Июнень 23-це чистэ юбилеензэ тешксты «Вперёд» Отяжелень райгазетань фотокорреспондентэсь, Мордовия Республикань СМИ-нь заслуженной роботникесь Сергей Чиженков.
Сергей Александрович районной газетасо важодеме кармась эштё школасо тонавтнемстэ. Фотографиятнь теемань вечкемась ютась тензэ тетянзо эйстэ. Александр Чиженков пинге важодсь колхозсо, ютко шкасто лиясто снимсесь ды тейнесь фотографият малавиксэнзэ ды содавиксэнзэ туртов.
Весть кода-бути Сергей цёрынезэ кудопрясто мусь а покш кескавне, косо ульнесь весемесь фотографиянь печатамс. Ули-паронть ванкшномадо мейле сайсь мель варчамс теемс снимкат, конат сеске лиссть парт. Кодашкаль цёрыненть мельспарозо, зярдо васенце фотографиянзо печатызь райгазетасо. Теде мейле сась редакцияв содавиксэкс теевеме. Самай се шкастонть «Советское фото» журналсто редясь яволявтома фотокрреспондентэкс тонавтнеме тердемадо. Мелесь ульнесь истямо покш, мик эзь тандавто се, што тонавтнемс сави пек васоло тиринь кудонть эйстэ – Башкортостанонь прявт ошсо Уфасо. Иень ютазь велявтсь тиринь Мордовияв фотокорреспондентэнь диплом марто. 1991 иень июнень 23-це чистэ сонензэ топодсть 18 иеть, июлень 1-це чистэ саезь сон ушодсь важодеме «Вперёд» райгазетасо.
Тешкстасынек, неень шкасто юткстонок ламот ловить пряст фотонь ды видеонь снимицякс. Ушодовсь те лувось од телефонтнэнь эрямос соваманть марто. А вана ютазь пингень 90-це иетнестэ эрявсь маштомс аволь ансяк снимамо, истя жо пленканть марто видестэ важодеме. Те тевесь топавтовиль васов аволь весенень, эрявсь васняяк покш ёрокчи. Сергей Чиженковнень пек лездасть сеть содамочитне, конатнень максызь тензэ те специальностентень тонавтнемстэ.
«Вперёд» райгазетасо сон важоди колоньгеменде ламо иеть. Те шканть перть тейсь кементь тёжат снимкат раужо-ашо (чёрно-белый) фотографият. 2002 иестэ саезь кармасть нолдамо-тееме цифровой фотоаппаратт. Сынст вельде ков седе шожда кармась теемс эрьва кодат снимкат. Невтемакс, зярдо Атяшево посёлкав нурька шкас сакшнось Московонь ды Весеруссень Иневанькс Патриархось Кирилл, Сергей Чиженков кото минутас кенерсь теемс 100 кадрат, ламот эйстэст лиссть паро качествань. Нать, а стяко «Храм святого апостола Андрея Первозванного» книгантень Сергей Александровичень совасть малав весе фотографиятне, конатнень сон теинзе вете иень перть Атяшево поселкасонть храмонть стявтомсто.
Истя жо сонзэ фотографиятне улить ламо фотоальбомтнесэ ды буклеттнэсэ, конатнень нолдынзе Мордовиянь книгань издательствась.
2007 иестэ Мордовиясо ютавтовсь «Шумбрат, Финно-угрия!» фестивалесь. Те кенярксчинтень республикасонть нолдазель печатень ламо продукция, конатнень ютксо «Шумбрат, Финно-угрия!» фотоальбомось. Сергей Чиженковонь малав 40 снимкат совасть те альбомонтень.
Сергей Александровичень Мордовиясо содасызь, кода тевензэ парсте содыця, ёроков снимкань теиця фотографонть. Сон свал касты содамочинзэ, вешни лиятнень ёнов а молиця важодемань эсензэ кинть. Нама, а стяко ламо иень перть парсте важодеманть кисэ сон казезь: Мордовия Республикань Почётонь грамотасо, Россиянь Журналистэнь союзонь Почётонь грамотасо, ульнесь изницякс «Лучший по профессии» райононь пелькстамосонть, кавксть тензэ максовсь Мордовиянь Журналистэнь союзонь «Лучшая журналистская работа года» конкурсонь лауреатонь почётонь лемесь.
Сергей Александрович аволь ансяк паро снимкасонзо кенярдовты Отяжелень ды республикань весе эрицятнень, «Вперёд» газетань редакциясо сон экономикань отделэнь редактор, 20 ламо иень перть вети «Спорт» рубриканть. Теде башка седейшкава сёрмады важодиця ломантнеде, велесэ эрицятнеде. Колоньгемень иень перть редакциясо важодемстэ сон ардтнизе весе райононть, эрьва велесэнть аволь весть ульнесь. Сядот статьят, репортажт, очеркт сёрмадсь механизатортнэде, комбайнертнэде, паксясо ды фермасо важодицятнеде.
Те эрзянь цёрась эрьва ушодозь тевенть топавты педе-пес, бути косо эряви, ёвтасы мелензэ ды ашти видечинть кисэ. Эрьва тевенть топавты чарькодезь-содазь, эрязасто. Нурькинестэ, алкуксонь журналист, ёроков фотограф.
Мельвановикс Сергей Александрович! «Эрзянь правда» газетань коллективесь ёвты Тенк поздоровт юбилеенк кувалма. Арсетяно кеме шумбрачи, эрямосо уцяска, важодема таркасо од изнявкст! Кадык икелепелевгак Тынк снимкатне ды публикациятне кепетить ёжомарямо, кенярдовтыть ламо ломанть.
Валентина Юдина