Важное


СУНДЕРЬКОВОНЬ 3-це ЧИСТЭ «ШУМБРАТ, МОРДОВИЯ!» РАСЬКЕНЬ ТВОРЧЕСТВАНЬ ФЕСТИВАЛЬСЭНТЬ КОНЦЕРТ НЕВТСЬ ОРДАНЬБУЕНЬ РАЙОНОСЬ. ЧАРЬКОДЕВИ, ТЕНЕНЬ СЫНЬ АНОКСТАСТЬ ЗЯРЫЯ ШКАНЬ ПЕРТЬ. КОЧКАСТЬ ЭРЬВА КОДАТ МОРОТ, ПУТНЕСТЬ КИШТЕМАТ, СТАВТСТЬ МАЗЫЙ ОРШАМОПЕЛЬТЬ.



Орданьбуень Культурань кудонь прявтось Е.Н.Юртанова паро мельсэ ёвтни эрьвадонть, кие роботы мартонзо, кие весе эрямонзо алтызе культурантень. Валонзо коряс, культурань важодицятненень эряви улемс ломанень вечкицякс, панжадо оймекс, маштомс морамо, киштеме ды нурька шкас пурнамс кенярксчи:

– Монь марто важодить алкуксонь профессионалт, весень вечксынь. Саемга, Татьяна Тюгашкина – куш кодамо шкане пшкадть – лезды. Сон важоди ансамблятнень ды ськамост морыцятнень марто. Кода а ледстямс Татьяна Силантьевань? Сон роботы народной театрань режиссёрокс. Паро валт ёвтавлинь Сергей Горохов морыцядонть, конань содасызь кода эсенек районсо, истя жо сонзэ томбалеяк. Сон минек заслуженной Якшаматя весе райононь келес. Чевте седей, паронь арсиця! Ломантне пек лембестэ вастыть Галина Ульянова морыцянть, конань пек паро вайгелезэ, морси ськамонзо ды вети эйкакшонь коллектив. Ды истят валт ёвтавлинь минек эрьва важодицядонть. ДК-со важодицятне анокстыть ломантнень туртов кенярксчи весе седейсэ. Мелят пурнынек «ГородОК» Культурань кудонь базовой коллектив, косо морсить ансамблянь солисттнэ, режиссёртнэ, методисттнэ.

Елена Николаевна истя жо пачтясь, сынь изнясть «Куклыне» някань театрань проектэнть туртов 300 тёжат целковоень покшолмасо Президентэнь грант. Сонзэ вельде бажить пурнамс школасо тонавтниця цёрынетнестэ ды тейтернетнестэ някань театра. Те карми театрань коллектив, кона путовксонзо карми невтнеме районсо эриця весе эйкакштненень: эйдень кужотнева, школатнева. Истямо тевесь канды лезэ кода артисттнэнень, истя ваныцятнененьгак. Кемтяно, проектэсь лиси мельстуиця.

– «ГородОК» ансамблясь пурнавсь мелят. Тосо морсить Культурань кудосо важодицятне, ськамост ды ансамблясо морыцятне. Весемезэ сындест вейксэ ломанть. Репертуарсонок рузонь народной морот: весёлат, пейдевтицят, кенярдовтыцят, конатнень кунсоломсто ломанесь анок сыргамс киштеме. Иень перть минь невтнинек прянок малав весе кенярксчитнесэ, – ёвтни «ГородОК» ансамблянь ветицясь Татьяна Тюгашкина.

Татьяна Ивановна важоди педагогокс музыкальной школасо. Тосо сонзэ ули «Ладушки» эйкакшонь ансамблязо. 11-15 иесэ тейтерькатне морсить эрзянь ды рузонь кельсэ. Тедеде пурнась седе вишкине эйкакшонь состав, кода а кода, эряви одкстомтомс. Морамонь коллективесь аволь весть невтнизе прянзо республикань ды весероссиянь пелькстамотнесэ, улить покш изнявксост. Вейкеяк «Шумбрат, Мордовия!» фестиваль эзь юта сынтемест. Свалшкань участникть. Т.И.Тюгашкина васенце фестивальстэнть саезь, эрьва ие ардтни. Валонзо коряс, полавтовить пелькстамонь вешематне, пштистэ ваныть концертэнть ды номертнэнь мельга. Сынь жо эрьва ие арсить, мейсэ дивавтомс ды кецявтомс ваныцятнень.



Татьяна Тюгашкина чачсь Покш Игнатбуень Киржеманы велесэ. Школадо мейле тонавтнесь Орданьбуень культпросветучилищасо. Мейле прядызе Казанень культурань институтонть. Направлениянь коряс сась важодеме тескень культпросветучилищав. Истя ютасть вейксэ иеть. Зярдо тонавтнема тарканть ютавтызь Саранскоев, сонзэяк тердизь самс эрямо прявт ошов. Тюгашкинтнэ эзть моле, састь мельс кадовомс эсест районсо. Татьяна Ивановна кармась важодеме эйкакшонь искусствань школасо. Мирдезэ, Владимир Васильевич, роботась музыкань тонавтыцякс Орданьбуень школасо. Ней сонгак важоди музыкальной школасо ды, теде башка, вети Низовкань «Цёковне» фольклорной ансамблянть, сон тосо баянист. Лезды тензэ низэяк, кода хормейстер. 2012 иестэ Татьяна Ивановна казевсь «МР-нь культурань заслуженной роботник» лемсэнть. Нама, паро тевензэ кисэ тешкстазь ламо лия наградасояк.

Татьяна МАТОРКИНА
Фототне Э.Ретунскоень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».