Важное
 
Александр Араповонь чачома чистэнзэ 60 иень топодемантень

Шкась аволь моли, ливтязь ливти. Оно уш вейксэ иеть ютасть се шкастонть саезь, кода кулось эрзянь ине поэтэсь Александр Арапов. Эрьге ладсо керьксавить иетне. Ансяк эрьгетне калавтовить ды одов пурнавить, а вана эрямонь иетнень а пурнасыть ды одов а керьксасыть. Ламо ведь чудсь седе мейле, ламо вармат пувасть. Ды ялатеке мон (ды лияткак, кить содасызь Араповонь) а кеман: сон арась ютксонок. «Сятко» журналонь редакцияв совазь, пилесэнь гайги вайгелезэ, кода сон панжилизе эсь нупалень кенкшенть ды серьгедиль: «Совак, Рая. Иля юта вакска!» Алкукс эзилинь ютне нупалензэ вакска. Апак пеле совилинь яла. Ансяк кортнемс кувать тенек эзь савкшно. А ютколь яла. Моньгак аволь свал ульнесь юткошкам: «Эрзянь правдасо» сестэ лужалемс эзть максне, эрьва чистэ строчкат пельденек вешсть. Сашань (истя тензэ эсенек ютксо мернинек) тевензэ седеяк ламольть. Улемс «Сятко» журналонь редакторокс – те аволь каштом лангсо эжнемс. Кодат улить мелявкст те тевсэнть, весе сынь васняяк прыть редакторонть лангс. Сестэ, неявсь тень, Арапов эзь учне: вастови истянь зняро стакачи марто. Секс лиясто вайкснемат-кувсематкак маринь пельдензэ. Весемеде пек сень кувалма: редакторонь тевесь, келя, истя сюлмимим, прянек-пильгенек натой керчимим, а зярдо оймем таргамс, аволь тосо озамс ды сёрмадомс валморот. Истят пелемат монь потсояк ульнесть, зярдо Арапов эсензэ лангс каизе редакторонь ашконть. Видьстэ сельмскак кортнинь тензэ ды аволь весть: «Редакторонь тевесь – аволь тонь, тонь теветь – сёрмадомс, сёрмадомс ды сёрмадомс. Истя, кода тон сёрмадат валморот, пек чуросто чачнить покш раське ютксояк. Эрзятнень туртов тон кучозят эсензэ Инешкипазонть пельде».
«Литова» эрзянь авань вейсэндявксонть ушодксонзо коряс анокстазель ды ютавтозель шкинемань чокшнесь, кона алтазель Александр Араповонь 50 иетненень. Нурькинестэ ёвтнеса, кода сон ютась.

«ОЙМЕСЬ ОЙМСЕМЕ А МАШТЫ»

Истя лемдязель се чокшнесь. Неть валтнэ саезельть эсензэ Араповонь валморосто. Васня арсинек ютавтомс сонзэ чачома велесэнзэ – Дубенкабуень Кобалесэ. Таго мекс эзь лисе. Чокшненть савсь пурнамс Национальной театрасо. Театрань фойесэ анокстазель выставка, косо невтневсть А.Араповонь книганзо, сондензэ сёрмадовкстнэ, конат лиснесть эрьва кодамо журналсо, газетасо. Гайгсть эрзянь морот, конатнень серьгедизь «Ламзурь» ансамблясо морыцятне. Инжетнень каванясть пачалкседе ды брагадо, сынь пидезельть-панезельть «Литова» эрзянь аватнень кедьсэ.

Невтевсь А.Араповонь эрямодо ды шкинемадо нурькине фильма.
Ды вана чокшнесь ушодовсь. Сценанть лангс тердезель сонсь Арапов. Неявсь, прянзо марясь а ёнсто. Таго-мекс нусманяль. Чатьмонезь кунсолось, мезе сондензэ кортасть чокшнень ветицятне, кодат валт ёвтасть лемезэнзэ тердезь инжетне. Валтнэде ёвтазельть аволь аламо. Весе, кить сакшность поздоровонь ёвтамо, тешкстызь, кодамо сон паро поэт, кодамо покш путовкс сон тейсь мокшэрзянь литературантень. Истя улияк. А.Арапов эсензэ творчествасо аволь ансяк сюпалгавтызе мокшэрзянь литературанть, кепедизе сонзэ седеяк вере тёкшс, макссь тензэ од лексема, од вановт, од ойме-ёжо.

Арсесь-арась сон вишка пингестэ: карми поэтэкс? Паряк, сакшность тензэ истят мельть-арсемат. Вейкесь виде: поэзиянь кинть лангс сонзэ чалгавтызе сонсь эрямось, кона зярдояк эзь кольневте эйсэнзэ, ды се, мезе путозель оймезэнзэ тетянзо-аванзо пельде чачома велесэ эрямсто.

