Суббота, октября 31, 2020
Важное



«Вейсэнь промксов пурнавкшность...», - истямо валсо эсень материалон умок уш эзинь ушоле. Пандемиясь весень панинзе кудова. Ушов лисемскак пелят, аволь тосо ковгак васов сыргамс.

Вейсэнь промкстнэяк ютавтневить бути ансяк онлайн-форматсо. Тесэ апак учо гайневтсть тень Мордовия Республикань Культурань, национальной политикань ды архивень тевень министерствасто ды тердимизь вейсэнь промксов, кона карми улеме аволь Саранскойсэяк - Покш Березниксэ. Текень пес мерсть, промкстонть мейле тов молицятнень сайсызь Паракина велев. Каня, кирди седеесь а молемс? Те веледенть паро кулятне кува ансяк эзть срадо. Интернетэськак пешксе мазый фотосо, конанть лангсо «Коень Кудо» («Дом традиций») музеень экспонатт, сонзэ теицятне ды кирдицятне - «Парынза» морокуросо морыцятне. Телевизороськак секе тев пачтни тенек кулят седе, кода кулома лангс пачкодезь велесь одов вельмесь, эрямось эйсэнзэ лаказь кармась лакамо. Вейке тев ловномс, лия - эсеть сельмесэ неемс. Эстень икеле тов эзь саво пачкодемс, секс паро мельсэ вастыя тердеманть. 

Ды вана медьковонь (июлень) 24-це чистэ сыргинек ки лангов. Ардынек аволь вейке автобуссо, кода ульнекшнесь икеле. Ней озавтнимизь башка-башка машинава (эрьвасонть улест колмодо а седе ламо ломанть): те теезель коронавирусонть эйстэ прянь ванстомга. Чамакст, сурварьгат - сетненьгак эзинек стувто тонгомс. 

Березникев ардомс аволь кувать - 50 вайгельпетнень ютамс паро машинантень пельчасошка эряви. Седеяк курококс килангось маряви кортнемстэ. «Юрхтава» мокшонь авань вейсэндявксонь прявтонь полавтыцянть Вера Васильевна Цыбусова ды «Эрьмезь» чувто ланга керсицянь вейсэндявксонь прявтонть Петр Владимирович Рябов марто муинек, мезде кортамс. Ледстинек эрзянь сёрмадейтнень ды содыдейтнень леместкак, кить чачсть те буесэнть. Тесэнь эрзянь Найман велесэ чачсь Кузьма Григорьевич Абрамов, Шугурова велесэ - учёноесь, профессорось Василий Иванович Дёмин, Симкинасо - «Чилисема» журналонь прявт редакторось Николай Иванович Ишуткин. Нурькинестэ мерезь, Березникбуень эрзянь велетнестэ лиссть пек ламо превей ды ёроков ломанть. Ды арась кавтолдома, истямокс сынь кассть аволь ансяк тесэнь тантей коштто лексезь, мода алдо чавиця лисьмапрясто ванькс ведте симезь ды тескень паксятнень лангсо кастозь розень кшиде ярсазь. Тесэ ков иля варшта, весементь эйстэ маряви кезэрень шкасто эриця минек покштятнень-бабатнень лексемаст, се, кода сынь вечкизь чачома модаст, кода ванстасть эрямонь-аштемань койтнень, конатнень коряс трясть-кастасть эйкакшосткак, нуцькасткак. Те вечкемась ламо пингень перть совась сынст мельга эрицятнень седейскак. Лиякс, паряк, Евгений Евгеньевич Ледяйкингак, кинь ушодксонзо коряс теевсть паро лиякстоматне Парынзэлесэ (Паракинасо), аволизе кадо Россиянь прявтошсо (Московсо) эрямонь тарканзо ды аволь ве-лявто эсензэ кадозь велинентень, кона меельце комсь-колоньгемень иетнень перть кирсь ветенькирда (2500 тёжадо ламо эрицятнень эйстэ кадовсть ансяк ветесядт). 

