Н. П. Огарёв лемсэ Национальной культурань институтось (1991 иестэ саезь ульнесь факультетэкс, 2006 иестэ саезь – Институт) покш мель яви эрзянь ды мокшонь раськень культурантень, минек койтнень-кирдатнень ванстомантень-вельмевтемантень. Институтось Мордовиянть эрямозонзо совавты неень шкань национальной тюссо артозь профессиональной дизайнэнть, эрзянь ды мокшонь кельтнесэ сёрмадовкс марто рекламат, келейстэ нолдави тевс орнаментэсь, раськень музыкась ды седе тов. Весе важодемань шканзо перть Институтось кармась алкуксонь культурной центракс эсь мастерскоензэ, лабораториянзо ды компьютерэнь классонзо марто.
Институтонть прявтсо – философиянь наукань кандидатось, доцентэсь Елена Николаевна Антипкина. Тонавтомань важодеманть коряс прявтонь полавтыцясь – искусствоведениянь кандидатось, доцентэсь (дизайнэнь ды рекламань кафедрась) Наталья Владимировна Фадина, конась ёвтнеськак тенек студентэнь анокстамонь ёнкстнэде.
– «Дизайн костюма» специализациясь ушодозель 2004 иестэ. Васня те специальностенть коряс тонавтнесть вете иеть, мейле образованиянь реформанть марто тонавтнемась киртявсь ниле иес ды анокстыть тесэ бакалавриатт.
Студенттнэнь оршамонь васенце коллекцияст 2007 иестэ усксинек «Этно-Эрато» раськеютконь пелькстамонтень. Се шкастонть саезь пурнавсть ламо коллекциянок ды, ловт, малав эрьва ие минек модельертнэ усксить тов эсь раськень костюмонь коллекциятнень ды, малав свал велявтнить изнявкс марто.
Вана нейгак те пелькстамостонть сынь усксть васенце тарка. 3-це курсонь неть студенткатне пек ёроковт ды зярс сынь меельцеть минек Институтсо, кить анокстыть раськень дизайнерской оршамопельть. Сы иестэ сынь нолдавить ды, ризксэнтень, тевест поладыцят, мельгаст молицят зярс арасть. Ансяк минь кемтяно, те иестэ таго пурнави тонавтницянь од группа. Миненек сась яволявтома «Талина» агрохолдингенть пельде анокстамс специалистт самай истямо ёнкссо – «Дизайн»: «Дизайнер костюма». Неть кармить целевой таркат, минь пек учотано абитуриентт. Ули покш меленек, штобу сынь поладовлизь неть койтнень. Те специализациясь Институтсонок эри 20 иеть ды, нама, минь бу сонзэ паро мельсэ ванстовлинек седе товгак, – мелявтозь ёвтнесь Наталья Владимировна.
Зярдо коллекциятнеде пунавсть ламо, теезель «Иненармунь» модань театрась, кона ардтнесь эрьва кодамо мероприятиява. Паро, Институтонтень свал ули мезе невтнемс – тейтерькатне мазыйть, ёлганят, маштыть павакс эсь пряст кандомо раськень оршамопельтнесэ. Секскак ули кемема, вельмевтеви одс модань театрась, косо кармить невтнеме мазыйдеяк мазый коллекциятнень.
Нама, шкась моли, полавтовить преподавательтнеяк. Ульнесть шкат, зярдо студенттнэ тонавтнесть Степан Эрьзя лемсэ музеень неень прявтонть Людмила Нарбековань кедьсэ. Истя жо Институтсо важодсь Галина Лосева, сон – РФ-нь Художникень союзонтень совиця, ней важоди Московсо. Минь, нама, седе келейстэ ёвтнетяно аполавтневиця преподавательде – Лариса Викторовна Мелешкинадо, сон дизайнэнь ды рекламань кафедрань доцент. Свал тейтерькатнень марто – вети, тонавты эйсэст. Весементь содасы раськень костюмонть ланга. Лариса Викторовна Институтсо важоди 2006 иестэ саезь. Самай се шкастонть, кода панжовсь «Дизайн костюма» дисциплинась. Чачсь Кочкуровань райононь Од Мурза велесэ, эрзянь семиясо. Школадо мейле тонавтнесь стыцякс-универсалокс, мейле – закройщикекс-универсалокс, седе тов прядызе Московонь «Государственная академия сферы быта и услуг» лементь ало тонавтнема тарканть. Специальностезэ – «Технологии конструирования швейных изделий», специализациянь коряс – инженер-технолог.