Чачсь Саша Арапов Дубенской райононь Кенде велесэ. Тонавтнесь Кобалень школасо, конань прядызе 1977 иестэ. Пурнась-таштась превть М.В.Ломоносов лемсэ МГУ-нь журналистикань факультетсэ. 1985 иестэ сась «Сятко» журналов, косо важодсь куломазонзо (2010 иес).
Эйкакшпингесь, тетянь-авань кудось, тиринь велесь – те се, мезенть поэтэсь свал кирдсь седей маласо. А стяко сон зярыя эсензэ стихотворениянзо алтынзе сыненст.


* * *
Велень ульця – пиже килейть, кальть…
Пирявкс потсто вальмат ёнов ваныть.
Ойме ёжонь ёвтамс арасть валт –
Чатьмонян… Сельведень туемс анокт.
Мелесь – сэрьсэ, сэрьсэ тезэнь прамс –
Луганть лангс, чачома кудом малас,–
Моданть, кона кольневтсь монь, токамс –
Чевтьстэ-чевтьстэ кутмордамс ды паламс.

* * *
Чачома веле… Тесэ тантей коштось.
Истямо тантей: лексят – а лексеват.
Ютан эсень ульцява – Паксяпева,
Маряви малавиксэкс эрьва чочкось.
Кудотне весе эсест лемсэ кадовсть –
Васяень, Галань, Шипагань, Шаргаень…
Сынст ютксо ансяк минекесь полавтовсь.
Миинек… Эх… Аштеде, варштавкс каян.

Неть валтнэнь пес а мезе поладомс. Сынст эйсэ ёвтазь се, мезе поэтэнть седейсэ: вечкема, ризнэма ды певтеме сэредькс эсензэ чачома кудонть кувалма.
Весе, мезе ули Александр Араповонь эйсэ – парось, валдось, сась тензэ, эсензэ поэтэнть валонзо коряс, покштянзо, аванзо ды тетянзо пельде. Тетязо, Василий Павлович, зярыя иеть тонавтсь пакшат Кобалень школасо. Ламонень сон макссь превть-содамочить, ламонь стявтынзе виде ки лангс. А стяко сондензэ марят ансяк паро валт. Цёразо Саша истя жо эрямонзо перть ванстынзе сеть валдо ёжомарямотнень, конатне склень пештясть седеензэ эсензэ сехте малавикс ломанензэ туртов.

Эрьва ломаненть эрямосо сехте а стувтовикс шкась, те, зярдо тонавтнесь школасо. Александр Арапов истя жо зярдояк эзинзе стувтне сеть иетнень, зярдо аштесь школань парта экшсэ. Секс истя лембестэ сёрмадсь школань иетнеде «Течи – школав!» валморосонзо.
Арапов – поэт, кинь Пазось казизе панжадо седейсэ, валдо оймесэ. Сонзэ эрямонь коекс ульнесь – маштомс марямо лиянь сэредькст, ёвтамс вал сетнень кисэ, кинь эйстэ уцяскась велявтсь кутьмере ёндо, редямс ды а чатьмонемс сестэ, зярдо вастоват авидечинть, мельтемечинть, азортомочинть ды эрямосо лия асатыкстнэнь марто. Пштистэ ды апак пеле сон сялды салыцятнень, прябезарькстнэнь, ансяк эсь пряст кисэ эрицятнень. Саемс «Азор» валморонть. Вейке валморосонть келес панжозь ломанень обуцясь.
Апак ризнэ, сэредьксэнь апак маря а ловновить поэтэнть истят валморонзо, кода «Моро Санядо», «Демяшкин Шурань ледстнемга», «Тесэ ним монь», «Мороз Витя мельга», «Лейтенант» ды ламо лиятнень. Ризнэма сайтянзат Араповонь таго вейке валморонзо ловномсто, конань сон лемдизе вейке валсо – «Иван»:

«Аштеде! Учомизь! Мон сан!» –
Серьгедсь ды тусь войнав Иван.
Учость, начтсть тодовт секе-тев –
Иван эзь велявто мекев.
Эзь стя, эзь ара кудо куншкас,
Эзизь кутморда: «Сыть, Ванюшка…»
Эзть кепедть самонь кисэ цярка,
Эзть аца тензэ чевте тарка.
А сёрма пельдензэ нурькине,
А эйкакш кадовсь, а калмине.
«Аштеде! Учомизь! Мон сан!..»
Манинзе роднянзо Иван.

