Вторник, марта 19, 2024
Важное


Кода уш пачтинек, 2020 иень медьковонь (июлень) 7-це чистэ ульнесь «Равчирень финнэнь-угрань раськетнень культурань куншкакуро» (рузкс - «Поволжский центр культур финно-угорских народов») аволь коммерческой ассоциациянть шкадо икелень вейсэнь промксозо.
Эйзэнзэ сакшность Мордовия Республикань Куль­турань, национальной политикань ды архивень тевень министрась С.Н.Баулина,
Регионъютконь мокшонь, эрзянь вейсэндявксонь прявтось Ю.А.Мишанин ды те вейсэндявксонь лия теицятне (учредительтне). Промкссонть Равчирень центрань прявтокс, конань тевтнень теде икеле вете иень перть топавтсь Р.И.Акашкина (сон сёрмадсь яволявтома туемадо), кочказель Елена Николаевна ЛОМШИНА.

Елена Николаевна Ломшинань седе пек содасызь, кода Н.П.огарёв лемсэ МГУ-нь финнэнь-угрань культурань научно-исследовательской лабораториянь прявтонть.

Сон - философиянь наукань кандидат, доцент, 25 иеде ламо топавты тевть, конат сюлмавозь эрзянь-мокшонь ды финнэнь-угрань раськетнень культураст марто. Теде башка, Е.Н. Ломшина вети Россиянь раськетнень ассамблеянь Мордовиянь отделениянь прявтонь тевтнень.
Сон чачсь Дубенкабуень Поводелесэ. Эйкакшпингстэ саезь кармась покш мель явомо эсензэ раськень культурантень, койтненень-кирдатненень. Н.П. Огарёв лемсэ МГУ-нь исторической факультетэнть прядомадо мейле кармась важодеме Нацио­нальной культурань институтсо деканонь полавтыцякс, Мордовиянь историянь ды культурань кафедрань, этнокультурань кафедрань прявтокс. 2010 иень декабрясто саезь те шкас Е.Н.Ломшина - Н.П.Огарёв лемсэ МГУ-нь Национальной культурань институтсо финнэнь-угрань раськетнень культурань научно-исследовательской лабораториянь прявт.
Кодамокс неи эсь прянзо Равчирень финнэнь-угрань раськетнень культурань куншкакуронь ветиенть таркасо, кортнинек эсензэ Елена Николаевна Ломшина марто.

- Елена Николаевна, васняяк, ёвтатано теть седейшкавань поздоровт Равчирень финнэнь-угрань раськетнень культурань куншкакуронь прявтокс кочкамонть кувалма. Арсетяно те таркасонть од ушодкст, од мельть-арсемат ды икелев молема ки.

- Сюкпря.

- Елена Николаевна, васняяк ули мелем кевкстемс: учнить-эзить истямо тердема - улемс Равчирень центрань пряв­токс?

- Видькстан, эзинь учне.

- Кода тонсь вастык те кулянть. Ульнесть-арасть кавтолдомат?

- Нама, ульнесть. Пелян аволь стакачиде. Тевтне монь а тандавтнить. Текень пес, од таркасо тевтне-мелявкстнэ ламова содавикст ды малавикст. Вейкесь эйсэнь мелявтовты: сатстовить-арась шкам ды вием. Сави кавонзамс вийтнень.

- Елена Николаевна, тонь туртов од тевесь, кода тонсь мерить, содавикс. Ловт, весе эрямот сюлмавозь минек культуранть марто. Финнэнь-угрань раськетнень культурань научно-исследовательской лабораториянь ветиекс улема шкастонть ламо мезе теить. Содасак те тевенть, кода мерить, потмо ды ушо ёндояк. Секс а эряват тонавтомс, кода ладямс ды мейстэ ушодомс. Ялатеке ёвтык, кодат васенце эскелькст кармат тееме?