«Культура» нацпроектэсь кеместэ совавтови эрямос 

Теде ёвтнеманок поладсынек седе тов. Васня пачтятано седе, кода ютась вейсэнь промксось, конань ютавтома таркакс а стяко кочказель Покш Березникень куншка куросо аштиця ды васолов неявиця кудось. Те - Культурнодосуговой центрась, кона одс витнезель «Культура» нацпроектэнть лувсо ды одов панжозель мелят. Центрась, нама, эрьва ёндо кецявты. Мазый налкшкекс неяви ушо ёндояк, потс совазьгак а кирдеват дивамодонть. Тесэ улить эрьва кодат нупальть. Вейкесэнть тонавтнить сёвоньстэ чакшонь-налкшкень тееме, чувто ланга керсеме, омбоцесэнть - стамо-кодамо, викшнеме-каярдамо. Колмоцесэнть панжозь ловномань нупаль. Те, кода сонзэ лемдизь (ёвтасынек рузокс), «Модельная библиотека «Роста и карьеры». Спортонь вечкицятнень учи покш спортзалось, косо аравтнезь эрьва кодат тренажерт. Ули косо налксемс сехте вишкинетнененьгак. Сынст туртов башка нупальсэ теезь налксема кудынеть, киякс лангсо ацавт чевте кумбот, ладязь батутт. Концертэнь ютавтнема залоськак покш, валдо, сценась неень шкань музыкальной оборудования марто. Весе те сюпавчинть ды мазычинть кис, кода мерсь Покш Березникбуень культурань отделэнь прявтось А.Е.Губанищев, тусть 110 миллиондо ламо целковойть ды весе неть ярмактне састь «Культура» нацпроектэнть лувсо. 

Теде башка, кода промксонть ушодовомсто пачтясь Покш Березникбуень прявтось И.И.Игонов (сон ульнесь инжетнень марто вастовоманть перть), районсо паролгавтовить китне, витневить ды одс строявить кудот, Березниксэ панжозь Сюконямонь аллея, витневи-ванськавтови Гагарин лемсэ культурань паркось. Прядовома лангсо Троицкой церькованть строямозо. Ознома кудот истя жо стявтовить Симкина, Пермезь ды лия велетнесэ. Районсонть эсест тевест ветить зярыя аволькоммерческой вейсэндявкст. Ютксост вейкесь - «Од веле» («Новое село») велетнень одкстомтомань Мордовской региональной вейсэндявксось, конань прявтсо Е.Е.Ледяйкин. Неть вейсэндявкстнэнь ушодксост коряс идезельть Россиянь Президентэнь зярыя грантт, конатнень топавтомаст туртов максозь ярмактнень лангс теезь пек ламо. Ютавтозельть зярыя покш вастовомат, спортивной пелькстамот, витнезель-одкстомтозель «Сурский рубеж» оборонительной сооружениядонть ледстнемань таркась. Ломантнень мельс весемеде пек кадовсть «Ашо лисьма», «Эрзянь карть», «Велень чи» фестивальтне. Пандемиянь шкастояк неть вейсэндявкстнэ а аштить тевтеме. Интернетэнть вельде содавтыть ломантнень эсь велетнень эрямопингедест, седикелень койтнеде-кирдатнеде. 

Вейсэ седе шожда изнямс стакачитнень 

Теке марто коронавирусось стакалгавтынзе весень эрямост. А шожда шкат печтить вейсэндявкстнэяк. Тень лангс явозель васенце мелесь ютазь промкссонтькак, конань ветясь МР-нь Культурань, национальной политикань ды архивень тевень министрась С.Н.Баулина. Светлана Никитовна тешкстызе, кодамо путовкс кандыть аволькоммерческой вейсэндявкстнэ аволь ансяк культуранть кепедеманзо туртов, целанек экономиканть седе тов виевгавтоманзо лезэскак. Тенень паро невтемакс ашти Покш Березникбуесь, косо меельце шкастонть эрямос совавтовить пек ламо теварсевкст, конатнень топавтомаст марто неявиксстэ мазылгадыть велетнень чачост, паролгады ломантнень эрямосткак. Теньсэ пек ламо теи «Од веле» вейсэндявксось, конань прявтсо Е.Е.Ледяйкин. Сонензэ максозель васенце валоськак. 

Евгений Евгеньевич нурькинестэ ёвтнесь, мезе кенерсь тееме сынст вейсэндявксось, кодат стакачи марто савсь вастовомс пандемиянь шкастонть. Сон апак сёпо мерсь: келя, редязель, вейсэндявкстнэнь ёндо ней а маряви тевень ветямонтень виев бажамо. Васенце тувталось - пелемась-тандадомась. Ней весе седе пек мелявтыть, кода ванстомс прянть ормадонть, кода трямс прянть. Секс культуранть марто сюлмавозь кевкстематне сеедьстэ кадовить удалов. Лия тувталокс Евгений Евгеньевич лови сень: ламо вейсэндявкстнэ а марить мелявкс ды оймень сэредема эсест лангс саезь тевтнень кис, секс сынст топавтыть мельде-валдо. 

