Вторник, марта 19, 2024
Важное



ЗОРЬКИНА Раиса Сергеевна, Саранск ошонь 91 № эйдень кужосо музыкань тонавтыця.
– Раиса Сергеевна, содан, тон ламо иеть важодить Саранск ошонь 86 № эйдень кужосо.

– Истя. Саранск ошонь 86-це кужонтень эсень эрямостон максынь колоньгемень иеть.


– Колоньгемень иеть! Те, эряви меремс, аволь аламо. Аламошка ёвтнек, кода тосо ветить тевтнень эйкакштнень марто? Мезе тосо од ладявкшнось тонь пингстэ?

– Мезе ёвтнемс? Ушодса, паряк, сень эйстэ. Монень маряви, 86-це эйдень кужосо минь васенцекс ушодынек ютавтомо эрьва кодат вастовомат эрзянь койтнень-кирдатнень коряс. Те ульнесь 1990-це иетнестэ. Кода содасынк, масторсонок ладявкшность од шкат. Минек раськень ломантнеяк марясть пряст лиякс, седе покш мель кармасть явомо эсест келентень, сонзэ ванстомантень. Карминек миньгак анокстамо васенце кенярксчинть. Ды сеске эшкевинек стакачис. Эйкакштнень а мейсэль оршавтомс. Сынст туртов эрявсть эрзянь оршамкат. Мезе теемс? Ушодынек вешнеме эсенек кудова. Лездасть тетятне-аватне. Оршамотне лиссть, видьстэ мерян, аволь истят, кодат эрявсть. Пелест мокшонь, пелест эрзянь. Мейле маринь, лия эйдень кужотнесэ, кинь азорокс лововсь кодамояк сюпав предприятия, ставтсть паро оршамопельть. Карминь сынст кедьстэ вешеме. Весть, кавксть пшкалинь, мейле – чирьстэ кармасть ваномо лангозон. Мерян, истя тевесь а моли. Тердинь весень: эряви минстенек стамс. Шкатне сестэ пек стакальть! «Резинотехника» заводсто содавикс ломанень вельде муинек аволь питней коцтке, конань макснесть тенст станоконь нардтнемс-ванськавтомс. Те коцтось кодазель чуросто. Тюсозояк аволь пек ашоль. Ялатеке сон маштовсь оршамопелень стамс. Те шкас а стувтса, кода эйсэст стынек. Мон вень вешкат эзинь удсе. Стакшнынь-каярдынь эйсэст.

– Зяро эйкакшонь оршавтомс стыде панарт-руцят?

– Кавксо тейтерькань, кавксо – цёрынькань.
– А вана, ёвтык, кие кармавтыдизь кундамс те тевентень? Шкась истямоль эли тонсь эсеть мельсэ кармить?

– А содангак. Паряк, шкаськак истямоль. Эрьва косо ансяк рузонь кельсэ весемесь мольсь. Эрзянь кельсэ мезеяк арасель. Секс, паряк, превезэнь сась мелесь терявтомс эрзянь кельсэ ютавтомс мезеяк. Тевенек тусть. Минек сеске редимизь. Кармасть сакшномо телевидениясто. Сыненсткак а мезель невтнемс. Мейле аламонь-аламонь музей пурнынек-теинек. Тозонь кандынек минсь кинь мезезэ ульнесь. Теинек каштланго, лангозонзо озавтынек атя. Масторо – пряха, экшсэнзэ ава штерди. Вана истя ветинек тевенек. Седе мейле кармасть эйсэнек тердтнеме эрьва ков. Пионерэнь кудов, лия таркав. Весть, те ульнесь кеменьшка иеде теде икеле, кочкакшнымизь Эрзянь, мокшонь раськень V Инекужов. Тосо вейке ава (Пензасто эли лия таркасто) стясь ды кармась пеняцямо: минек, келя, мезенекак арасть. Каренек арасть, оршамопеленек арасть, невтемс тенек а мезе. Тесэ вакссон аштицясь мери, стяк, ёвтак каршо вал. Яволявтызе монь лемем. Стинь. Мерян: садо 86-це эйдень кужов. Минек весеменек ули.

– Мон содан, весементь туртов, мезе ютавтыде, сценарийтнень сёрмадыть тонсь. Якить библиотекав, вешнить, косо мезе сёрмадозь минек койтнеде. Содан, неть сценарийтне лиссть башка книгас.

– Истя. Сценарийтнень савсь сёрмадомс эстень. Кой-кить тандавтнесть, келя, ютавтнемс чокшнеть ды лият мезть эрзянь кельсэ – те аволь эрьванть мельс туи. Эсь пачкан арсян: «вансынек». Зярдо ушодынек, эйкакштне истямо покш мельсэ кармасть тонавтнеме эрзянь морот ды киштемат, натой рузонсетнеяк. Вейке тейтерькась татаронь раськестэль. Кодаяк эзть тонавтневе тензэ татаронь кельсэ морот. А вана максынь эрзянь кельсэ вейке моро, тонавтнизе пек шождасто. Тетятне-аватне каршо эзть моле. Мекевлангт, лездасть эрьва мейсэ. Истямо ладсо тусь тевенек ды аволь беряньстэ. Иезэнзэ кенеринек тонавтнеме кеменьшка морот эрзянь кельсэ.

