Пятница, августа 07, 2020
Важное



Кезэрень шкасто саезь минек пряпотмосонок кемекставсь арсема: велесэ эрямсто тевтне певтеметь, тосо ломантненень арась шка оймсемс ды седейшкава ютавтомс шканть. Те алкукс истя. А пек капшить велень мазый читнень ванкшномо ошонь эрицятнеяк. Икеле сынь седе сеедьстэ ардсть-ливтясть омбо масторов, лембе таркав.


Те иень тундосто саезь ламось полавтовсь эрямосонок, апаро орманть (коронавирусонть) марто вастовомадо мейле ламотнень юткстонок аволь ансяк питнейчитне полавтовсть, истя жо карминек лиякс ваномо республикань томбале отпусконть ютавтоманзо лангс. Паряк, сась шка эсенек Мордовиянь мазый таркатнень, кезэрень храмтнень ды ламо лия, эштё тенек а содавикс культурань объекттнэнь содавтомс. Сыргамс тов вейсэ эйкакшонок, нуцьканок эли важодема таркасо коллективенек марто, се шкастонть, зярдо лавшомгадыть пандемиянь казямо вешематне.

Течи минек ловныцянок содавтсынек Ичалкань муниципальной райононь Администрациянь территориянь мазый ды кезэрень таркатнень марто. Неть читнестэ те паро тевенть лездасть тенек топавтомс Мордовиясо ОНФ-нь региононь прявттнэ, кить сайсть мель ванкшномс, мезе течи ули райцентратнесэ ды васоло велетнесэ. Вейсэ ОНФ-нь минек региононь прявтонть Н.А.Сайгачевань, те общественной вейсэндявксонь сопредседательтнень О.А.Каштановонь ды Л.Н.Нарбековань марто цела чи ютавтынек мазый, лиятнень ёнов аламо мейсэ молиця Ицяло ёнкссонть. Ульнинек кезэрень кавто покш церьковатнесэ: Михайло-Архангелэнь ды Пазонь Авань роштовань (рождества Пресвятой Богородицы), кавто музейтнесэ: краеведческой ды башка ломанень коллекциянь, Московонь ды весерусень иневанькс кирилл Патриархонть покштянзо кудосо, «Смольный» национальной парксонть, иневанькс Филарет монахонть ознома таркасонзо, конась лемдеви «крута пандо», ды эштё ламо лия мазый таркатнесэ, косо анокт вастомс весень, кинь ули мелезэ содамс тиринь ёнксонть ды Мордовиянть историянзо, ледстневиця тарканзо.

КЕЗЭРЕНЬ ШКАДО КАРМАТАНО СОДАМО МУЗЕЙСТЭ

Кемля посёлкань куншкакуросо Культурань центрань омбоце этажсо панжозь краеведениянь музеесь. Сехте кезэрень экспонатось - бронзасто теезь котёлось, конась кандови минек эрань 1 тёжат шкантень. Сон муезель Старолузинский калмазырень таркасто.
Музеентень казицязо -Григорий Сурайкин. Сон образованиянь коряс ульнесь археологокс.

Ризксэнтень, те од ломаненть эрямозо сезевсь а шкастонзо... Овсе одсто сон маштовсь Донецкой Республикасо.
Музеев сыцятне муить кезэрень ламо кедьёнкст, оршамопельть. Тесэ келейстэ невтезь Ине Отечественной войнань шкась. Кемля ды Ицяло велетнень историяст ланга ули истямо пачтямо: кезэрень шкасто саезь те шкас неть велетнень явсь ил марто лейне. Эрзянь мазый тейтересь, рузонь цёра экшс лисемстэ, ютась ялго те леенть трокс. Апак учне одирьванть вейке пильгесь пезнась леентень. Цёрась снартсь лездамс нинтень, таргамс ке-мензэ. Сестэ озатясь мерсь тенст, келя, те ведьавась веши казне, бути а кадсак тензэ, сестэ савтсыть кежензэ. Теде мейле стамбарнэ поладсь, седе паро ули, бути омбоцентькак тов каямс. Истя тейстькак одтнэ. Теде мейле леентень кармасть мереме «Кем латко», теке лементь путызь велентеньгак, шкань ютазь кармасть тензэ мереме Кемля.

