Пятница, октября 30, 2020
Важное

Александр Николаевич ды Елена Владимировна Висюлькинтнэде, Темникова ёнксонь ламо эйкакшонь трицятнеде, минь эсенек газетань лопатнесэ ёвтнинек аволь весть. Вана те иень тундонь читнестэ оякчисэ эриця 18 эйкакшонь триця тетянть-аванть марто вастовомсто, мартост течинь эрямодонть кортамсто эзинек кирдеве, штобу а ёвтнемс ловныцятненень, кода те а шожда шкастонть эрить-тонавтнить, лездыть вейке-вейкень туртов покш семиясо эриця сазортнэ-ялакстнэ, кодат сынст трицятнень-кастыцятнень ундоксост.

 

Кемемась пачтинзе Темниковав

Ледстясынек, те семиясь Мордовияв сась Саратова ёнксонь Энгельс ошсто. Сонсь кудазоравась чачсь-кассь семиясо ськамонзо. Эште вишка пингстэ покш мелезэль, штобу семиясост мартонзо касовольть ламо эйкакшт, ансяк те арсемась сестэ эзь топавтово. Сон мик малавиксэнзэ лангс сестэ мельсапаро саекшнесь. Ансяк авазо, Лидия Михайловна Малышева, стамбарнэ толковась тейтерензэ туртов: «Касат покшсто, кеместэ стят пильге лангс ды топавтсак мелеть». Паряк, сестэ сонськак Лидия Михайловна эзь сода, кодамо покш путовксозо карми тейтерензэ семиянть покшолгавтомасо, Пазнэнь кемема кинть путомасо. Те кармась улеме мейле.

Теде икеле жо Елена тейтерензэ семиясь васня мейсэяк прок эзь явово лиятнеде. Педучилищасо тонавтнемадо мейле лиссь мирденень, важодсь эйдень кужосо. Семияст аламонь-аламонь кармась касомо. Елена Владимировнань валонзо коряс, ялганзо ютксто аламот кить сестэ колмодо седе ламо эйкакшт трясть-кастасть. А тесэ сынст мик кото! Виде, аламо кие чарькодсь эйсэст, зярдо кармасть содамо сынст покш семиядост ды эйдень кудосто эйкакшонь саемадо.

Эрямосонок истяк мезеяк а эрси, эрьва вастовиця ломанесь тенек мезень кисэяк кучови, минь сонзэ пельде мезескак тонадтано, эли сон эйстэнек саи сень, мезесь допрок полавтсы эрямонь лувонзо.

Истя лиссь Висюлькинтнэнь покш семиясонть. Апак учо стакасто ормалгадсь Елена Владимировнань авазо ды врачтне тензэ ёвтасть пек апаро куля, сонензэ кадовсь эрямс овсе а кувать – кавтошка ковдо а седе ламо.

Ашти авась ацавкстнэнь лангсо. Ледстнематнень потс ваякшнось, малав весе пингезэ икельганзо ютась, ды апак учне малавиксэнзэ кедьстэ вешизе православиянь книганть, конань храмсо казизе тензэ вейке ломань нуцьканзо лемдемстэ. Самай те книгастонть ушодовсь Пазнэнь кемемазо, церьковав якамозо. Сонськак эзь чарькоде, кода ормась потась ды сон теевсь покшчитнестэ храмов свал якицякс. Салава арсесь ды энялдсь Пазонть икеле, штобу Елена тейтерезэяк ушодоволь кемеме…

Висюлькинтнэнь семиясо, апак учонь орма куродызе эйкакшост эйстэ вейкенть. Елена Владимировнань эрямонь лувозо сеске полавтовсь ды сон кармась аванзо марто эйкакштнень сайнеме храмов. Шкань ютазь ормась потась. Самай сестэ кавонест ават-тейтерть семияст марто теевсть алкукс православноекс.

Темниковав васенцекс сась Лидия Михайловна паломникень килангсо улемстэ. Сонзэ мельс сестэ пек тусь те кезэрень ошось ды монастыреськак овсе маласо. Сестэ тосо улемстэ чачсь арсема, саемс тов эрямо нуцькатненьгак вейсэ тетяст-аваст марто. Одтнэнь мельскак те таркась пек вечкевсь ды апак кавтолдо састь эрямо Мордовияв.

Виде, икеле  кудост берякшкель. Ды вана кавто иень ютазь  республикань прявттнэнь ды Мордовиясо ламо эйкакшонь триця «Семья» вейсэндявксонть лезксэст вельде те стакачись витевсь.

 

эрьва тевсэ ёроковт

А.Н.Висюлькин икелень шкасто важодсь «Электротеплосетьсэ» автопарконь механикекс. А вана кода эрямозонок совась апаро ормась, весе эйкакштне кармасть тонавтнеме кудосо, савсь нурька шкас кадомс важодеманзояк. Эдь эрьванень юткстост явома мель, ков сатыть виензэ лездама.

Александр Николаевичень валонзо коряс, сынст эйкакштне эрьва часонтень питне путыть, стяко сонзэ а ёмавтнить. Эрьвась юткстост явови эсензэ ёрокчисэ. Аринанень Пазось казсь мазый вайгель. Сонзэ моротнень маризь аволь ансяк эсенек республикасо, истя жо Мордовиянь томбалеяк. Тейтернесь ламоксть лиснесь лауреатокс эрьва кодат фестивальтнесэ ды пелькстамотнесэ. Кодат мазый кодавкст ды викшневкст теи Кристина, сельметь а саевить! Нать, а стяко покш питне тенст путыть эрьва кодат выставкатнесэ, ков пачтявить сонзэ важодевкстнэ. Вера вечки аволь ансяк художественной литературань ловномо, истя жо стихотворениянь тонавтнеме ды мейле сынст парсте ёвтнеме.

Кавто иеде икеле Сочи ошсо ульнесь «Содружество» раськеютконь пелькстамось, косо виест варчнизь Висюлькинтнэнь семиясто тейтерькатне, изницякс лиссь Вера. Жюрись максызе тензэ васенце тарканть ды Гран-принть. Эрьва эйкакшонть эсензэ ёрокчизэ,  сонзэ панжомс лездыть тетясь-авась. Сынст марто вейсэ те иень тунда путсть ламо эмежть, эрьва иестэ те ояксчисэ эриця семиясь аноксты кавтосядт банкат, теле лангс эрьва кодат эмежть салтыть.

Эсест кедьсэ теезь кастозесь свал седе тантей маряви ды лиятненьгак вечкить каванямо те тевень вечкиця, стакачиде а пелиця семиясь.

Мезесь кенярдовты, вишкинетнень арасть сотовой телефоност, покштне жо эйсэст гайневтить, зярдо те пек эряви. Тесэ покш питне путыть тетянь-авань ды бабаст ёндо сынст кисэ мелявтомантень, эрямост паролгавтомо бажамонтень.

Кемеви, Висюлькинтнэнь ланга публикациянть ловномсто, муевить паро ломанть, кить кармить анок тенст лездамо, а сынь кисэст кармить озномо ды сюкпрянь валонь ёвтамо. Телефоност ули минек редакциясо.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».