Вторник, марта 19, 2024
Важное


Республикань агропромышленной комплекссэ важодицятне течи кецить эсь важодемаст кувалма. Ды кода а кецямс?! Тедеде сынь сайсть 1 миллион тоннадо ламо сюро. А мезть сёпомс, теньсэ покш таликаст республикань весе районтнэнь велень хозяйствань предприятиятнень.

Отяжелень райононть лемдить «Мордовиянь Кубанекс». Алкукскак, тесэ модатне пек вадрят! Аволь кевевть-сёвоневть, мезесь вастневи лия районтнэсэ. Тедеде тесэнь трудий ломантне пивсэсть сядодо ламо тёжат тоннат сюро, эрьва гектарсто саезь малав колоньгемень центнерт. Райононь велень хозяйствань предприятиятнестэ уш аволь васенце ие весемеде ламо сюро сайни «Сабанчеевское» велень хозяйствань предприятиясь. Сон сеть велень хозяйствань предприятиятнень ютксо, конатнень лангсто, Мордовия Республикань Прявтонть В.Д.Волковонь валонзо коряс, эряви саемс пример, тонавтнема весе аграрийтненень, штобу республикаванть саемс гектарсто 40 центнерт сюро ды эрьва иестэ пурнамс 1 миллион 500 тоннат сюро, вете иень ютазь сюронь саеманть пачтямс кавто миллионт тоннас.

Неть читнестэ ульнинек «Сабанчеевское» велень хозяйствань предприятиясо, конань прявтсо МР-нь Славань III степенень орденэнь кавалерэсь, МР-нь Государственной премиянь лауреатось, МР-нь велень хозяйствань заслуженной роботникесь Д.Н.ИГУШКИН.
Д.Н.Игушкин – велень хозяйствань алкуксонь прявт. Сон весе эрямонзо алтызе велень хозяйствантень. Дмитрий Николаевич весементь теи, штобу Сабанцелесэ, Дюрькинасо, Таразбуесэ, Алашеевкасо, Аловелесэ, конат совить «Сабанчеевское» велень хозяйствань предприятиянтень, эрямось вадрялгадоволь, шождалгадоволь. Тесэ строявить скалонь фермат, социальной объектт. Вана Сабанцелесэ допрок витнезь-петнезь Культурань кудось, косо эсь юткошкаст лезэвстэ ютавтнить велень трудий ломантне.

Культурань кудонть вакссо строязь церькова, конань кенкшензэ пекстазь а эрсить. Эйстэнзэ аволь васоло теезь аллея, косо аштить озамо таркат, чокшне ланга аллеясонть палыть лампочкат. Ине Отечественной войнасо маштовозтнень ледстнемга тесэ аравтозь БМП (пехотань боевой машина).
«Сабанчеевское» ООО-нь аграрийтне мельспаросот: тедеде сынь пурнасть-пивсэсть 17 тёжат тоннат сюро, эрьва гектарсто саезь 35 центнерт. Сынь республикасонть сехте вадрятнень ютксот!
Тесэ а кода а ледстямс велень хозяйствань предприятиянь комбайнертнэнь, кить виень апак жаля важодсть сюронь урядамсто. Неть: А.М.Бакшайкин, Ю.А.Учеваткин, А.Ю.Аньчков, Н.Д.Кажаев, М.И.Тихонов, В.П.Учеваткин. Вана Н.В.Козин – шофер. Ускси эйкакшт. Сюронь урядамонь шкасто ойси комбайнань руль экшс. Весемеде ламо сюро – тёжадо ламо центнерт – пивсэсь А.М.Бакшайкин.
Мелят Отяжелень Аграрной техникумсо тонавтницясь Виктор Учеваткин сюронь урядамсто важодсь комбайнеронь лездыцякс. Тедеде сонсь витнизе хозяйствань умонь комбайнанть ды лиссь сюронь урядамо. Цёрась овсе эзь кадново хозяйствань умонь комбайнертнэнь эйстэ. Пивсэсь зярыя тоннат сюро.
Сюронь урядамсто истя жо виевстэ важодсть ялакстнэ Александр ды Артем Орловтне. Те пси шкастонть паксяв лиснесть кемголмово комбайнат.