– Ней шкатне таго полавтовсть. Мезесь тонеть маряви парокс, мезесь – берянекс неень шкастонть?

– Парокс лован сень: ней весе эйкакштне оршазь. «Шумбрат, Мордовия!» фестивальсэ ванат, весень лангсо оршамотне цитнезь-цитнить. Икеле истя арасель. А вана моротнень коряс меревлинь истя: седе ламо гайгить рузонь. Эрзянь моротнеде пек аламо. Концертэнь перть вейке эли кавто ды весе. Эйкакштне седе сеедьстэ киштить. Морот морыть пек чуросто.

– Валморотнеде кортамскак а мезть. Сынст косояк а ловныть. Мельсэнь те шкас кирдян вишка цёрыненть, лемезэ Саша Савинов. Кода сон ловнось валморот эрзянь кельсэ! Сонсь сэрьс а покшкель. Теке марто мездеяк а виздицяль. Валморотнень пеште ладсо чулгонесь. Тонавтыцясь ульнить, содан, тон.

– Саша Савинов алкукс монь кедьсэ тонавтнесь. Колмо иесэ ветизь минек кужос. Пек превейнель. Максат тензэ тонавтнемс валморо, сеске тонавтнесы. Весть вейке концертсэ сцена лангс нолдамс минек кадымизь меельцекс. Учоманть эйстэ вием допрок маштокшность. Саша якиль сценанть удалга, мучкиль таго-мезть, кевкстниль эйсэнь: те мезе, тона мезе. Эзинь цидярдо, меринь режиссёронтень, мезекс кадымизь меельцекс. Режиссёрось каршон: те секс – тынк сехте вадря номерэнк. Истя ульнеськак. Весе залось стядо цяпась Савиновнень.

– Те таго корты седе, эйкакштнень марто аволь уш истя стака муемс вейкине кель-вал. Ламот жо пеняцить: келя, а эйкакштнень, а тетятнень-аватнень арась мелест тонавтнемс тиринь кель.

– Истя кортыцятне кенгелить. Эйкакштне зярдояк а кармить молеме каршо. Карминдерят сынст марто тевенть ветямо паро ладсо, сынь весе оймест путсызь. Зярдо оршат лангозост эрзянь оршамот, сынст сельместкак кармить цитнеме, эсь пряст артистэкс кармить марямо. Мон стакачить эйкакштнень марто эзинь нее. Моротнень таргсинь эрьва косто. Конатнень монсь содынь, конатнень тонавтнинь. Эйкакштнеяк мартон тонавтнесть.

– Тонь туемадот мейле 86-це эйдень кужосо кияк вети моронь тонавтоманть?

– Арась. Арсян, эйдень лия кужотнесэяк аламо косо эйкакштнень тонавтыть тиринь кельсэ морамо ды кортамо. Паряк, кой-косо морсить вейке-кавто морот, а вана истят кенярксчить, кодат минь ютавтнинек, косояк арасть. Мон ютавтынь кемгавтово чокшнеть ды вастовомат.

– Течи ушодсы важодеманзо Эрзянь-мокшонь раськень VII Инекужось. Кода арсят, кодат кевкстемат эрявить кепедемс, конат улевельть сюлмавозь эйдень кужотнень марто?

– Неть кевкстематнеде ламо. Васняяк эрьва эйдень кужосо улевельть тиринь келень кужинеть. Эйкакштнень тонавтомат аволь ансяк киштеме, эрявить тонавтомс тиринь кельсэ морамо, валморонь ёвтнеме.

– Воспитательтнень ды тонавтыцятнень мелест кепедемга, паряк, пандомс тенст седе ламо?

– Тень мельга ваност эйдень кужонь прявттнэ. Косо валсо шнамс, косо – ярмаксо. Те весе, нама, кепедьсызь тонавтыцятнень мелест, ды сынь седе оймень путозь кармить ветямо тевест. Сынсь тонавтыцятнеяк ветяст пряст седе олясто, авольть визде эсест кельдест. Бути сынсь эрзятне кармить перьгедеме эсест келенть эйстэ, сестэ паронть а мезть учнемс. Илязо лепамо весе се, мезесь ушодозель ютазь пингень вейксэньгеменце иетнестэ саезь. Весемеде пек истят таркатнесэ, косо трить-кастыть эйкакшт. Эйдень кужось, кода лисьмапрясь, косто ушодови эрьва леенть чудемазо. Кодамо карми ведезэ, истямо карми лееськак.

Кортамонть ветясь
Раиса ЩАНКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».