Пятница, августа 14, 2020
Важное

Ломантнень ютксо умок уш ладявсь истямо кортамо, улемс ламо эйкакшонь триця авакс – те пек стака, эдь тевтнеде ламолгадыть зярыяксть ды ярмаконь кевкстемаськак ашти седе пштистэ.
Ансяк вана колмо ды седе ламо эйкакшонь триця аватне ловить лиякс. Сынь содыть, трямс зярыя эйкакштнень седе шожда вейкенть коряс, вечкемась ды уцяскась жо покш семиясо вельти весе стакачитнень ды мелявкстнэнь.
Отяжбуень Сабанцелесэ ули семия, конадонть можна меремс: «Сон – невтема ламотнень туртов!» Течи минь содавтадызь Алексей ды Анна Максимовтнень семиянть марто, конась алкукс лемдеви кемекс ды ояксчисэ эрицякс. Сынст кудосонть уцяскадонть зярыяксть седе ламо Сабанцелень лия семиятнень коряс. Ды те уцяскась эйкакштнесэ, конатнеде Максимовтнень семиясо течи кото.

Зярдо минь ульнинек инжекс те семиянть кедьсэ, азорось Алексей Александрович кудосо арасель ульнесь важодема таркасо. Алексей Максимов – эксперт-криминалист РФ-нь МВД-нь «Ардатовский» полициянь межмуниципальной отделсэнть. Секскак ламо эйкакшонь семиянть эрямодонзо миненек ёвтнесь кудазоравась – Анна Александровна.

Те тейтерь-аванть лангс ваномсто стака меремс, сон ламо эйкакшонь триця-кастыця ава: сэтьме ды мизолдыця, корты састо ды мезеяк лангс а пеняци. Сон – азорава, конань лангсо кирдеви кудось. Ды, теке шкасто, кото эйкакшонь авась овсе а невти сизезекс. Эйкакштнень трямось-кастомась сонзэ туртов аволь стакачи, покш уцяска.

– Иестэ иес мон седеяк чарькодян – кодат уцяскавтано ды сюпавтано минь мирдем марто. Содамс седе, што тон учат эйкакш, ловомс недлят ды чить, неемс васенцеде эйкакшонть, саемс сонзэ кедь лангс, неемс кода эйкакштне вечкить вейке-вейкень, кода налксить, неемс кода вечкевиксэть карми мелявтыця тетякс – те весемесь а ёвтавикс ды мезе вакскак а ладявикс мельёжо. Ды тень кисэ мон ёвтан покш сюкпря Пазонтень ды уцяскантень, – тешксты Анна Максимова.

Анна чачсь-кассь Московсо. Эрясь ды тонавтнесь покш ошсо, теевемс велень эрицякс зярдояк превсэнзэяк арасель. Нама, велень эрямодонть содась, оймсема шкантькак лиясто тосо ютавтсь. Тетязо ульнесь Отяжеле ёнксонь Ботужелень. Роднятнеде тесэ ульнесть ламо, секскак тейтересь сеедьстэ тей сакшныль инжекс. Тесэ вастовськак вечкевиксэнзэ ды сы шкань мирдензэ Алексей марто. Сон ульнесь теке райононь Шейн-Майдан велестэ. Вечкемась курок малавгавтынзе ды вейсэндинзе од ломантнень. Зярыя шкань ютазь сынь налксесть свадьба. Чачсь васенце эйкакшост. Шкась ютась, эйкакшось аламодо кассь ды Анна лиссь роботамо. Профессиянть тейтерь-авась эстензэ кочкась а шожда. Сон – кинолог. Ды кода тешксты, те тевенть кочкизе а стяко. Аннань тетязо ды авазо внутренней тевень органтнэсэ важодсть весе эрямост перть. Тетязо сэтьмечинть кисэ максызе эсь эрямонтькак.

– Роботамс жо савсь аволь кувать, – корты Анна Максимова. – Мельга-мельцек чачить лия эйкакштне ды важодеманть зярс савсь стувтомс. Ансяк тень коряс овсе а янксян. Эдь монь ули ков седе покш ды эрявикс тевем – улемс авакс.

Кода уш тешкстынек икеле, Максимовтнень семиясо касыть кото эйкакшт. Покшось Александр тонавтни 4-це классо. Сон аванзо туртов васенце лездыця. Бути эряви вишкинетнень мельгаяк ваны, кудоютконь тевтненьгак топавты. Полина, Вера, Надежда ды Никита якить эйдень кужов. Сехте вишкинесь Иван, аванзо марто кудосо. Сонензэ весемезэ ие ды кавто ковт.

– Эйкакштнень мартояк, кудоютконь тевсэяк пек лездыть мирдем ды авам Ирина Сергеевна. Мирдем лангс пек кеман. Сонзэ марто весе мелявкстнэ ды стакачитне изнявить шождасто. Пек лездыть эйкакштнеяк. Ве ёндо, паряк, маряви, эйкакштне саить ламо. Ансяк, лия ёндо варштазь – максыть седеяк ламо. Сынь максыть вийть эсь мизолкссост, ёрокчисэст, эрязачисэст. Истямо уцяска ды мельспаро неемс кода кенярдыть, пейдить, марямс сынст мельспаронть ды вечкеманть. Тень а полавтсы мезеськак, – кемексты Анна Максимова.
Эрьва тевсэнть улить оймсема чить. Покш семиянь аванть истят чить арасть. Анна свал тевсэ, свал арси, мелявты. Эрьва чистэ эряви теемс ламодояк ламо тевть – эйкакштне свал вешить ванома. Эрьванть марто эряви кортамс, налксемс, эрьванть эряви кунсоломс, шлямс, оршамс, андомс, мадстемс. Кудонть ванськавтомс, муськемс, пидемс-панемс мезеяк тантейне. Ды сонзэ туртов те весемесь — уцяска.

Ламо эйкакшонь триця семиясь эсь уцясканть теи эсь кедтнесэ. Эрямосонть Алексей ды Анна Максимовтне тонадсть кемеме эсь вийтнес. Сынст, кода ламот велень эрицятнень, эсест хозяйстваст. Трить сеят, реветь, тувот, улить саразост. Сывелесь ды ловсось семиянтень саты. Ули аволь вишкине пиресткак, косо аволь ансяк эсест туртов кастыть эмежтнень, ракшатнень андомга виднить сюрояк, тикшеяк. Ды тешкстыть, мезеньгак апак тее вадрясто эрямо а кармат.

Теке марто Максимовтне тешкстыть эйкакш марто семиятненень государстванть пельде лезксэнтькак. Сыненст, кода ламот лия семиятнененьгак, максовсть федеральной ды республиканской авань капиталтнэ. Неть ярмактнень лангс семиясь арси рамамс вадря кудо. Пек кенярдовтызь Максимовтнень од законтнэяк, конатнень Россиянь Президентэсь В.В.Путин кемекстынзе семиятненень лездамга. Васняяк тесэ тешкстызь вишка классонь тонавтницятнень ярмактомо андоманть. Иеде иес школав якицятнеде семиясонть ламолгадыть ды те законось Максимовтненень карми покш лезксэкс.

Кортыть, эрьва семиянть эсензэ уцясказо. Максимовтнень семиянть сехте покш уцяскась – эйкакштне. Ды, эряви меремс, неть эйкакштне уцяска целанек весе Сабанцеленть туртов. Эдь зярдо велесэнть улить эйкакшт, роботы эйдень кужось ды школась, эри сонсь велеськак.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».