Четверг, февраля 22, 2024
Важное

Отяжелень средней школасо улемстэ теевинек содавиксэкс тесэнь тонавтыцятнень марто, кить весе седеест максыть эйкакштненень.


Тесэ тонавтнить 135 эйкакшт. Ботужелесэ ули структурной подразделенияст, тосо школась основной, 27 тонавтницят. Весе неть школатнесэ ветяви эрзянь келесь ды тиринь литературась.

Эряви меремс, тонавтомань таркась важодемасонзо прявтокс кочкинзе
этнокультурной ды патриотической ёнкстнэнь Отяжелень школасонть роботыть 22 тонавтыцят. Эрьвась важоди специальностензэ коряс. Тезэнь свал сакшныть од специалистт.
Истя, мелят састь филолог ды физрук. Коллегатне паро мельсэ лездыть од тонавтыцятненень аволь шожда тевсэст.
– Коллективенек вадря, вейке-вейкенек ютксо ули чарькодема ды
ялгаксчи. Неть ломантнень марто топавтовить валдо мельтне, сехте
паро тевтне. Эрьвась ламо виензэ путы школань тевтненень, эйкакштнень марто важодемантень. Паро лезкс максыть од тонавтыцятне. Сынст пельде – од арсемат, конатнень совавттано эрямос, – ёвтни Отяжелень средней школань прявтось Геннадий Васильевич Москаев.

Те школасонть васенце классо тонавтнемстэ саезь эйкакштнень
а кирдить ансяк классо, сынст сеедьстэ усксить экскурсияв, эрьва
кодамо пелькстамов, концертэв, экспедицияв. Кеместэ ладязь патриотической ёнксонь коряс тевтне. Тесэ важоди «Отечество»
отрядось, конань прявтсо Л. А. Федотова. Тонавтницятне-поисковиктне ардтнить Россиянь келес экспедицияв, конкурсов. Эрьва ие ардтнить пелькстамо Казанев. Сехте покш изнявксост – те «Орлёнок» эйкакшонь
Весероссиянь лагерев эрьва иестэ путёвкань изнямотне. Парсте невтить пряст эйкакштне школань олимпиадатнесэ. Тедеде ульнесть изнямонь кавто таркат весероссиянь олимпиадасо ды вете – регионъютконь.
– Эйкакштненень эряви содамс эсь ундоксост, келест, историяст. Тень кувалма аштевельть каштанчисэ. Минь, тонавтыцятне, бажатано теемс весементь, ансяк школась улевель бу эйкакштнень туртов вечкевикс таркакс. Тесэ а мезде пелемс, тесэ сынст кияк а покордасынзе, – корты
Геннадий Москаев.

Ды те аволь стяконь валт. Школасонть тонавтнить лавшо шумбрачи марто зярыя эйкакшт, ютксост эрьва кодамо категориянь инвалидт. Тонавтыцятне важодить мартост башка программань коряс. Ды кияк учительтнень, эйкакштнень эйстэ а яви эйсэст. Ули покш ялгаксчи ды чарькодема. Аволь умок вейке тейтернесь лездась а нолдамс ушосо толонть, пачтясь теде покштненень. МР-ва Россиянь МЧС-нь Главной управлениянть пельде сонзэ лемс школав сась Благодарность.
Школав сеедьстэ сакшныть инжеть, нама, аволь чавонь кедь марто. Улкоть ульнесть казне марто волонтёрт, сындест икеле – прокуратурасто. Школань прявтонть Г. В. Москаевень ули эсензэ ладязь коезэ: зярдо мезеньгак кисэ тонавтницясь казеви, сон эрьва грамотанть марто венсти шоколад. Кадык те вишка казнесэнть витеви
эйкакшонть ёжозо, чачи мелезэ седе товгак невтемс прянзо ды
ёрокчинзэ.

Истя жо тесэ паро мельсэ вастыть икелень иетнестэ школань
прядыцятнень. Сынь вечкить совсеме школав, кортнеме тонавтыцяст
марто. Аволь умок вейке истямо выпускникесь макссь школантень
лезкс, ярмактнень арсеви ютавтомс килангонь пандомс, ковгак ускомс эйкакштнень. Тельня школань тонавтницятнень тердтнизь оймсеме Каменкав, косо стявтозь сокссо кирякстнемань таркась. Те паро тевенть лездась теемс школань выпускникест. А стувтнить вечкевикс школаст поисковиктнеяк, сынь сакшныть, гайневтить теле-фонсо, кевкстнить, кодамо лезкс эряви. Койсэнек, аволь эрьва школасо ладязь истямо ялгаксчи. Се лембесь, конань тонавтыцятне максыть эйкакштненень, велявты тенст мекев.

Г. В. Москаев чачсь Отяжбуень Лига посёлкинесэ. Армиядо мейле
кармась важодеме «Вперёд» райононь газетасо фотокорреспондентэкс. Сон эйкакшпингстэ саезь пек вечксь снимамонь тевенть. Редакциясо улемстэ, кучизь тонавтнеме.
Цёрась заочна прядызе Н. П. Огарёв лемсэ МГУ-нь филологиянь
факультетэнть, те шкас паро валсо ледстни вузонь тонавтыцянзо.
Седе тов ие важодсь райкомонь комсомолонь васенце секретарекс. Теде мейле, валонзо коряс, ве иес сась школав. Ды – кадовсь. Ней уш колоньгемень иеть важоди школасо. 2009 иестэ саезь – школань
прявт.