Кода лади эсь тевензэ пандемиянь шкасто эрзянь, мокшонь раськень регионъютконь вейсэндявксось, ёвтнесь сонзэ прявтось Ю.А.Мишанин. Паро кулякс марявсть пачтямотне седе: Интернетсэ ней ули рузонь кельстэ эрзякс ды мокшокс эли эрзянь, мокшонь кельтнестэ рузокс ютавтомань электронной система, конанть лангсо важодемась моли нейгак гуманитарной наукань институтсо. Интернетсэ истя жо панжовить од сайтт, конатнесэ кортамось ветяви эрзянь, мокшонь кельтнесэ. Улить эсенек блогерэнек. Сынст ютксто Юрий Александрович ледстинзе Оксана Белкинань, Татьяна Маторкинань, Марина Левинань. Тень коряс ламо теить минек газетатне («Эрзянь правдась», «Мокшень правдась»), «Вайгель» радиопрограммась, «Сияжар», «Од пинге» телепрограмматне. Эряви меремс, эрзянь, мокшонь кельтнесэ ветявиця сайттнэс совсить аволь аламо ломанть. Сыненст мель явить натой васоло масторсо эрицятнеяк. 

М.Е.Евсевьев лемсэ МГПИ-сь панжсь эрзянь, мокшонь кельтнень тонавтома курсат, ютавтнить видео-урокт, конатнень коряс тонавтнить аволь ансяк Мордовиясо, Россиянь келес ды сонзэ томбале эриця эрзятне ды мокшотне. 

Историко-культурной сюпавчинть ванстомась ды седе тов кастомась - неть бажамотне аштить васенце таркасо «Россиянь раськетнень ассамблеянь» региональной отделениянть, Равчирень финнэнь-угрань раськетнень культурань центранть икелеяк. Кодат ушодкст тейнить неть бажамотнень топавтомга, ёвтнесь неть вейсэндявкстнэнь прявтось Е.Н.Ломшина. 

Эрьва тевесь а топавтови виень апак путо. Теке марто сон веши ярмакткак. Эрямось ней аравты лия вешемат ды лия кить-янт, конатне, паряк, лездыть вейсэндявкстнэнень бажамост топавтомасо. Вейкесь эйстэст - грантонь максыця фондтнэ. Сындест ней ламо Россиясо. Маштт ансяк теварсевксэнь проектэнь видестэ сёрмадомо. Тень коряс ламо превс путомат макссь Культурань, национальной политикань ды архивень тевень министерствань проектэнь ды программань отделэнь прявтось Ю.А.Елисеева. 

Промксось прядозель истямо тердемасо: «Миненек а кода улемс васоло вейке-вейкенек эйстэ. Вейсэ седе шожда изнямс стакачитнень». 

«Коень кудо» 

Весемеде астувтовиксэкс инжетнень туртов кадовсь Паракинав якамось. Васня совавтнимизь «Коень кудо» музеев. «Парынза» ансамблясо морыцятне орта икеле вастасть эйсэнек кши-сал марто ды моразь. Сынст гайтев вайгельдест ёжось сеске паролгадсь. 

Музейсэнть алкукс ули мезе лангс варштамс. Кода ютазь пингень 50-це иетнестэ ульнесь эрьва кудосо, нейгак сехте неявома таркасо понгавтозь лавсь, аштить столь, эзем, ташто, тень лангс апак вано, кеместэ аштиця шифанер, чувтонь коник, конань теизе Евгений Ледяйкинэнь прапокштязо Макар Григорьевич, кинь вийсэ, келя, стявтозель те кудось. Кудыкеле лавця ланга вачказь кедьёнкстнэ, конатне кадовсть покштянзо пельде. Сон - плотникель. Стенас понгавтозь фотографиятне ёвтнить, кода икеле лиснесть мирденень, ильтясть од цёратнень армияв. Сельме икельде а менить стендтнэ, конатнень лангсо сёрмадовкстнэ ёвтнить Парынзэленть эрямопингедензэ, седе, кодамо оршамосо седикеле яксесть тесэнь эрицятне, кодат ульнесть родонь-раськень тешксэст. Эряви меремс, кудов совамо ортатнень велькссэ понгавтозь тешксэсь - Ледяйкинтнэнь родонь. 

Музеень пурныцятне-теицятне эзизь стувто вешнемс ды сёрмалемс эрицятнень кудолеместкак. Те пек питней. А эряви стувтнемс, кезэрень шкасто лемень путнема коесь эрзятнень ульнесь эсест ды аволь истямо, кодамо ней. 