Сонзэ творчествасо башка тарка саи авань тематикась. Аванть поэтэсь невти аволь ансяк мазычинзэ ёндо ды аволь ансяк кода вечкемань казиця, цёрань седеень солавтыця ломанекс. Авась – те, васняяк, эрямонь максыця, эйдень триця, кинь лавтов лангс пракшныть певтеме стакачить, мелявкст ды ризнэмат.

Сонзэ эрьва стихотворениясь – те сэредькс, ризнэма сетнень кувалма, кить эрямост перть кандыть стака сталмо, те – певтеме мелявтома эсенек раськенть, тиринь келенть кисэ.
Эрзянь масторсо телетне рузонь,
Моротне – рузонь,
Сёрматне – рузокс,
Ансяк лайшемась – эсенек.

Ниле строчкат, ды кодамо домка смусть сынь кандыть!
Эсензэ поэтэнть эрямонзо а ловсак шождакс. Стакачитне керчасть эйсэнзэ эрьва ёндо. Ульнесть шкат, зярдо сехте малавикс ялгатне велявтнесть эйстэнзэ. Поэтэсь ялатеке эзь мендяво. Сон ялатеке кемсь ды кеми: аволь весе ломантне чопода ды нулгодьксэв ойметь. Эсензэ стихтнесэ ёвты седейшкавань сюкпря сетненень, кить сехте стака шкастояк ульнесть вакссонзо, эзизь кадно ды эзизь стувтне.

Александр Арапов аволь сеть сёрмадейтнень юткстоль, кить капшильть сёрмадомс ламо ды апак лотксе. Арапов эрьва валонть, эрьва сёрмадовксонть васня парынестэ арсилизе, онкстнилизе, пувсилизе-вадяшализе, муиль тензэ эрявикс тарка ды ансяк теде мейле макссылизе ловныцятненень. Секс, паряк, эрямонзо перть сон нолдась ансяк ниле книгат. Сынь весе лемдязь башка смусть марто вейке валсо: «Вайгель» (1990), «Вальма» (1992), «Взмах» (2004) ды «Мейле» (2006).
Кодамо поэт, кона эзь сёрмадо вечкемадо? Те сехте мазый ды валдо ёжомарямось – вечкемась – юты Араповонь весе творчестванзо пачк. «Вечкемадо»:

Умок кадызе мирдезэ,
Сон ськамонзо свадьбас сась…
Стясь столь экшстэ ды кедьсэнзэ
Пейдезь-раказь ахолдась.
Ахолдась келейстэ: «Кие
Каршом киштеме карми?!»
Ды – киштеме… Сорны киякс,
Аволь састыне сорны.
Весе чарькодить ды содыть:
Стака тензэ. Сон жо: «Эй!
Аравтынк пластинканть одов,
Вельть уш токновты седей!»
Од церась кончтась ёнонзо,
Панар ожат илештясь.
Но эзь цидярдо каршонзо –
Эземс вийтеме озась.
Авась туеме анокстась…
Зярдо састо ушов лиссь,
Од церась мельганзо ношкстась
Ильтямонзо кудо видьс.
Чевтьстэ кедензэ путынзе
Аванть лавтовонзо лангс.
Ансяк сеск мекев саинзе –
Пштистэ авань сельмтне вансть.
Пешксеть сельведте, сэредькстэ,
Эйстэст лайшема марявсь…
Цёрась авантень эзь эце,
Цёрась чатьмонезь велявтсь.
Кельме варма пицесь аванть,
Теке кеж сонензэ пандсь…
Авась кувсезь мольсь кияванть,
Стака вечкеманзо кандсь.
Седей потсо кандсь часия –
Толнэ, вечкема умонь.
Арсесь церась: «Эх, бу кие
Истя вечкевлимим монь…»

Весе теде кортазель А.Араповонь 50 иень юбилеентень алтазь чокшнестэнть. Кортась сонсь поэтэськак. Ловнось валморот, седейшкавань сюкпрят каясь сонзэ лемс ёвтазь лембе ды паро валтнэнь кис. Кияк превскак эзь сайне: а ютыть кавто иетькак, куломась (зыянось лиссь 2011 иень июнень 14-це чистэ) сайсы эрзянь пародояк паро поэтэнть Александр Араповонь. Те апаро кулянть марязь, весе ризнэсть а ёвтавияк кода. Неть ризнэматне нейгак пештить седеенек. Вейксэ иетнень перть, зяро ютасть куломадонзо мейле, зяро таго сёрмадоволь од валморот, ды, нама, седеяк вере тёкшс кепедевлизе эрзянь поэзиянть. Тень кувалма ансяк каднови янксемс ды путомс кемемат одтнэнь лангс, кить поладыть сонзэ тевенть.

Раиса ЩАНКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».