Пятница, августа 14, 2020
Важное

Массовой информациянь средстватнесэ ды периодической изданиятнесэ ламо ёвтневи Ине Отечественной войнадонть, конань прядовомань ды Изнямонь 75 иетне кармить тешкставомо те иестэнть.
Войнань иетнень перть Мордовиясто Советской Союзонь Героекс лиссть 124 ломанть. Ютксост Ромодановасто Михаил Петрович БОРОНИНГАК.


Самай сондензэ ули мелем ёвтнемс «Эрзянь правдань» ловныцятненень. Те ломанденть ламо марсекшнинь эштё общеобразовательной школасо тонавтнемстэ, а вана сонзэ эйкакшпорадонть ды подвигтензэ карминь содамо седе мейле, зярдо роботынь «Победа» Ромодановань райононь газетасо. Теде тень ёвтнекшнесь роботыця оям В.Ф.Зинченков.

Владимир Фёдорович ульнесь пек паро поэтэкс, сёрмалесь ёвтнемат, очеркть. Од журналисттнэнень сон ульнесь пек паро тонавтыцякс. Монень сон ледстневи кода ёвтнемань паро сёрмадыцякс. Самай сонзэ пельде карминь содамо М.П.Боронинэнь од порадонзо.

Михаил Петрович чачсь 1914 иестэ Ромодановань райононь Торбеевка велесэ. Ней те велинесь Ромодановань посёлкань Набережной лемсэ ульця. Семияст покшоль. Кавксо эйкакштнестэ Миша сехте покшоль. Михаил Боронин ды Владимир Зинченков школасо тонавтнемстэ ульнесть оякс: кизна вейсэ яксильть экшелямо Инсар леев, тельня кирякстнильть сокссо. Цёрынетне свал шныльть пряст эсь теевкстнэсэ, невтнильть смелчист. Сеедьстэ тейнильть турнирт, кие сокс лангсо киряксты сехте крута пандостонть. Пелькстыльть конькасояк. Тесэ Михаил Боронин мельга кияк а кенериль. Весемеде башка Миша Боронин пек вечкиль книгань ловномо. Мезе ды мезде ловнось, сон свал ёвтниль оянстэнь. Перьканзо свал ульнесть кунсолыцят.

Сисем класстнэнь прядомадо мейле сон кавто иень перть тонавтнесь Саранскоень велень хозяйствань училищасо. 17 иесэ Михаил Боронин кармась землеустроителень лездыцякс. Те ульнесь 1931 иестэ. Самай те шкастонть теевсть ламо колхозтнэ. Паксятнень кармасть сокамо тракторсо. Од цёранть мельсэ ульнесть ламо тешкст. Сехте покш мелесь – улемс сталеварокс. Тень ловозь, мольсь тонавтнеме С.М.Киров лемсэ Уральской политехнической институтов, конань прядызе 1938 иестэ. Кучизь роботамо Алпатьевской металлургической заводов. Роботась 1941 иес. Од цёрантень макссть отпуск, ды сон сась тиринь велев. Оймсемс эзь саво, макссть повестка ды саизь армияв.
Ине Отечественной войнанть ушодовомадо икеле Михаил Петрович Боронин Ленинградсоль. Военно-морской авиациянь частесь, косо сон служась, понгсь расформированияс. Од цёрась таго понгсь тиринь ёнксов. Саранскойсэ сон прядсь лётной школа ды получизе штурманонь специальностенть.

Ине Отечественной войнань фронтов Михаил Петрович понгсь 1942 иень сентябрясто. Васняяк участвовась бойтнесэ Одессанть ды Севастополенть кис, мейле од лейтенантонть Боронинэнь кучизь Карельской фронтов Северной флотонь военно-воздушной вийтнес. Понгсь иневедень бомбардировочной авиациянь полконь гвардиянь лейтенантонть Николай Зайцевень экипажс. Боевой заданиятнесэ а весть ваявтнесть ятонь кораблятнень. Нурька шкас сынст экипаждонть кармасть содамо фронтонть келес.

Боевой ливтямотне эрсильть чизэнзэ ламоксть. Лётчиктне тюрсть прянь апак вансто. Экипажось, косо ульнесь М.П.Боронин лейтенантось, ваявтсь вете сторожевой катерт ды фашистэнь покш корабля. Боронинэнь апелемачись тешкстазель Якстере Знамянь кавто орденсэ ды Отечественной войнань омбоце степенень орденсэ.
Покш смелчинть кис 1944 иень февралень 22-це чинь СССР-нь Верховной Советэнть Указонзо коряс М.П.Борониннэнь максозь Советской Союзонь Героень лемесь.

Истямо событиядонть мейле Героесь сакшнось тиринь ёнксов, мейле таго фронтов. Малавикстнэнь марто те ульнесь меельце вастовома. Мелезэст сон кадовсь истямокс, кодамокс неизь меельцеде. Михаил Петровичнень эзь саво пачкодемс Изнямонь чинтень. 1944 иень маень 25-це чистэ сонзэ экипажось ваявтсь эштё вейке немецень судна. Те шкастонть зениткань снарядось понгсь сонзэ самолётонтень. Сон кирвазсь ды прась иневедентень. Те ульнесь Норвегиянь берёктнень маласо. Экипажось маштовсь. Тесэ Михаил Петрович Боронинэнь боевой кизэ прядовсь, ансяк ледстнематне Геройденть зярдояк а стувтовить. Ромоданова посёлкань вейке ульцясь кандтни сонзэ лементь. Тонавтыцятне школань уроктнесэ сондензэ ды лия геройтнеде ёвтнить эйкакштненень. Истят примертнэ тонавтыть тиринь масторонть вечкеме.

А.ДАВЫДОВ,
Россиянь Журналистэнь союзонь член.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».