Ицялбуень С. М. Киров лемсэ педагогической колледжесь панжовсь 1930 иестэ Рождественасо ды течис аноксты республиканть туртов вадря тонавтыцят. Тонавтнема кудонть улеманзо перть тестэ лиссть малав кемень тёжат студентт. Вейке тёжась эйстэдест – отличникть. Ды те пек парсте невти тесэнь тонавтыцятнень ине важодемаст.
Педколледжентень 90-де ламо иеть. Сонзэ пек сюпав историязо ды, стакачитнень лангс апак вано, ламодояк ламо изнявксонзо. Эрямо кинзэ лангс стякшность весе шкань мелявкстнэ: коллективизациясь, Ине Отечественной войнась, войнадо мейлень стака иетне, перестройкась – весе неть стакачитнень сестэнь училищась, а ней колледжесь, ютынзе прянь апак нолда.
Тесэ тонавтнесть Мордовиянь ды сонзэ томбаленьгак истят содавикс ломанть, кода народной художниктне лелят-ялакст Александр ды Владимир Шадринтнэ, МР-нь заслуженной художникесь Анатолий Баргов, МР-нь заслуженной поэтэсь Геннадий Гребенцов. Ютксонок ней арась народной писателесь Александр Доронин. А умок тусь эрямосто 1941–1945 иетнень войнань ды трудонь подвигень мемориальной музеень прявтось Николай Кручинкин, конась истя жо прядызе Ицялбуень педколледженть. Учёнойтнень ютксто ледстяви М. И. Ломшин. Государственной аппаратонь ветицятнестэ – Г. А. Лотванова. А сатыть газетань лопатне, штобу ледстямс весе заслуженной тонавтыцятнень. Ламотне эйстэдест – цела династият. Эрямось весень сравтнинзе масторганть, ансяк эрьвасонть кадовсь Ицялбуень педколледжень тонавтыцятнень лембест ды максозь содамочист. Нама, педколледжесь – те талантонь кузниця, косо тонавтыцятне бажить панжомс эрьва тонавтницянть ёрокчинзэ, конат пек маштовить тензэ седе тов важодеманзо перть.
Кавксошка иеде икеле колледжень вейке юбилейстэ педагогической трудонь ветеранось А.А. Сурайкина ёвтакшнось истят лембе валт: «Педучилищась – те монь эрямом. Сонензэ алтынь 25 иеть. Сонзэ прядызе авам, мейле мон ды монь эйкакшом. Весе минь важодинек специальностенек коряс. Истя лиссь педагогонь цела династия. Минек седейтнесэ свал палы вечкема ды мельванома те тонавтнема таркантень, ды весе тесэнь важодицятнеяк кармасть миненек тиринь ломанекс…»
Неень шкасто педколледжесь максы образования зярыя специальносттнень коряс, истят, кода: дошкольной образования, изобразительной искусства ды черчения, физической культура, графической дизайн, информационной системат ды программирования. Тонавтнемань шкась 9-це ды 11-це класстнэде мейле 3 иеть 10 ковт.
Ней тесэнь прявтось – Алексей Иванович Овтайкин, конань кедь ало важодить малав колоньгемень тонавтыцят. Прявтонь полавтыцятне: Татьяна Сергеевна Пискайкина (тонавтомань важодеманть коряс), Николай Викторович Рябов (административно-хозяйственной пельксэнть коряс) ды Тамара Петровна Мар ушева (воспитательной важодеманть коряс), конань марто минь кортнинекак педколледженть эрямодо.
– Тамара Петровна, Ицялонь педколледжень лемесь гайги весе республиканть келес. Кодат невтевкстнэ теде кортыть?
– Республикасонок 27 колледжт. Эрьва ие минь соватано Мордовиянь колмо сехте вадрятнень юткс. Мейстэ те неяви? Ули республикань колледжтнень важодемань аравтлув, косо яволявтовить эрьва кодат конкурст ды мероприятият. Цётыя, мелят весе ютавтозь мероприятиятнестэ пеледест ламотнесэ минь ульнинек изницят ды призёрт. Ды ков бу аволинек моле, эрьва косо вастыть эйсэнек кода виев пелькстыцятнень, казнень ды васенце таркань саицятнень.
Тонавтнема иенть прядовомсто эрсить предметной олимпиадат, конатнесэ студенттнэ сайнить ламо призовой таркат. Улить аволь ансяк региональной изнявксонок, истя жо весероссиянь ды раськеютконьгак. Те корты педколлективенть виев важодемадо, конась машты анокстамо покш содамочи марто тонавтницят.
– Косто сыть тенк тонавтнеме од ломантне?
– Тезэнь тонавтнеме сакшныть аволь ансяк Мордовиянь районтнэстэ, истя жо Нижегородской областьстэ, натой Сибирьстэ (кинь тесэ улить роднянзо), улить Сочистэяк ды ламо лия таркасто. Те иестэ тонавтницятнень ютксо редяви истямо паро статистика: васенце курсонь студенттнэнь эйстэ ламотне – неень ды икелень педагогонок эйкакшост. Истя жо икелень выпускникенек эйкакшост. Те пек кецявты – поладовить тонавтыцянь династиятне. Зярдо соват аудиторияс ды кевкстят: кепединк кеденк, кинь малавиксэнзэ тесэ тонавтнесть? Ды истя ламотне кепедить кедть, натой дивсетяно. Икелеяк ульнесть истят тонавтницят, а вана тедеде сехте ламо эйстэдест.