- Арсеманок ламо. Васняяк карматано ванномо ды тонавтнеме сень, мезе теезель центрасонть ютазь шкастонть, мезе кенерсть тееме тосо важодицятне малав кеветее иень перть, зярс эри те курось. Ды, нама, арсесынек сень, мезенть, паряк, карматано тееме од лувсо. Эрямось, кода нетядо, полавтовсь. Сон а ашти таркасонзо. Секс карматано арсеме, кодат од койть ды од ёнкст совавтомс минек важодемасонть. Васняяк, арсян, эряви арсемс Равчирень центранть одс касомань ды виевгадомань программа. Мезе од совавтома, кодат од ушодкст сыргавтома. Нама, а эрявить стувтнемс сеть паро тевтненьгак, конат ушодозельть икеле.

- Кинь марто арсят ладямс сюлмавкст ды ветямс вейсэнь тевть васняяк?

- Мон, кода содатадо, важодян университетсэ. Секс седе шожда карми тень васенце ушодкстнэнь теемстэ нежедемс те вузонть лангс. Пек паро ули кеме сюлмавкст ладямс сеть вейсэндявкстнэнь марто, конатне ветить раськень культуранть марто сюлмавозь тевть. Вейсэнь тевень топавтомо арсетяно тердемс культурань лия учреждениятненьгак.

- Мезенть лангс карматадо явомо покш мель?

- Чарькодеви, васенце меленть карматано явомо культуранть лангс. Культурась - эрьва раськенть оймезэ. Сонзэ коряс онкстнить эсензэ раськенть виензэ, сюпавчинзэ. Секс эряви минек раськенть, финнэнь-угрань лия раськетнень культураст седе парсте невтемс эрьва ёндо кода Россиясо, истя лия мастортнэсэяк.

- Паряк, нейке уш улить арсеманк, мейстэ ушодомс?

- Ней анокстатано ютавтомс «Мордовия многонациональная» лем ало медиа-форум. Арсетяно сонзэ ютавтомс вузтнэнь, СМИ-тнень, НКО-тнень марто. Те карми улеме сёксня, бути мезеяк а полавтови эрямосонть. Эрьва вейсэндявксось, этнокультурань центрась аноксты видеоматериал седе, кода сон эри, кодат тевть топавты. Видеоматериалось невтеви медиа- форумсонть. Арсетяно, те проектэнть марто листяно Россиянть келес.

- Кода вастызь Равчирень центрань прявтокс кочкамодо кулянть ялгатне, содавикстнэ?

- Васенце чистэнть уш ламот тень гайневтсть, ёвтасть лембе валт, пси поздоровт, арсемат. Ды весе, кить кортасть мартон, алтасть максомс лезкс. Секс ули кемема, а кадован ськамон. Вакссон кармить оян-ялган, весе сеть, кить мелявтыть минек культуранть кисэ. Видькстан, мон а вечкан тевенть ветямо ськамон, вечкан, зярдо сонзэ топавттано вейсэ, ламо ломань марто.

- Равчирень центранть а карматадо покшолгавтомо?

- Теде зярс эзинь арсеяк. Теке марто сы шкасто, паряк, кой-кодат лиякстомат кармить улеме. Эрямось, таго мерян, полавтови. Сон аравты од вешемат. Сынст топавтомс эрявить неень шкантень ладиця специалист. Но теде карматано арсеме мейле, шкань ютазь.

- Тынк лангсо истякак ламо тевть. Ней эсенк лавтов лангс каиде седеяк ламо. Косто карматадо сайнеме шканть?

- Тень кувалма, таго мерян, монськак пелян. Теке марто ялатеке кеман: вием ды шкам сатстсынь. Косо важодян ды косо карман важодеме, неть тевтне малавикст. Арсян, монь пельде эряви маштомс сынст вейсэндямс вейс. Тень туртов кармить эрявомо седе ламо ёрокчи, превть ды вийть. Ды лездыцят. Кода уш меринь, вечкан тевтнень топавтомо вейсэ. Истя седе шожда цидярдомс куш кодамо стакачитнень. Тень пачк монень савсь ютамс аволь весть. Финнэнь-угрань культурань лабораториясо важодемстэ кодат ансяк теварсевкст эзинек топавто. Ней вана Россиянь раськетнень ассамблеясояк ушодынек ламо од проектт. Пельиень перть сёрмадынь кото проектт. Кучинь сынст эрьва кодамо фондов. Медиа-форумонть ютавтомадо арсемаськак сась превезэнь апак учо. Арсинь васня сёрмадомс репортаж. Мейле превезэнь сась ютавтомс медиа-форум. Те тевесь эрявикс. Минек республикасо ней ламо НКО-тнеде. Сындест аволь пек ламот содыть. Косояк пек а ёвтнить. Паро улевель панжомс башка сайт, косо секе- тев ёвтнемс эрьва НКО-донть.