ПАТРИАРХОНТЬ ПОКШТЯНО-БАБАНЗО КУДОСЬ

2017 иестэ Оброчное велесэ, зярдо Саранскоень епархиясь рамизе Московонь ды весе Русень иневанькс Патриархонть Кириллэнь покштянзо-бабанзо кудонть, икелень фотографиятнень коряс ушодовсь сонзэ теемазо ды одкстомтомазо. Кода пачтясь тенек Пазонь Авань Роштовань храмонь настоятелесь о.Иоанн, важодемась пек покшоль - весементь удалась вельмевтемс икелень ладсо, меельце эскень пес. Виде, икелень азортнэ ламо тосо кенерсть полавтомо, допрок калавтызь каштомонть, весементь кудопотмосо теекшнизь неень шкантень ладицякс. Ансяк иеде ламо шкань перть аволь ансяк кудопотмосонть весемесь теезель истя, кода ульнесь Патриархонть вишка порань ледстнемасонзо, кудонть перька кудось вельмевтезельть садпиресь, пирявкстнэ, лисьмась...

Маряви, кудопотмосонть коштоськак допрок лия, сон прок минек канды сеть кезэрень шкатненень.
Теде ёвтнить кавонест комнататнесэ кезэрень пазаватне, стенатнесэ артовкстнэ ды кудонь азортнэде ёвтниця фотографиятне. Те кудостонть туемстэ о.Иоанн панжизе удалце кудосо аштиця покш горобиянть ды кескавнестэ явшесь тенек конфеткат, кода свал тейнесь священнослужителей Василий Степанович Гундяев, иневанькс Патриархонть покштязо. Тосто туемстэ арсезевинек, кода а покшке кудосонть трявсть-кастовсть мик кавксо эйкакшт, кить, ояксчисэ эрязь, те шкас ванстызь тиринь модантень, касома таркантень ды Пазонтень вечкеманть.

МИХАЙЛО-АРХАНГЕЛЭНЬ ХРАМОСЬ

Те кезэрень храмонтень покш читнестэ ды кенярксчитнестэ Пазонь литургияс сакшныть ламо ломанть аволь ансяк те ёнксонь эрицятнень ютксто, истя жо весе республикастонть. Кода пачтясь тенек Михайло-Архангелэнь храмонь настоятелесь Сергей Сакович, эйдень лемдеме масторонь кодамо ошсто ансяк а сакшныть тенст. Невтемакс, те кажов орманть ушодовомадо икеле истямо энялдома марто тензэ пшкалесть Москов, Нижний Новгород, Санкт-Петербург, Мурманск, Красноярск ошсто сыця инжетне. Отец Сергий ёвтнесь, аволь умок эйкакшонь лемдемань коряс тенст пшкадсть те ёнксонь икелень эрицятне. Сынь военнойть ды эрить Саха-линэнь ёнксонь Курилэнь усиятнень Шикотан таркасонть. Арсемаст толковизь истя: зярдо-бути тетянок-аванок минек лемдимизь тесэ, кадык ней эйкакшонокак вийть пурныть те храмстонть.
Те храмонть стявтомась ушодовсь 1902 иестэ Пазнэнь кемицятнень ды те ёнксонь эрицятнень ярмакост лангс. 1916 иестэ важодематне тосо лоткавтовсть Васенце мировой войнанть кувалма. Тень лангс апак вано, тевтне тосо поладовсть се шкастонтькак, зярдо властенть саизь большевиктне. Настоятеленть пачтямонзо коряс, прявт пельксэсь алтавсь Михаил Архистратигенть лемс, эштё кавто пелькстнэ - Покровонь Ине Пазонь Авантень ды Николай Чудотворецнэнь. Храмось светязель 1920 иестэ, баягань тарканть кенерсть кепедемс ансяк кавто ярусос. Колоньгеменце иетнестэ церьковась а кувать шкас пекстазель.