Пиресэ а кодаль ютамс лато ало мазыйстэ понгавтнезь фотовыставканть вакска, конатнесэ невтезь фототне ёвтнить, мейсэ эри музеесь неень шкасто. 

Лия ёно - столь, конань лангсо ладсезельть понань сурестэ кодазь варьгат, носкат, викшнезь нардамот, пацинеть. Сынст кодыцятне тескень аватне. Ды весе те продукциянть сынь анокстыть аволь ансяк невтемаст кисэ, эйсэст микшнитькак. 

Удалць кудосо - каштомо. Сон нейгак уштневи. Эйсэнзэ пидезь-панезь каванявкстнэсэ вастнить тей сакшныця инжетнень. Се чистэнтькак пиресэ аравтнезь стольтне пешксельть эрьва кодат каванявксто: пуштазь алт, панжакайть, тескень пиресэ кастозь эмежть (те аволь весе, мейсэ каванимизь, лия каванявкстнэ учость «Ашо лисьма» чиресэ). Пидицясь-паницясь М.М.Ледяйкина соды, мезде ярснесть сынст велесэ седикеле. Вейке истямо ярсамопеленть лемезэ «церепкат». 

«Ашо лисьма» этнопарксо 

Кодамо тантей те ярсамопелесь, курок савсь варчамс миненекак, зярдо валгинек «Ашо лисьма» этнопарков. Каванимизь ведьсэ пидезь сывелень прякадо. Сынь аволь кода неень пельментнень эйшкат, ков седе покшт. Сэват вейке - пешкедят. Ламбамосто (оргавтомо) ичезь сюкоротнеяк кургс каладыть. Весе неть ярсамопельтнень тосонь аватне панить-пидить эсест кедьсэ. Аволь ансяк эстест ярсамс, андыть лиятненьгак. Кудосонть, косо икеле ульнесь школа (ней сон пекстазь - эйкакштнеде аламо, тонавтнеме усксить Шугуровав), панжсть кафе - «ПайЧалго». Эсест кедьсэ паневть сюкоротне-прякатне, кода Ашо лисьмасто ведеськак, вечкевсть ошонь эрицятнень туртовгак, зярдо терявтызь максомс магазинэв ды микшнемс рамицятненень. 

Этнопарксонть чувтосто керсезь скульптурат ламо арасть. Теке марто мезе неят тестэ, эрьванть ули эсензэ лемезэ. Вана ашти Палмань ванстыцясь. Эйстэнзэ а васоло эземть ды стольть. Те тарканть лемезэ - Вейсэнь ярсамот. Седе тов верев венстязь цётмар марто ашти чочкосто чапозь срубось, те - Каргонь лисьмась. Эйстэнзэ аволь васоло лато ало озамо тарканть лемдизь «Алужонь кортамо» таркакс. 

Таркатне тесэ аёвтавияк кодат мазыйть! Паксятнень полавтыть пандо чаматне, конатнень чирева таргавить кувака ды сэрей латкот. Вейкенть лемезэ Русяйка латко. Сэрезэ, кода ёвтнесь сонсь Евгений Ледяйкин, пачколи натой 30 метрас. Алов валгозь, тосо чопода, чинсельтькак а неят. Те латконть потсо куншка видьсэ ашти пандыне. Те пандыненть лангсо икеле аштесь кевстэ теезь палмань. Седе ало кев, кона мольсь столь ёнов. Тов седикеле Паракинасо ды малава аштиця велетнесэ эрицятне яксесть озномо. Ней сонзэ арсить теемс истямо таркакс, ков ломантне кармить якамо ойме потмонь чамдомо. Эрьва ломаненть седейсэ таштавкшныть эрьва кодат ёжомарямот: кенярксовткак, ризксэвтькак. Лиясто сынст стака кирдемс седей потсо. Секс ломанесь вешни истят таркат, косо сон апак пеле ды апак визде ёвтневлизе, мезесь сонзэ мелявтовты ды ризнэвти. Истямо таркась «Ашо лисьма» этнопарксонть муезь. 

«Потмонь чамдома» лия таркась - те Ашо лисьманть чиресэ пандынесь, косо стявтозь вейс ды трокс педявтозь лазонь пирявкс. Сонзэ лемдизь Мель Нежекс. Неть лазтнэнь лангс мереви сёрмадомс сень, мезес бажат, мезесь пиштевти эйсэть. Те, келя, лезды топавтомс куш кодамо бажамот. Миньгак сёрмадынек эсь меленек. Вансынек! 