- Аволь умокмаринек, Россиянь Федера- циянь Президентэнь грантонь пелькстамосонть ассамблеянть пельде максозь вейке проектэсь лиссь изницякс. Ёвтнек аламошка сондензэ.

- Те проектэнть карматано топавтомо университетэнть ды театратнень марто. Тевтнеде кармить ламо. Эрьва театрас рамавить сен­сорной стольть, интерактивной оборудования, конань вельде театрав сыцятнень арсетяно теемс содавиксэкс музеень экспозициятнень марто.

- Содан, проектэнть туртов явозь 2 миллиондо ламо ярмакт. Сынь уш пачкодсть?

- Зярс арась. Пандемиясь, улема, кирди. Но тевесь сыргавтозь. Ушодынек договоронь- мезень анокстамо. Исяк талай чокшнес аштинек бухгалтерэнть марто.

- Ёвтнек аламошка эсеть авадот, тетядот.

- Авам - Анна Михайловна Ломшина - ме­дик. Сон Поводелесэ ульнесь фельдшерэнь- акушерэнь пунктонь прявтокс. Сонензэ весе чиильть лезкс мельга. Икеле «скоройть» арасельть. Мезе косо лисиль, тердтнильть сонзэ. Эряви меремс, вишка пингстэ тетянок-аванок, ловт, эзинек некшне кудосо. Тетям, Николай Егорович Ломшин, свал командировкасоль. Важодсь комсомолонь райкомонь омбоце секретарекс, колхозонь прявтокс. Тевтнеде кудосо пешксельть. Пель гектаршка модамарть путылинек. Ансяк листяно мотыжамо мирем, вант, авань тердьсызь ковгак ды... пельчис. Лиясто пелеветькак сыльть мельганзо. Сестэ эрьва мезть лиснесть: тесэ киньгак чавить, тосо - тюрить. Минь Люда патянь марто кавоненек кадовилинек. Колмоцесь - бабанок, Елизавета Петровна. Пиресэ эмежень кастомсто пондо ливезь чудиль лангстонок.

- Истя, велесэ эрямось тонавтынзить мездеяк а пелеме. Ней кодаткак стакачитне а тандавттадызь?

- Стакачиде алкукс а пелян. Школасо тонавтнемстэяк эзинь аште стяко. Комсомолсо прявтокс ульнинь. Лия тевть топавтынь. Кавксоце класстнэнь прядомадо мейле аванень апак ёвта сыргинь кирьпецень заводсо важодеме. Тосо кирьпеценть доволь савсь кандтнемс ды ёртнемс. Апак тонадо весе кутьмерем яжия. Омбоце чистэнть эзинь стяво. Авам сёвнымим, келя, кие тонь кармавтынзить молемс кирьпецень заводов. Мон сестэ снартнинь а кадовомс ялган-оян эйстэ.

- Вишка пингстэ мезенть ловик сехте вечкевикс тевекс?

- Сехте пек вечкинь книгань ловномо. Книгатнень мон нильнезь нильнинь. Эсь прямгак стувтылия те шкастонть.

- Кие превс путынзить кочкамс те кинть, конань эзга ней молят? Аволь ават эли тетят?

- Аволь. Та-кода те лиссь сонсь. Видькстан, велев кадовомс мелем сестэ уш арасель. Монень тосо эзь сатно таркась, ков путомс ойме потсто чадыця вием, невтемс эсь прянть. Зярдо уш тонавтнинь университетсэ, ветеце курссо вастовинь Р.И.Александрова учёноенть марто. Рудина Ивановна маштсь эсензэ кортамосо истя «сыремтемс» оймем, сеске мель саинь поладомс тонавтнеманть аспирантурасо. Истямо мельс самс кармавтымим сеяк: дипломом сёрмадыя содавикс историкенть Н.В.Заварюхинэнь кедьсэ. Дипломом алтазель сенень, кода эрясть XIII пингестэ мокшонь ломантне Темниковань уездсэ. Кувать савсь аштемс архивсэ, ванкшномс ташто конёвтнень ды сёрмадовкстнэнь.

