Сон ютавтови республикань весе районтнэсэ ды Саранск ошсо. Саранскойсэ акциясь юты Светотехстройсэ Веденяпинтнэнь лемсэ бульварсонть, Химмашсо - Изнямонь парксонть, ошонь Ленинской парксонть, Саранка леенть чиресэ. 

Рузаевкасо весень учить Машиностроительтнень аллеясонть, Горшковонь бульварсонть ды Юрсовонь ульцясонть.

Лия районтнэсэ суботниктне ютавтовить парктнесэ ды общественной таркатнесэ.

Эряви ёвтамс, весе неть таркатне одкстомтозь-вадрялгавтозь “Жильё и городская среда” нацпроектэнь “Формирование комфортной городской среды” федеральной проектэнть юрсо. 

Субботниктне учовить аволь ансяк лезэвть, истя жо мелень кепетицят. Арсевить экологиянь акцият, интерактивной площадкатнень важодемат, пелькстамот. 

Весе таркатнесэ течи важодить волонтёрт. Сынь ёвтнить, кодат территориятнень вадрялгавтоманть кисэ моли вайгелень максома. Ды те тевсэнть лездыть эрьвантень. Вайгеленть мереви максомс 13.gorodsreda.ru сайтсонть.

Бути жо тынк а лисси молемс ёвтазь таркатнес, ванськавтынк шукшонть эйстэ эсь кудотнень перька таркатнень, ютадо маласо ульцяванть, озавтодо цецят эли чувтт. Те карми тынк путовксонк вейсэнь тевсэнть.

Минь жо содавтынек Изнямонь парконть. Субботникесь тосо ушодовсь валскень 9 чассо. Кода ёвтнесь Саранск ошонь Октябрьской райононь администрациянь прявтонь васенце полавтыцясь Фёдор Тишкин, Изнямонь парконть ды перьканзо тарканть ванськавтомо течи састь райононь администрациянь ды Управляющей компаниятнень   важодицятне, волонтёртнэ.

Минь важодтяно ошонь эрицятнень ды инжетнень туртов, штобу сынст перька улевель ваньксчи ды мазычи, - мерсь Фёдор Тишкин.