«Сабанчеевское» велень хозяйствань предприятиянь прявтонть Д.Н.Игушкинэнь валонзо коряс, хозяйствасонть эрьва иестэ сюротнень алов явови вете тёжадо ламо гектарт мода. Зняро жо явозель тедедеяк.
Ломантне кортыть: «Мезе видят, сень саят». «Сабанчеевское» ООО-со тень чарькодить. Секскак тесэ покш мель явови видьмекстнэнень. Кода икелеяк, сынь ульнесть элитнойть, истя жо васенце ды омбоце репродукциянь.

– Минь кеме юр путынек сы иень урожаенть алов, – ёвтни «Сабанчеевское» велень хозяйствань предприятиянь прявт агрономось В.С.Кочурина. – Кавто тёжадо ламо гектарт видинек озимойть. Те тевенть топавтынек шкастонзо, кодамояк стакачинь апак сода. Видицятне – Владимир Учеваткин, Сергей Фадеев, Николай Иневаткин. Сынь важодсть виевстэ ды парсте. Мельгаст ваномс эзь саво.
Вера Сергеевна «Сабанчеевское» ООО-со прявт агрономонь тевенть топавты колмо иеть. 2008 иестэ Н.П.Огарёв лемсэ МГУ-нь Аграрной институтонть прядомадо мейле сась эрямо Отяжелень районов. Зярыя иеть важодсь Отяжелень райононь Администрациянь велень хозяйствань управлениясо.

Содазь, малав эрьванть эрямосо улить истят ломанть, конат лездасть эрямонь васенце эскелькстнэнь теемасо, кочказь тевенть тонавтнемстэ. Вера Сергеевна Кочурина истямокс лови «Сабанчеевское» ООО-нь икелень прявт агрономонть Ф.М.Константиновонь.
– Фёдор Михайлович ульнесь эсь тевень алкуксонь специалистэкс, – ледстни Вера Сергеевна. – Сон ней ютксонок арась. Мартонзо важодинь кавто иеть. Нама, аволь ламо, ансяк пельдензэ ламос тонадынь. Тонавтнинь весе паксятнень: косо седе ламо саеви сюро, ламбамо якстерькай. Кель-вал муинь важодицятнень марто. Минек тевсэнть те – сехте паро ёнкс.

Течияк «Сабанчеевское» ООО-нь важодицятне а содыть оймамо. Паксятнестэ виевстэ моли ламбамо якстерькаень ускомась.
– Те культуранть алов явозель 2300 гектарт мода, – ёвтни хозяйствань прявт агрономось В.С.Кочурина. – Ламбамо якстерькаенть таргинек весе. Эрьва гектарсто саинек 475 центнерт. Ней сон ильтяви «Ромодановосахар» предприятияв. Неень шкантень пачтязь 60 тоннат якстерькай. Арсематнень коряс, тов усковить 100 тёжат тоннат.
– Арсян, кастозенть усксызь шкастонзо. «Ромодановосахар» предприятиянь механизированной отрядось важоди виевстэ. Шканть а таргсить, – тешкстась В.С.Кочурина.

Тешкстасынек, Сабанцелесэ ламбамо якстерькаень кастыцятнестэ сехте вадрятнень ютксо трактористтнэ В.П.Федотов, А.М.Бакшайкин, В.М.Пшеничников, А.С.Туров, А.С.Чепухин, В.Д.Иневаткин.
Виктор Михайлович Пшеничников – Дюрькинань. Тесэнь средней школанть прядомадо мейле тонавтнесь Саранскоень электромеханической техникумсо, конань прядызе 1993 иестэ. Велявтсь тиринь велев. Сась Калинин лемсэ колхозонь правленияв, конань прявтсоль М.В.Слушкин.
– Михаил Васильевич вастымим лембестэ, – ёвтни В.М.Пшеничников. – Аравтымим васня полеводческой бригадань прявтокс. Тевенек мольсть вадрясто. Чинь норманть топавтнинек велькска. Трактористэнь тевенть тонавтния Пётр Петрович Палькинэнь пельде. МТЗ-121 тракторсонть паксятне видезельть бойкасто. «Плантер-2» сеялкатне вадрят, 18 рядсо. Видемань перть эзть яжавкшно.