Весемеде а ёвтневат. Тей эряви самс эстенк ды эсенк сельмесэ неемс, кодамо мазычи ды сюпавчи ули минек перька. 

Казнекс - «Ашо лисьмасто» ведь ды «Вай» од диск 

Сельметне - ваныть, пилетне - кунсолыть. Кортамотне тесэяк поладозельть. Те вастовоманть кис лембе валт ёвтасть весенень содавикс предпринимателесь Ш.З.Бикмаев, «Якташлар» татаронь национально-культурной автономиянь прявтось Ш.Ф.Давыдов, Мордовия Республикань театральной деятелень вейсэндявксонь прявтось Н.П.Большаков. Кить эзть кортаяк, кадовсть покш мельспаросо те вастовоманть кувалма. Ды весень седеест токизе се: С.Н.Баулинанень савсь туемс Саранскоев лия пек покш вастовомас, конанть прядовомадо мейле Светлана Никитовна мусь шка велявтомс ды ёвтамс седейшкавань валт Березникбуень азортнэнень, весенень, кить сакшность кортамо вейсэнь тевтнеде. 

Кода паро илязо уле, эряви сыргамс кудов. Эйсэнек ильтясть казне марто. Эрьвантень максозельть Ашо лисьмасто кедьгес пештязь ведь ды од диск, ков совавтозь «Парынза» ансамблянть 23 моронзо. Дискенть лемезэ - «Вай». Мекс истя лемдизь, тень каршо аватне вейке вайгельсэ мерсть истя: «Эрзянь малав весе моротне ушодовить «вай» валстонть. Минекак моротнестэ ламотнень серьгедтяно теке валсонть - «Вай». 

Теньсэ прядомальгак Покшберезникбуев якамодонок ёвтнеманть. Ансяк кода а ледстямс вейкеяк валсо «Парынза» ансамблясо морыцятнень лемест? Сындест ансяк ниле ават. Морамстост кунсолат ды маряви теть, мартост моры весе велесь: истят мазыйть ды виевть вайгелест. А мерьсак сеньгак: сынст ютксто киньгак арась музыкальной образованиязо. Вана мезе ёвтнесть тень коряс сынсь морыцятне. 

Тюрькина Пелагея Ивановна: 

- Эсь шкасто сыргиксэлинь молемс Казанев тонавтнеме, арсинь улемс морыцякс. Жюрисэ аштицятне неизь зоотехникень дипломом, кармасть пейдеме. Карминь морамо, кевкстимизь: «Ансамблясо морсить?» Мерян: «Арась». Вейкесь эйстэст, а манчан, саимим ды кедте ветимим Кирюков лемсэ музыкальной училищав. Мерсь: «Подучите её». Училищав экзаменэнь максомсто истя жо, зярдо карминь морамо, нолдыя вайгелем ды кода серьгединь, кунсолыця тейтересь - хроп - прянзо натой кундызе. Кевкстнян: «Мекс? Аволь видестэ?». Каршон: «Нет. У вас такой диапазон голоса». А мон чарькодян, мезе те «диапазонось»? Ялатеке саимизь. Мейле седеем тошнакадсь, кармась тердеме мекев кудов. Колмо чить эзть максо документэнь эйсэ. Авардинь натой. Мейле окойники максызь. Ромодановасто вейке тейтерь кирдсь эйсэм: «Иля туе». Мон ялатеке туинь. Велесэ мезекс ансяк эзинь важоде. Зоотехникекс, клубонь прявтокс. Мейле, виде, эсь прям пек сёвныя, мекс эзинь цидярдо ды эзинь тонавтне музыкальной училищасо. 

Панькина Зинаида Александровна: 

- Профессиянь коряс мон - бухгалтер. Велень Советсэ секретарень тевть ветинь, школасо библиотекарекс, лавкасо микшницякс, ульнесть шкат, важодинь. Морось седейсэм эйкакшпингстэ  саезь. Васняяк, кода мадтяно чокшне ланга, пилесэм гайгить морот. Кудосонок стенасо понгавтозь радионть зярдояк эзинек лоткавтне. Текень пес тетям пек морыцяль. Морамонь ёрокчинзэ сон редизе армиясо, морась тосонь хорсо. Секс содась ламо морот. Вечкема морозоль: «Ах, ты душечка». Монь нейгак кельпрясом те морось. Паряк, текень кувалма карминь вечкеме морамо монськак. Монь сазоромгак (кавонест) тонавтнесть васня интернатсо, мейле - музыкальной школасо. Вейкесь «Умарина» ансамблясо домрасо седицяль, омбоцесь Берсеневкань школасо музыкальной куро вети. Вейке племянницам прядсь Казанень консерватория, ней - Берлинсэ. Омбоце племянницам важоди музыкальной школасо Ялгасо. Васня Промзасо эринь. Зярдо сынь Парынзэлев, Полина Ивановна тердимим ансамбляв морамо. Пильгезэнзэ сюконян тензэ тень кисэ. 