- Ней кармить Равчирень центрань прявтокс. Меельце шкастонть ламо-мезе тейтяно эсенек ды финнэнь-угрань лия раськетнень культураст ды келест ванстомаст лезэс. Кода арсят, ванстовить минек культуратне ды кельтне эли ялатеке сынст учи ёмамо ды кулома?

- Истямо кевкстема монень макснесть аволь весть. Мезе карми минек раськетнень сядо иеде мейле, ванстовить-арась коенек- кирданок? Мон сестэ меринь, те тевсэнть ламось-мезесь ашти эсенек эйстэ. А карминдерятано минсь путомо вий тень туртов, нама, паронть иля учне. Сеяк виде, минек культурась, койтне-кирдатне эрить велетнесэ. Тосо - минек раськенть оймезэ. Зярдо якинь экспедиция марто велетнева, мартонок ульнесть омбо масторсто сазь ломанть. Неинь, кодамо покш мель явить культуранок лангс омбо масторонь ломантне. Ламот эйстэст содасызь келенек, парсте кортыть эйсэнзэ. Лангозост ванозь, минек од ломантненьгак чачиль мелест седе ламо содамс эсь раськеденть, тонавтнемс эсь келенть. А зярдо кортнят велень ломантнень марто, сынь анокт весе оймест панжомс.

- Монень маряви, икеле минь седе кеме сюлмавкст кирдинек омбо мастортнэнь марто. Седе сеедьстэ вастневинек Суомистэ, Эстониясто ды лия ёндо сазь инжетнень марто. Ней, монь койсэ, неть сюлмавкстнэ седе лавшомсть. Кода арсят тень коряс?

- Монень истя а маряви. Минь нейгак эзинек лавшомто сюлмавкстнэнь омбо мастортнэнь марто. Ютазь иестэ Финляндиясо топавтынек вейсэнь проект. Сестэ тосо ютасть эрзянь, мокшонь культурань чить. Минь тов якинек эрзянь-мокшонь оршамотнень невтнеме. Теинек выставка, ютавтынек мастер-класст. Мартонок якасть университетсэ тонавтыцят, «Мерема» морокуронь прявтось Екатерина Модина. Мартост ютавтынек ламо вастовомат Финляндиянь Иматра ды Лаппеэнранта оштнесэ. Мельсэнь те шкас ашти умарьковонь (августонь) 5-це чись. Те чистэнть Суоми масторсо тешкстыть раськень оршамонь чинть, рузкс ёвтасынек - День проветривания народного костюма. Се чистэнть миньгак анокстынек кода эряви. Оршамотнень ваномо сакшность пек ламо ломанть. Эйсэст вастынек каванявкс марто. Ярсамопеленть анокстынек эсенек кедьсэ.

- Кинь ярмак лангс якиде Финляндияв?

- Финляндиясо эринек проектэнть лемс максозь ярмак лангс. Ки лангонть пандызе минек университетэсь. Сюкпря тень кис ёвтан ректоронтень С.М. Вдовиннэнь.

- Те корты таго вейкеде, лангозот кемить, содыть, максозь тевенть топавтсак кода эряви. Миньгак кемтяно.

- Сюкпря кемеманть кисэ. Монень пек мельспаро тень кувалма. С.М. Вдовин эзь моле каршо сестэяк, зярдо ёвтасть тензэ, ков арсить тердемс. Мерсь ансяк, келя, сонзэ тевезэ туи, удалдо тулкадемс а эряви.
Ансяк эрьва тевсэ эрявить ломанть. Ськамот ламо а теят. Мон кеман ломантнень лангс. Арсян, вейсэ минь весементь цидярдсынек ды изнятано.

Кортамонть ветясь Раиса ЩАНКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».