Исяк, маень 24-це чистэ, юбилеензэ тешкстызе Эрзянь ды мокшонь раськень регионъютконь общественной вейсэндявксонь ответственной секретаресь, эрзянь мазый авась Татьяна Ширманкина.

Татьяна Тимофеевна чачсь-кассь Кочкурбуень Пакся Тавла велесэ. Семиясост трявсть кото эйкакшт. Вете цёрат, Таня ськамонзоль тейтерне. Аванзо Надежда Андреевнань туртов сон ульнесь васенце лездыцякс.

Школань прядомадо мейле мольсь тонавтнеме Орданьбуень культпросветучилищав, седе тов прядызе Н. П. Огарёв лемсэ МГУ-нь Раськень культурань институтонть. Важодсь ошонь Октябрьской райононь культурань отделэнь прявтокс, теде мейле – МР-нь Культурань, раськень политикань ды архивень тевень министерствасо консультантокс.

Те авась пек эряза, ёроков, минутаяк истяк а аштеви ве таркасо. Покш мель яви спортонтень: ардтни сокссо, велосипедсэ. Пек вечки морамо. Те сяткинесь сатотсь тензэ аванзо пельде. Татьяна кувать морсесь Пакся Тавлань «Норовава» ансамблясо.

Т. Т. Ширманкина бажи седе сеедьстэ сакшномс тиринь велев, кизна эрьва оймсема читнестэ тосо. Видькстась, велесэ сонзэ ули кизэнь кудынезэ ды банязо. Сон озавтни эмежть ды цецят. Сонськак моли мазый цецине ёнов – ёлганя рунго ды свал мизолдыця, канды кеняркс ды паро ёжо весе малавиксэнзэ туртов. Сонзэ кавто эйкакшонзо, кавто нуцьканзо.

Чачома чи марто, Татьяна Тимофеевна! Уледе шумбра, уцяскав, кадык топавтовить весе меленк-бажамонк!

Сондензэ седе келейстэ ловнодо сы номерстэнть.