Вторник, марта 19, 2024
Важное

Неень шкане, кода икелень иетнестэяк, велетне учить тевест парсте содыця, эрямонь стакачиде а пелиця врачт, медицинской сестрат.

Нать, а стяко 2012 иестэ путозель ушодкс «Земский доктор» программантень. Икеле арсевсь сонзэ ютавтомс 2016 иес, ансяк шкась невтизе, те тевенть эряви поладомс. Икелепелев те программась анокставкшнось медицинань вузонь прядыцятненень, мейле тов совавтовсть сеть медиктне, кинень 50 иеде а седе ламо. Шкань ютазь теньгак полавтызь, ды ней материальной лезксэсь максови велев важодеме сыця медиктненень, иетнень лангс апак вано. Истятнэнь ютксто, кить ошсо важодемадо мейле сайсть мель туемс велень эрицятнень лецямо, эрзянь цёрась, «Комсомольская межрайонная больница» МР-нь ГБУЗ-нь Покш Березникень поликлиникань отделениянь хирургось Николай Васильевич Бояркин.

Чугыр веле (Шугурова). Кизэнь маней пертьпельксэсь эйкакштнень чинь-чоп тердсь-аштевтсь ушосо. Налксемстэ эзизь редяяк, кода малазост пачкодсь Миша лелясь, кинь кедьсурсто вересь, марявсь, валовсь прок чудикерьксстэ… Цёрынетне, тень редязь, сеске тусть чиезь, теде эзь тандадо юткстост сехте сэтьмесь – Коля Бояркин. Сон, кода маштсь, керявксонть ванськавтызе сеньсэ, мезе понгсь кедензэ алов, ды тапаризе. Миша лелясь эзь сода, кода пандомс питнензэ апелицянть ды лездыцянть. Секе-тев сон кортась: «Коля, тонеть улемс врачокс! Илить стувто валон, касат ды мольть тонавтнеме те тевентень».
Арсесь-арась теде сестэ Николай Бояркин, медицинанть кочкасы эрямонь тевекс, эдь эштё овсе вишкинель, ансяк Миша лелянть валтнэ кувать кадовсть ледстневицякс.

Видьстэ ёвтамс, сонензэ те тевесь пек вечкевсь. Вишкинестэ саезь арсесь улемс врачокс, секс школасояк бажась тонавтнемс парсте. Школанзо прядомадо мейле а ёвтавияк кодамо мельспаро саизе Н.П. Огарёв лемсэ Мордовской государственной университетэнь медицинской факультетэнь васенце курсонь студентэкс теевемстэ.
Виде, велень цёрынентень а шожда ульнесь тонавтнемс ламонень мельс туиця вузонь те факультетсэнть. Ансяк сон пря эзь максо ды пек ламо шка ютавтсь эрьва предметэнть тонавтнемантень.

Студентэнь иетне ютыть пек куроксто, сынь аволь ансяк паро тонавтнемасо кадовсть ледстневицякс Николай Бояркиннэнь. Эштё валдо тешкс кадсть эсь мельгаст кизэнь стройотрядтнэ. Ялганзо марто аволь весть ульнесь Темниковань райононь Пурдошки велесэ, косо невтсть кудонь строямосо ёрокчист. Виде, те весе мейле лездась тензэ эрямосо. Юткошкане од цёрась бажась молемс тиринь Шугурова велев, косо свал учость малавиксэнзэ. Тешкстасынек, тетязо, Василий Петрович, пингень перть важодсь колхозсо, ульнесь икеле молиця комбайнёрокс. Авазо, Раиса Ивановна, чевте седей ломань, весенень бажась лездамс, куш эсензэ эрямозо пек стакаль. Иеде икеле сон тусь эрямосто…

Бояркинтнэ трясть-кастсть ниле цёрат. Эрямс ды кенярдомс бу… 1981 иестэ экшелямсто ваясь Володя цёраст, 10 иеде теде икеле кулось Семён… Весе кемемаст ульнесь Николаень лангс…
Николай Васильевич маштсь аволь ансяк эрьва тевсэ лездамс тетянстэнь-аванстэнь, истя жо валсояк оймавтомс. Свал бажась каземс тенст куш вишкине, но кеняркс.

1987 иестэ Н.В. Бояркин интернатуранзо ютызе Саранск ошонь сестэ эштё колмоце номер, ней С.В. Катков лемсэ больницясонть.
Трудовой пингенть ушодызе Саранск ошонь травмпунктсто, косо важодсь сисем иеть. Те шканть перть ламо савсь неемс хирургонтень: кодамо синдевкс марто ансяк эзть пшкале лезкс мельга тензэ. Валонзо коряс, лиясто варштасак снимканть ды ломаненть сэредьксэсь мик седейс токи. Арсят, кода сон цидярды те томбавомадонть. Хирургонь тевесь ламо ёнкска явови лиятнеде, ды ансяк се врачось, кие машты ормалгадозенть аволь ансяк тевсэ, валсояк оймавтомо, – алкуксонь.
Травмпунктсо важодемадо мейле сон 25 иень перть ульнесь хирургокс МР-ва Россиянь МВД-нь медико-санитарной частьсэнть.

Пенсияв лисемадо мейле ансяк колмоце пель ковонь перть цидярдсь аштемс тевтеме. Эдь те аволь Николай Васильевичень обуцясо, секс ушодсь вешнеме эстензэ тев. Васня якась Рузаевкав, мейле – Краснослободскоев, а седеесь тердсь тиринь ёнксов. Истя, вейке чистэ ялганзо меремань коряс пшкадсь «Комсомольская межрайонная больница» МР-нь ГБУЗ-в. Тосо сеске тензэ мусть тарка специальностень коряс Покш Березниксэ. Нама, сон пек кенярдсь: муевсь тензэ важодема тев тиринь веленть маласо. Эдь кода сонзэ содасызь Шугуровасо ды маласо велетнесэ, истя сонгак весень марто сеедьстэ икеле вастневсь. Ней уш вейксэ ковонь перть сон топавты а шожда тевензэ Покш Березник ёнкссо.

Вана кода мерсь «Комсомольская межрайонная больница» МР-нь ГБУЗ-нь Покш Березникень поликлиникань отделениянь коряс прявт врачонь полавтыцясь А.А. Кумакшев: «Николай Васильевич тевензэ содасы парсте, топавты весементь шкастонзо. Текенень поладса, Н.В. Бояркин содасынзе Покш Березник ёнксонь ломантнень ды тиринь келенть, мезесь истя жо лезды тензэ эрьва чинь тевсэнзэ».
Те ломанесь уцяскав семиясояк. Ирина Николаевна нинзэ марто трясть-кастсть кавто цёрат. Покшонтень, Владимир Николаевичнень, 35 иеть, сон прядызе Н.П. Огарёв лемсэ МГУ-нь юридической факультетэнть. Важоди специальностень коряс. Омбоцесь, Николай, истя жо мусь эстензэ вечкевикс тев. Сынь мельспаросот кавто нуцькаст Иринань ды Георгиень коряс.

Октябрянь 17-це чистэ Н.В. Бояркин тешкстызе чачома чинзэ. Николай Васильевичень лемс ёвтазельть ламо поздоровт ды паронь арсемат. Сыненст вейсэндявтано миньгак, «Эрзянь правда» газетань коллективесь.
Николай Васильевич, ульть шумбра, уцяскав, ды кадык тонь а шожда тевесь икелепелевгак канды ломантненень паро ёжомарямо ды кувака пинге!

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».