– Косо эрить студенттнэ?
– Кемлясо ули общежитиянок. Васенце этажсо эрить цёрынеть, омбоцесэнть – тейтерькат. Нама, ашти ве ёно. Штобу тов пачкодемс, эряви ютамс колмо велеть… Ламотненень вечкеви эрямс вейсэнь кудосо. Нама, улить «кудонь» эйкакшт. Сыненст общежитиясь свал маряви шалтто пешксе, сынь вешнить лия эрямо тарка, туить квартирав. Улить истят, кить эрить родняст кедьсэ.
– Кодат педколледженть коензэ?
– Кода эрьва образовательной заведениясо, минекак улить мероприятиянок, конат ютавтневить эрьва иестэ: Тонавтыцянь чись, Од иесь ды седе тов. Эрьва иестэ ютавттано мероприятият сеть выпускниктнень ледстнемга, конат маштовсть те или тона тюрематнесэ. Ризксэнтень, неть лемтне ламолгадыть. Истя, те иень тундосто Украинасо маштовсть выпускникенек Василий Королёв, седе икеле Григорий Сурайкин. Ули меленек панжомс сыненст мемориальной лазт.
2001 иестэ саезь педколледжсэнек важоди «Поиск» отрядось, конань ушодокшнызе Н. А. Кручинкин. Сон ульнесь минек выпускникенек, ды ней минь весе Мордовиянть марто печтятано седейризкс туеманзо кувалма. Отрядонок свал явовиль лиятнеде, авторитетэст ульнесь истямо покш, натой прявттнэ свал мартост шумбракстнесть кедте. Паряк, секс, што сынь студентт, лиятне жо зярс школьникть.
Истя жо улить вожатоень отрядонок. Эрьва иестэ ардтнетяно важодеме лагерев. «Алатырь» санаториясояк улить вожатоенек.
Зярдояк эзь сезневе волонтёрской, икеле – тимуровской, лезксэнек. А умок 1-це курсонть марто кортнинь: минек улить аволь ансяк сёрмадозь закононок, истя жо апак сёрмадояк, конатнень коряс эрятано. Свал мерян студенттнэнень – эрьвась эйстэнек волонтёр. Бути мезеяк эряви, мольтяно ды тейсынек эрявикс тевенть. Монень свал пек вечкеви студенттнэнь седеймарямост. Ансяк мерят тенст, эряви киненьгак лездамс, сеске молить ды лездыть. А умок пурнынек книгат Донбассонь эйкакштненень, кодынек алтымат, кучнинек посылкат ды сёрмат фронтов.
– Кода важодтядо «стака» обуця студенттнэнь марто?
– Улить истят тонавтницят, конат ушодыть верьга кандомо пряст, те яла эрси Ицялонсетнень марто, конат эрить теске, секскак арсить, сынь тесэ «азорт», ды ве ёндо сазтнень лангс кармить ваномо верде алов. Мартост ютавтнетяно покш кортнемат. Тешкстатано – минек тесэ паро студентэкс, авторитетэкс, ловови се, конась мезеяк теи-важоди превсэ-кедьсэ, аволь кие эсь прянзо верьга канды. Ды сынь мейле чарькодить: эсь прянть эряви кастомс мейсэяк вадрясо, паро тевсэ, кандомс лезэ тиринь колледжентень. Лиясто сынськак сыть, кармить вешеме тев эли ёвтыть меньгак од лув.
– Эрсить истят тевть, зярдо тонавтницянть паньсызь тонавтнемстэ?
– Лиснить истят тевтькак, зярдо теить кодаткак апаро тевть. Ансяк те пек чуросто эрси. Лиясто чарькодить: аволь сынст таркась эли а те факультетэсь кочказь. Эрси, кияк туи эрямо лия таркав ды кадсы тонавтнеманзо. Ансяк истятнэде пек аламо. Улить истят тевть, зярдо эйкакшось ськамонзо ававтомо кодаяк а тонады эрямо. Саемга, мелят тусь дошкольной факультетстэ вейке тейтерька. Кудовтомо эрямось тензэ марявсь пек стакакс, чистэ авардсь ды савсь тензэ кадомс тонавтнеманть.
– Кода колледжсэнть ашти тевесь тиринь келенть ды культуранть марто?
– Раськень кевкстемась колледжсэнек а стувтневи зярдояк. Морот, валморот, киштемат ды седе тов – истят номерт совавттано эрьва мероприятияс, свал бажатано ванстомс тиринь койтнень-кирдатнень. Од ломантненень эряви содамс, минь эрятано Мордовиясо, кодамо тесэ келесь, культурась... Истя жо ардтнетяно республикань пелькстамотнес, косо эряви келень содамочи. Тосояк изнякшнотано.
– Сюкпря, Тамара Петровна, истямо лембе кортнеманть кис! Тынь истя оймень путозь ёвтниде студенттнэде, прок эрьвась эсь эйкакшонк. Ней чарькодеви, кодат покш седей марто тонавтыцят важодить тынк педколледжсэ! Ансяк истятнэнь вельде лисить эсь тевень вечкиця алкуксонь ломанть.
Марина Слугина