Октябрянь меельце читнестэ Московсо ютась Россиянь Журналистэнь союзонь XIII съездэсь, козонь сакшность 300 ламо делегатт. Минек республикасто тов кочказельть Мордовиянь Журналистэнь союзонь прявтось, «Рузаевские новости» медиахолдингень прявт редакторось Людмила Резяпкина, «Известия Мордовии» ды «Эрзянь правда» газетатнень прявт редактортнэ Олег Каштанов ды Марина Девятова.

 СЖР-нь прявтось Владимир Соловьев эсь докладсонзо ёвтнесь сеть тевтнеде, конатне топавтозельть вете иетнень перть. Васняяк тешкстызе, Россиянь Журналистэнь союзс совасть од региональной отделеният ДНР-стэ, ЛНР-стэ, Херсононь ды Запорожской областтнестэ.

Неть иетнестэ кармась максовомо «Россиянь заслуженной журналист» почетной од звания. Сеть журналисттнэнень, конатне роботыть «пси таркатнесэ», тееви страховка, сынст туртов анокстазель эрямонь ванстомань коряс тонавтомань башка программа. Съездэсь ве мельсэ кирдизе СЖР-нть мелензэ макснемс военной конфликтэнь зонасо важодиця журналисттнэнень «Участник боевых действий» лементь. Ламо лезкс максозель СМИ-тненень коронавирусонь эпидемиянть шкасто. СЖР-сь панжсь образовательной од формат – Инфорум. Вете иес ютавтозь 50 ламо тонавтомань семинарт Россиянь зярыя регионтнэсэ.

Съездэнть шкасто пурназель СЖР-нь од составось. Ве мельсэ прявтокс кочказель таго Владимир Соловьев. Истя жо пурназельть секретариатось, Федеративной советэсь, Контрольной комиссиясь. Покш жюринть центральной коллегиянь прявтокс пурназь Алексей Вишневецкий. СЖР-нь почетной председателекс кармась Всеволод Богданов.
Съездэнть роботамонзо коряс яволявтозель резолюция.

Марина ДЕВЯТОВА