1946 иестэ тосо таго ушодовсть службатне, конат поладовить те шкас. Аволь пек умок Сергий протоиереенть бажамонзо ды седеймариця ломантнень лезксэст вельде теевсь баягань кепедема таркась. Те храмсонть, кезэрень пазаватнеде башка, ванстовить иневанькс Филарет Ичалковскоень (1835-1913) пельксэнзэ (мощатне). Эрямсто сонзэ покш путовксозо ульнесь те храмонть стявтомо ушодовомасонть. Се шкань ломантнень ледстнематнес кадовсь виде эрямосонзо, седейшкава Пазнэнь кемемасонзо, лиятнень лецямо маштомасонзо.
Кортыть, нейгак сонзэ раканть велькссэ аштицятнень топавтовить мелест, лецявить ормаст.

Ней те храмсонть ютавтовить одкстомтомань тевть.

ПАЗОНЬ АВАНЬ РОШТОВАНЬ ХРАМОСЬ

А юткошканть лангс апак вано, седейшкава вастымизь Пазонь Авань Роштовань храмонь настоятелесь протоиереесь Иоанн (Просвирнин). Мордовиясо те вейкине храм, косо ульнекшнесь ды ознось содавикс поэтэсь А.С.Пушкин, зярдо сакшнось инжекс Кемляв сюпавтненень Коротковтненень ды Филосовтненень. Те велесэнть чачсь ды церьковасонть лемдезель ине поэтэнть племянникезэ Анатолий Львович Пушкин. Тесэ сонзэ соборовизь ды 1903 иестэ ильтизь меельце ки лангов.

Колоньгеменце иетнестэ церьковась пекстазель ды максозель хозяйственной тевтнень топавтомс. Советской властень меельце иетнестэ тосо ульнесь библиотека.

Пазнэнь кемицятненень сон велявтозель 2000 иестэ, витнемань тевтнень прядовомадост мейле ушодовсть службатне, конат ютавтовить те шкас.

КОЛЛЕКЦИЯНТЬ ПУРНЫ НИЛЕНЬГЕМЕНЬ ИЕТЬ

Ицяло ёнксонь Калыша велесэ улемстэ пек дивавтымизь отец Сергиень (Саковичень) паро тевензэ. Сон тосо панжсь Вселенской кото соборонь иневанькс тетятнень лемсэ православной церьковань приход. Куш тов озномо якицятнеде, кода Калыша велесэ эрицятнедеяк, пек аламо, ялатеке весе покш читнестэ ютавтовить службат. Те кудонь храмсонть истямо сэтьме ды лембе, прок эйкакшпингес эрьвась юткстонок велявтсь. Теке жо зданиясонть минек учось алкуксонь кеняркс, кода неинек малав кавто тёжань эрьва кодамо маркань модельной автомобильть. Неть модельтнень пурнамо сон ушодсь сисемшка иесэ. Те шкас тензэ эзь стувтово, зярдо тетянзо Георгий Сакович марто рамизь лавкасто васенце мотокоробканть, косо аштесь аволь налкшке, а модель, конань эйстэ эрявсь пурнамс «Ладанть». Теде мейле ушодовсь о.Сергиень вечкевикс тевесь, кармасть теньсэ тензэ лездамо весе малавиксэнзэ, эрьвась бажась сюпалгавтомс коллекциянзо.

«СМОЛЬНЫЙ» ПАРКСО ОЙМСЕМА ТАРКАТНЕ ЛАМОЛГАВТОВИТЬ

Ицяло ёнксонь «Смольный» национальной парконь территориясь иень эрьва кодамо шкасто кенярдовты кода те райононь эрицятнень, истя ве ёндо сыцятненьгак. Аволь умок, тосо строявиця Визит-центранть маласо, сэрей пичетнень ютксо ушодовсь эко-парконь теемась. Весе сыцятненень аравтовить оймсема эземть, чокшне ланга тува якицятненень таркась валдомгавтови.

Пертьпельксэнь музеенть ванкшномадо мейле, инжетне ванькс коштто лексеме сыть лиятнень ёнов а молиця се таркантень, косо экспонаттнэ нилексть-ветексть седе покшолгавтозь. Неть - кезэрень сярдонь сюротне, мамонтонь пейтне ды истя седе тов. Парксонть карми улеме ванькс эрьке, ков арсить нолдамс идем нармунть.

Валентина ЮДИНА.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».