Тюрькина Валентина Александровна: 

Монгак важодинь бухгалтерэкс. Колхозсо, велень Советсэ. Морамо пек вечкан. Минь Полина марто кавто киялт. Роднят. Свал морсинек. Эйкакшпорасто саезь, од шкасто. «Парынза» ансамбляв сеске Полина саимим. Сюкпря тензэ. Пек покш мельсэ сакшнан морамо. Тетям-авам пек морыцят. А ёвтавитькак, зяро морот содатано! А лововитькак тенек. Эйстэст пек ламо. 

Ледяйкина Елена Геннадьевна: 

- Мон кооперативной институтонть прядомадо мейле сынь Паракина велев, венчинь. Клубсо савсь важодемс Пелагея Ивановна марто вейсэ. Монь пек морыцяль бабам. Истямо вайгелезэ ульнесь, истямо арасель Паракинасо киньгак. Тетямгак морыцяль. Морякокс служась. Вечкилизе «Вечерний звон» моронть. Свал яла ледстниль: «Содат, мон кода «Вечерний звон» моронть эйсэ морсинь?!» А стувтса, кода эйкакш порава гулянкат ульнесть. Свадьбатне кувать мольсть. Минь каштом лангсо вантано, кунсолотано, кода морыть, кода ладсить вайгелест. Вейкесь ушоды, омбоцесь полады. Нейгак эзинек стувто тень. Ней од ломантне а тонавтовить тенек. Сынь ней а марсить икеле ладсо морсицят. Минь ней ютавтнетяно вастовомат, тердтнетяно эйкакшт: марявольть, кода морсесть икеле. Валтнэнь печатасынек яла тенст. Тонавтнилизь. Велева якинек. Эйкакштне покш мельсэ мартонок яксесть. Компьютерэсткак каднылизь, мартонок сыргильть. Калядамо яксинек. Кенкшс вачкоить, калядат морыть. Кить ней покшсто кассть, паро мельсэ ледстнить, кода вейсэ морынек. 

...Кадовкшны ансяк кеняркшномс «Парынза» ансамблясо морыцятнень кисэ. Истямо паро диск нолдасть. Вастневемскак тенст (сындест башка тесэ таго колмо морокурот - «Штирьмалей», эйкакшонь «Серебрянная музыка», «Лазоревый цветок», лия эрьва кодат кужот) ней ули косо. Паракинань клубось, кона каладома лангсоль, одс витнезь-мазылгавтозь. А меряткак, те кудось стявтозь 1958 иестэ. Одкстомтомадонзо мейле теке ансяк максозь одирьва ашти Паракинанть куншкасо. Колмо иеде икеле клубонть витнеме ушолесть эсест вийсэ. Мейле понгсть «Культура» нацпрограммантень. Весе тень кисэ веленек тагояк сюконить Е.Е.Ледяйкиннэнь. Те сон, келя, сыргавтыцясь ды эсь мельга тердицясь. Истя улияк. 

Вейке интервьюсо кевкстеманть лангс: «Мезень кисэ тынь тень тейтядо?» - Евгений Евгеньевич Ледяйкин мерсь: «Минек масторонть нежекс свал ульнесь велесь. Секс эряви эсенек вановтонок одов велявтомс веленть ёнов, кастомс сонзэ виенть, вельмевтемс эрямонь-аштемань койтнень. Сестэ эрямонокак седе сюпалгады. Ансяк те тевентень эряви кундамс весенень, сехте пек сетненень, кинь седейсэ эзь куло вечкемань ёжось се таркантень, косо сон чачсь ды кассь». 

Паряк, юткстонк муевить ломанть, кить сайсызь превс неть валтнэнь ды Ледяйкин ладсо велявтыть эсест чачома велев ды лездыть тензэ одов стямс пильге лангс. 

Раиса ЩАНКИНА, 
Саранск, Покш Березник, Парынзэле, Саранск 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».