Ольга Александровна Писчаскина вети эйкакштненень эрзянь келень ды тиринь литературань урокт. Чачсь сон теске, Отяжелесэ. Школанть прядомадо мейле мольсь тонавтнеме М. Е. Евсевьев лемсэ МГПИ-нь (ней – МГПУ) филологиянь факультетэв. Прядызе ды сась важодеме теке школантень, косо сонсь тонавтнесь ды пурнась превть. Ней уш 28 иеть тонавты эйкакштнень вечкеме эрзянь келенть.
– Мон ветян эрзянь кель ды литература 5-це, 6-це, 9-це класстнэсэ. Недлязонзо кавто част. Нама, те аламо. Эйкакштне мельспаросо сакшныть уроктнес. Пек вечкеви тенст, зярдо тевс нолдавить компьютерной технологиятне, ванкшнотано мезеяк экрансто. Вишка
класстнэнь марто вантано «Куйгорож» мультфильманть. Мекс уш а
теить лия истят мультфильмат эйкакштненень? Тонавтницятне вейкетстить сонзэ рузонь ёвкстнэнь марто. Кона валось а чарькодеви – кевкстить монь, толковаса, – ёвтни Ольга Александровна.

Эряви меремс, Отяжелень средней школасо ули эрзянь келень уроконь башка кабинет. 2018 иестэ сон натой лиснесь изницякс «Эрзянь келень
сехте паро кабинет» республикань пелькстамосо. Тесэ улить писательтнень портретэст, эрявикс литература, кезэрень ули-парот, конатнень кандызь эйкакштне ды тетятне-аватне. Тагояк ризнэвти, тетятне-аватне кудосо а кортыть эйкакшост марто эрзякс.
Сыненст школасо стака тонавтнемс. Ялатеке ютксост улить эрзянь келень парсте содыцят ды натой стихень сёрмадыцят. Саемга, 9-це классо тонавтницясь Ирина Потапова. Сон изнясь васенце тарка тиринь литературань коряс регионъютконь олимпиадасо
ды колмоце тарка творческой секциясо. Ирина сёрмады стихотвореният, варчни виензэ ёвтнемань сёрмадомасояк. Материалонзо лиснесть «Чилисема» журналсо ды минек газетасо. Олимпиадав тонавтыцясь сайни аволь свал некеть эйкакштнень, лиятненьгак. Сынь весе парсте пряст невтить уроктнесэ ды республикань пелькстамотнесэ.

О. А. Писчаскина вети школасонть «Цёковне» драмкружок. Эйкакштне путнить сценкат, ловныть стихть ды морыть морот. Аволь умок путнизь С. Люлякинань «Авань седей» сценканть. Районсо саизь колмоце тарканть. Куронтень якить 5-11-це класстнэсэ тонавтницятне. Сынь пурнавкшныть недлязонзо весть ды мельстуезь ютавтыть шканть. Иезэнзэ весть бажить путомс мезеяк покш, школань кенярксчитнес анокстыть эрьва кодат номерт. Мелят Никул Эркаень ледстнемга пелькстамов кучнесть видео, сайсть васенце тарка.

Тедеде 9-це классонь малав весе прядыцятне (11 ломань) экзаменэкс кочкизь эрзянь келенть.
Сынь кармить сёрмадомо изложения, мейле сонзэ коряс сочинения-рассуждения. Ниле тонавтницят кочкизь тиринь литературанть, сыненст эряви сёрмадомс сочинения.

Ольга Александровна кавксть пелькстась «Эрзянь келень ды литературань сехте паро тонавтыця» конкурссо. 2015 иестэ сон лиснесь
вете изницятнень юткс ды якась прянзо невтеме Московов. Тосо
ютась Тиринь келень тонавтыцятнень весероссиянь конкурсонь
этапось. Сизьгемень тонавтыцятнень ютксто ниленьгемень ютасть
финалс. Ютксост ульнесь эрзянь келень тонавтыцяськак. Сон ветясь
урок, невтизе визитканзо, презентациянзо, ёвтнесь методической
лувтнеде. Мордовиясто мартонзо ульнесть эрзянь келень тонавтыцясь С. Ю. Дмитриева ды рузонь келень кавто тонавтыцят.

О.А. Писчаскина ламо иень перть парсте важодеманзо кисэ казезь МР-нь Прявтонть пельде грантсо (2014), МР-нь Прявтонь Благодарностьсэ,
тешкстазь «Лучший по профессии» райононь пелькстамосо.

Теке жо школасонть эрзянь кель ды литература комсте ламо
иеть вети Любовь Михайловна Русяева. Минек газетась уш сёрмалесь эйстэнзэ. Сонгак ламо важоди эйкакштнень марто, аноксты сынст
олимпиадатнес. Л. М. Русяева лиснесь финалистэкс «Учитель года
Республики Мордовия – 2010» конкурссонть, 2017 иестэ пелькстась
«Эрзянь ды мокшонь келень сехте паро тонавтыця» конкурссонть.
Лидия Геннадьевна Фролкина – начальной классонь тонавтыця. Сон иень перть 4-це классонь тонавтницянзо марто явсь мель «Орлята России» проектэнтень.

«Орлята России» – эйкакшонь Весероссиянь организация. Эрьва
ковсто эйкакштне тейсть заданият: «Орлёнок-лидер», «Орлёнок-эрудит», «Орлёнок-мастер» ды седе тов. Классонть мельга ванкшность эрьва кодамо критериянь коряс. Эйкакштне вейсэ, покш ялгаксчисэ тейнесть заданиятнень. Сынь изнясть ды июлень 9-22-це читнестэ молить оймсеме Ицялбуень «Вастома» лагерев.

Татьяна Маторкина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».