Ольга Васильевна ды Сергей Викторович Зубковтне вейсэ эрить 25 иеде ламо. Сынь трить-кастыть вете эйкакшт. Ней уш чачсь васенце нуцькасткак. Ламо эйкакшонь триця авась кенери эрьва ков: сон касты-тонавты эйдензэ, важоди домкомокс ды, теде башка, ули оймень коряс тевезэ – пиди-пани ломантненень тортт ды лия ламбамо казнеть. Минь вастовкшнынек сонзэ марто ды мельспаросо кортнинек.
Ольга Васильевна чачсь Нижегородской областень Первомайск ошсо. Саранскоев сась 34 № торговой училищасо тонавтнеме, конань прядызе якстере диплом марто. Минек ошсто вастызе вечкевиксэнзэ, вастневсть пельиень перть ды уш 18 иесэ лиссь мирденень. Ледстни, кода мирдезэ васенцеде саизе велев, косо содавтызь бабанзо. Сонензэ сестэ ульнесть малав 90 иеть, сон чачтсь-кастсь сисем эйкакшт. Сергей мерсь бабанстэнь, келя, сонгак бажи пурнамс покш семия. Весе пейдезевсть ды стувтызь тень. Шкась мольсь, семиясь покшолгадсь, мельтне-валтнэ топавтовсть. Васня од семиясь тукшнось эрямо Нижегородской областев, мейле велявтсть мекев Саранскоев. Тесэ, кода од семия, стясть ипотекань коряс очередьс. Ольга натой тукшнось зярс-бути важодеме Московов, эрявсь таштамс васенце пандомантень ярмакт. Эйкакшонзо мельга вансть авазо ды ававтозо.
– Васенце цёранок, Максим, чачсь 1999 иестэ. Тонавтнесь Россиянь правовой академиясо. Сонзэ ней ули эсензэ семиязо. 2003 иестэ чачсь Дарья тейтеренек. Сон якстере диплом марто прядсь художественной школа, явсь мель спортивной гимнастикантень. Ней тонавтни Н. П. Огарёв лемсэ МГУ-нь архитектурно-строительной факультетэнь колмоце курссо. Группасост староста, общественной тевень топавтыця. Эрьва ков кенери. Ардтнесь Сочив, косо ютась Од ломанень масторлангонь фестивалесь, сайнизь ВДНХ-нь «Россия» выставкав.
2007 иестэ чачсь Никита. Сон сисем иеть явсь мель эй лангсо фигурной кирякстнемантень. Мейле савсь кадомс, эрявсь анокстамс школань экзаментнэс. Ней тонавтни Саранскоень Кооперативной институтсо. 2018 иестэ чачсь Илья, 2021 иестэ – Арсений. Сынь якить эйдень кужов. Яла учинек эштё вейке тейтерне. УЗИ-сэ мерсть: таго цёрыне. Авардезевинь. Мирдем оймавтымим, сонсь пек бажась кастомс кавто тейтерть. Сюкпря Пазонтень, мирдем понгсь алкуксонь. Лезды эрьва мейсэ: ваны эйкакштнень мельга, ветни эйдень кужов ды мекев, муськи, шли, налкси, пидемеяк машты. Валске ды чокшне якси кисканть марто ушова. Ризнэвти, важоди лия ошсо ды ансяк ковозонзо кемень чить эрси кудосо. Паро, тельня макснить тензэ отпуск. Сон роботы асфальтобетононь ацыцянь машинистэнь лездыцякс, теить федеральной кить.
Васенце цёранок, Максимень, ули эсензэ семиязо. Лиссь, теке фильматнесэ, урьванть марто ве шкане яксинек пешксесэ, врачтне чевтинестэ пеедькшнесть лангсонок. Васня мон чачтынь, сон – кавто недлянь ютазь.
– Ольга Васильевна, эйкакштнень трямосо-кастомасо мезентень явтадо седе покш мель?
– Васняяк, тонавттано эйсэст свал улемс вейсэ, лездамс вейке-вейкенень. Кадык покштне свал лездыть вишка ялаксост туртов. Зярдо касыть – оймсема читнестэ сакшновольть тетяст-аваст варштамо. Бути туить эрямо лия ошка – кадык а стувтнить вейке-вейкеде. Ялгатне ансяк зярыя шкас ялгат. Сазортнэ ды ялакстнэ – малавикс ломанть. Кенярксчитнестэ свал эряви пурнавомс вейс.
Эряви меремс, Ольга Васильевнань сазорозо Наталья истя жо ламо эйкакшонь триця ава. Сон эри Нижегородской областьсэ, ниле эйкакшонзо: колмо тейтерензэ ды вейке цёрынезэ.
