомобильтне рамавсть «Образование» ды «Здравоохранение» нацпроекттнэнь топавтомга. Истя, неень шкане республикасонть важодить общеобразовательной 314 организацият, 149-сэ эйстэст эйкакштнень школав ды школасто усксить автобуссо. 2019 иень таштамковонь 1-це чистэнть саезь школань маршруттнэва важодить 239 транспортонь единицат, конатне усксить 4235 тонавтницят. Ней автопаркось топавтовсь 36 од автобуссо. Сисемтне тевс нолдавить од маршруттнэва, 29 полавтсызь сеть автобустнэнь, конат ардтнить уш кеменде ламо иеть.

– Автобустнэде башка «Успех каждого ребёнка» федеральной проектэнть лувсо Мордовиянтень явозь передвижной комплекс, кона карми важодеме «Кванториум» эйкакшонь технопарконь мобильной лабораториякс. Сон топавтозь неень шкань весе эрявикс оборудованиясонть ды карми пек лезэвекс эйкакштнень содамочист кастоманть туртов, – мерсь Владимир Волков.

Истя жо Мордовиянтень рамазь медицинань куроконь лезксэнь максомань туртов 16 автомобильть. Сынь явшевсть республикань районтнэсэ больницятнень юткова, зярыя машинат максовсть Саранск ошонь медицинань куроконь лезксэнь максомань станциянтень ды республикань эйкакшонь больницянтень.
Мероприятиясонть истя жо ульнесь РФ-нь Государственной Думань депутатось Василий Пискарёв.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».