Лариса Викторовна эрьва коллекциянтень арси эрзянь мазый лем, вана сынь: «Азорава Тюс» (2021), «Вечкема» (2022), ды меельцесь – «Чинь валгома» (2023) коллекциясь, кона сайсь 1-це тарка «Этно-Эрато» юбилейной евразийской пелькстамосонть. Весе сынь лиссть сонзэ ветямонзо ало.
– Лариса Викторовна, кода анокставить оршамопелень коллекциятне?
– Васняяк тееви эскизэсь. Эскизтнэнь студенттнэ анокстыть сынсь. Студенткатнень эйстэ эрьвась арси колмо костюмт. Пельдест вешемась – арсемс-стамс од оршамопельть, конатнес улевельть совавтозь кезэрень раськень оршамотнень элементтнэ, викшневксэнь орнаменттнэ, конат теевить пек покшсто, неявиксстэ. Минек раськень орнаментэнтень совавтовить геометриянь узорт, конат васня парсте тонавтневить ды мейле нолдавить тевс. Тюстнэяк саевить-ванстовить кезэренсетне – ашо, якстере, раужо.
Вейке коллекциянь анокстамонтень туить, натой, ниле ковт. Эскизтнэде мейле ушодови важодемась макет марто. Ды ансяк седе тов кундыть коцтонтень, конань лангсо топавтовить весе арсематне. Коцтнэ саевить натуральнойть, саемга лияназонь жаккарт, ашо лияназ ды терракотовой велюр. Викшнематнес саевить понань суреть. Стака, формань кирдиця коцтнэсэ седе парсте кирдеви викшневксэсь – а ускови, а мерькави. Весе оршамопельтне теевить тонавтнемань мастерскойсэ, косо аштить эрьва кодамо лувонь стамо машинат, оверлогт ды седе тов.
– Студенттнэ анокстыть сценической, стилизованной костюмт. Мезе марто те сюлмавозь?
– Сетне, кить важодить раськень оршамопель марто, одс теить се исторической костюмонть, кона ульнесь кезэрень шкасто. А сень лангс ванозь, што тесэ тонавтыть дизайнонтень, костюмонь реконструкциясь лезды ансяк оршамопеленть тонавтнемасо, дизайнэнть пингстэ жо миненек эряви сонзэ кодаяк полавтомс, лисни, минь тейтяно трансформация. Вана, саемга, тесэ (невтни модель) паля ланга эрзянь пулаесь полавтови келей баска каркссо, косо арасть суреть. Ды истя эрьва пельксэнть марто.
Тешкстама, те ансяк творческой дипломной важодевкс, косо студентэсь невти весе эсь бажамотнень. Ды зярдо сынст кедь алдо лиси истямо мазычи, сынь седеяк покш мель кармить явомо пелькскетненень (детальтненень).
Ульнесь шка, зярдо минек студенттнэ тейнесть коллекцият «прет-а-порте» стильсэ (французонь кельстэ – анокт кандтнемас), истя меремс, эрьва чинь оршамопельть. Тосо ульнесть джинсасто, батикстэ ды ламо лия коцтсто коллекцият. Нейгак вана тейтертнень курсовой важодевксэкс ульнесь раськень тешкс марто спортивной костюмонь анокстамось.
Оршамопельде башка Лариса Мелешкина топавты ламо лия тевтькак. А умок, те иень февральстэ, сон кармась «Вышитая карта «Мордовия многонациональная» републикань фестивалень лауреатокс. Те кавто метрань келесэ картась стазель сонзэ ёроков кедтнесэ. Дипломонть лангсо, кона максозель тензэ МР-нь культурань, раськень политикань ды архивень тевень министранть Светлана Баулинань пельде, сёрмадозельть истят питней валт: «За верность идеям единства, дружбы и любви к малой родине, сохранение и развитие национально-культурной самобытности народов, населяющих Республику Мордовия, приумножение этнокультурного наследия». Арсетяно Лариса Викторовнанень шкинемасо икелев молемань ки, важодемасо изнявкст ды эрьва чинь кеняркс!
Марина Агафонова