Декретсэ улемстэ Ольга Зубкова кармась тонавтнеме кондитерэнь тевентень. Артомо машты ды вечки эйкакш пингестэ саезь, тортонь теемстэ те пек маштовсь. Васня пидиль-паниль тортт малавиксэнзэ туртов. Мейле кармась ялгатненень ды содавикстнэнень. Седе тов Дарья тейтерезэ мерсь панжомс Интернетсэ лопине, конань вельде микшнемс торттнэнь. Неень шкане те тевесь вешевикс, ламот истя важодить. Авась васня виздсь. Тейтересь оймавтызе, сонсь панжсь Интернетсэ лопине, мейле группаяк, ков кармасть путнеме торттнэнь фотографиятнень. Ломантне ушодсть заказонь тееме. Ольга Васильевна васенце шкастонть натой валскес ванкшнось Интернетсэ тортонь панемань урокт ды мастер-класст, ванкшнось информация. Чить кундыль тевс, варчиль тееме. Тортонь панемс эрявикс ярсамопельтнень рамси лавкатнестэ, кочки качествань коряс сехте партнэнь. Рамась тортонь кирдемс башка холодильник ды морозильной камера, конатнесэ кизна кельмевти торттнэс эрьва кодат ягодат. Аволь умок энялдсть теемс покш торт свадьбав. Авась колмо веть эзь удо – котьмась тортонть велькссэ. Мелявтсь, те ульнесь васенце торт, конань тейсь свадьбав. Теизе весе седейстэ. Одтнэнень ды инжетненень сон мельс пек тусь, паронзо пандызь.
Истя жо сон тейни зефирт. Сынст седе пек вешить кизна. Ладсесы вишка паргинева эли теи зефиртнэде цецяпусмо. Аёвтавикс кодамо мазычи! А содат, ярсамс эли ваномс пусмонть лангс. Валонзо коряс, зефиртнэнь теемс а шожда, коштось улезэ аволь летьке ды аволь коське. Покш мелезэ рамамс эждемка марто планетарной миксер, сестэ тевесь сырги седе куроксто. Кой-кить вешить теемс шоколадонь фигуркат. Ней варчась панемс имбирень пряникат. Ольга Васильевна ёвтызе салавань мелензэ-бажамонзо: панжомс эйкакшонь кафе. Мукшнось таркаяк, ансяк кудонь азортнэ стясть каршо: пельсть, тов кармить пурнавомо симицят-лытыцят.
Ольга Зубкова малав 16 иеть важоди домкомокс. Сынст кудосо 95 квартират ды малав 170 кудазорт. Чарькодеви, те тевентень аволь эрьвась анок кундамс. Авась неть иетнень перть весень марто мусь кель-вал. Соды, кие кодамо квартирасо эри, кода лемест, кодат коммунальной мелявкст лиснесть сынст. Ломантне пшкалить тензэ эрьва мезень коряс: потомсь канализациясь, квартиратнесэ якшамо эли сиведезь квартиратнесэ моли шалт. Сонсь пшкали управляющей компаниянтень ды лия организациятненень, зярс тевезэ а лиси – а ойми сонсь ды киньгак а кадсынзе оймамо. Кудонтень комсь иеть, ней бажи полавтомс подвалсо трубатнень. Якась Капитальной ремонтонь фондов, кевкстнесь, зярдо мереви саемс ярмактнень. Зярыя иень перть эрицятнень марто бажить теемс эйкакшонь площадка. Ансяк кодаяк а совавтыть эйсэст программас. Мейсэ тевесь? Сынст модань участкасонть аштить ниле кудот ды вейкесь эйстэст документтнэнь коряс апак педявто вейсэнь участкантень. Те кевкстеманть эряви витемс ды ансяк сестэ совавтсызь программантень. Тень коряс сон апак лотксе вастневи чиновниктнень марто. Аволь умок кортнесь Саранск ошонь округонь Депутатонь советэнь председателенть Т.И. Шукшина марто. Сон алтась лездамс. Кудосост эрить ламо эйкакшт ды весе тетятне-аватне пек учить эйкакшонь налксема тарка.
Истя жо сон умок бажи теемс Кудонь кенярксчи: пурнамс кизна сынст кудонь эрицятнень вейсэнь покш чис. Ломантне аволь весть пшкалесть тень коряс. Ольга Васильевна уш нейке анок пидемс-панемс ламбамо ярсамопельть, тердемс морыцят, ютавтомс пелькстамот ды налксемат.
Авась кудонть перька сонсь озавтни цецят. Свал бажи ваньксчинтень ды мазычинтень. Васня озавтсь ламо розат, ансяк кельмесь чавинзе. Эрьва иестэ мукшны-рамси цецянь од сортт. Сёксня уш озавтсь одт, пек мелезэнзэ тусть «петушиные гребешки» цецятне. Лиясто тензэ лездамо лиснить эрицятнеяк. Кудонть икельга ваньксчинть мельга ваны дворникест, подъездтнэнь шли-нарды уборщица, ламо иень перть теке ломанесь, кона теи тевензэ парсте. Кудонь эрицятне Од иентень натой пурнасть тенст премия.
2022 иестэ, Авань чистэнть, конась ютась Республикань Кудосо, Ольга Васильевна казевсь ламо эйкакшонь парсте трямонь-кастомань кисэ 3-це степенень дипломсо. Аватнень казинзе МР-нь Прявтось А. А. Здунов. Тедеде, Семиянь иестэнть, Зубковтнень тердтнить семиянь ламо кенярксчитнес. Ольга Васильевна, кода алкуксонь ава, паро азорава, ёвтни, кода трямс-кастомс ламо эйкакшт. Валонзо коряс, а эряви пелемс стакачитнеде, а мезть ризнэмс седе, мезде кортыть ломантне тонь удало. Пазось макссь уцяска ды сонзэ эряви ванстомс!
Татьяна Маторкина