Течияк В.М.Пшеничниковонь тракторозо тевсэ. Таразбуень паксятнестэ урядави ламбамо якстерькаесь. Ламбамо якстерькай марто ваиндеряй КамАЗ-сь, тесэ лездамо сы В.М.Пшеничниковонь тракторозо.
Течи «Сабанчеевское» велень хозяйствань предприятиянть мельспарозо – ловсонь комплексэсь, кона ашти Аловелесэ.
– Сонзэ строинек эсь ярмак лангс, ютавтынек 50 миллионт целковойть, – ёвтни «Сабанчеевское» ООО-нь прявтось Д.Н.Игушкин. – Строицятне – Отяжелень РСУ-нь важодицятне.

– Ловсонь комплексэсь, козонь совить кавто корпуст, 450 ракшас эйстэст 390 – потявтовицят, – ёвтни фермань прявтось Т.А.Турова. – Эйсэнзэ ули потявтомань зал – «MIKLINE», «Елочка» оборудованиянть марто эйсэнзэ сеске потявтовить 24 скалт, ули ловсонь кельмевтемка.
Татьяна Анатольевна тесэ важоди 2002 иестэ саезь. Васня ульнесь вазонь андыцякс, мейле зярыя иеть потявтсь скалт. 2009 иестэ саезь 2019 иенть самс важодсь осеменаторокс. 2019 иень июньстэ саезь – фермань прявт. Т.А.Турова тескень, Аловелень, вадрясто содасынзе велень эрицятнень, мартонзо важодицятнень, скалонь потявтыцятнень: Н.В.Вдовинань, Т.Н.Пантелейкинань, Г.И.Федуловань.
Фермань прявтонть Т.А.Туровань валонзо коряс, чистэ потявтыть 7 тоннат ловсо, эрьва скалсто саить 18 килограммат. Скалонь потявтыцятне важодить кавто сменасо.
Фермасонть ветеринарной фельдшерэнь тевенть топавты А.К.Федулова.
– Фермасо, паксясо тевтнень молемаст мельга кеместэ ваны Аловелень управляющеесь Александр Николаевич Камашев, – тешкстась фермань прявтось Т.А.Турова. – Ловсонть ильтятано «Сыродельный завод «Ичалковский» предприятияв.
Аловелесэ скалонь комплекссэ осеменаторокс важоди Татьяна Бухаркина. Сон чачсь-кассь Аловелесэ. Тесэ кемекстызе обуцянзо. Ней эри Сабанцелесэ. Аловелесэ Татьяна Ивановна важоди уш вете иеть. Сон парсте тонавтнизе осеменаторонь тевенть.

– Аволь умок Покш Березникень райононь Покш Березник велесэ ютавтозельть осеменаторонь курсат, конатнесэ кастынек те тевенть коряс содамочинек, – ёвтни Татьяна Ивановна. – Тосо тенек ловность лекцият, ёвтнесть ракшань искусственной осеменениядо. Курсатне мольсть колмо ковт. Сынь ютавтозельть МР-нь Велень хозяйствань ды продовольствиянь министерстванть ушодксонзо коряс.
– Татьяна Ивановна монь кеме нежем, – тешкстась ракшань комплексэнь прявтось Т.А.Турова. – Минек комплекссэнть ракшатне ламолгадыть ды теньсэ, нама, покш таликазо Т.И.Бухаркинань.
Те иень кемень ковс «Сабанчеевское» ООО-со потявтозь 7 тёжат тоннат ловсо, эрьва скалсто саезь 6200 килограммат, мезесь мелень теке шканть коряс седе ламо. Скалонь потявтыцятнень ютксо явовить Т.Н.Балыкова, Н.В.Вдовина, М.Д.Тикшайкина, Л.А.Сорокина, Н.П.Сидорова, вазонь андыцятне Н.Н.Кутулайкина, Н.Д.Учеваткина.
Тешкстасынек, «Сабанчеевское» велень хозяйствань предприятиясь эрьва иестэ велень хозяйствань продукция микшни малав 460 миллиононь питнес.
– Тедедеяк те цифрась а полавтови, – видькстась Дмитрий Николаевич. – Эдь велесь анды, симди…
Апак кавтолдо мертяно, мезе арсить теемс «Сабанчеевское» велень хозяйствань предприятиясо важодицятне, сень топавтсызь!

Пётр ЗИНОВЬЕВ,
Эдуард Ретунский
Отяжелень райононь
Сабанцеле, Аловеле
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».