Важное

 

А кемевияк: Кузьма Григорьевич Абрамовнень, кинь марто теке аволь умок вастневкшнинек, топодсть сядо вете иеть. Эрямсто сонензэ максозельть ламо лемть ды тевензэ тешкставкст: ульнесь республикань заслуженной (1964), народной писатель (1985), МАССР-нь Государственной премиянь лауреат (1977), Мордовия Республикань Почетной гражданин (2000). Ансяк весемеде покшокс ды содавиксэкс эрямонзо перть ульнесь вейке лемезэ: Кузьма Абрамов. Те лементь содылизь Россиянть келес ды мик Советской Союзонть келес. Неень шкань эрзянь литературасонть арась истя вадрясто сёрмадыця, кодамокс ульнесь XX пингестэнть Кузьма Григорьевич Абрамов.

Кияк зняро книгат эзь сёрмадо. Кияк истя васов эзь варшта эрзянь раськень кезэрень пингес, масторлангонть келес эзь ёвтне минек весемеде содавикс цёрадонть, скульптордонть Степан Эрьзядо, эзинзе невте истямо келейчисэ – эрьва кодамо шкасто ды эрямо лувсо – эрзятнень, сынст обуцяст-оймест, эрямо лувост-ладост. Сонзэ книгань геройтнень марто ловныцясь васты Батыень чопода вийтнень ды изнясынзе. Капши лездамо Разиннэнь ды стявты-кепеди заводт, изни стакадояк стака войнатнесэ, вешни кить-янт неень эрямонь стакачитнень изнямсто. Эрьзя марто сон неи Рименть ды Париженть, модань сокицянть марто лекси Сура чирень лугань ды сыргозиця паксянь кошттонть, масторонть ванстыця ушманонть марто Москов ало мари сезневиця снарядтнэнь вачкодькстнэнь, концлагерень стакачитнень печтицянть марто сими вирень лисьмапрясто сиянь ведте. Кузьма Абрамовонь книгатнесэ свал ёвтневи мокшэрзянь ёнксонь ломанде, конань потмонзо-седеензэ пештить Мастораванть санга молиця вийтне, сон, эрзянь ломанесь, кассь Мастораванть элесэ, пертьпельксстэнть, кезерень историястонть ды культурастонть саинзе сеть лия ёнов а молиця  ёнкстнэнь, конат эйсэнзэ явить лия раськетнень эйстэ. Те чарькодьксчись сы аволь сеске ды сови эйзэнек аволь истяк, превтнень, тонавтнеманть, сюпав эрямонть вельде, сон моли Мастораванть пельде, санга, кезэрень шкатнестэ течис, ломаньстэ ломаньс, покштясто тетяс, тетясто  цёрас ды истя ульнесь ды свал карми улеме.

Сёрмадыцясь – раськенть превезэ ды оймезэ, сонзэ произведениятнень ловнозь, минь седе парсте ушодтано эсенек чарькодеме. К.Г.Абрамов эсь произведениятнесэ алкукскак панжизе эсензэ раськенть оймензэ, невтизе сонзэ чачонзо модамасторонть келес содавикс ине скульпторонть Степан Эрьзянь, 1670 иестэ крестьянонь войнань ушмопрявтонть Акай Боляевень, эрзянь раськень вейсэндицянть ды идицянть Пургазонь вельде… Теде башка, сонзэ произведениятнень пачк нетяно лия обуцянь ды арсемань коряс тенек малавикс ды аволь малавикс ламо ломанть, конат саезь эрямосто. Истя неемс ды чарькодемс эсь раськенть удалакшны аволь эрьванень.

Кузьма Григорьевич литературань паксянть лангсо свал ульнесь ськамонзо молицякс, нежедема тарказо а властень кирдийтнень ютксо, а писатель ёндо арасель. Сонзэ мастерксчись, сявтамодо а пелемась ды столь экшсэ чиде чис важодемась, эрямонть содамочись лездасть редявиксстэ ёвтамс лемензэ национальной литературасонть. Сон зярдояк арасель кинь-бути ёно, свал кадновсь ськамонзо: сёрмадыцякс, шканть невтицякс. Тенень, нать, ульнесть зярыя тувталт. Васняяк, сон эзь тонавтне улемс сёрмадыцякс, эзь тонавтне сёрмадомо «лиянь коряс». Эзь тееве содавиксэкс ламо покш ломань мартояк, эзь тонадо эрявикс ломантнень вельде эсь тевень тейневтеме. Ды, паряк, самай те идизеяк ламо мезде. Сон эзь пане мезе мельгаяк, ансяк сёрмадсь седе, мезес бажась, мезде содась. «Покш» ломань марто вастовоматнень жо тензэ полавтызь ине сёрмадыцятнень книгаст, конатнень пельде тонавтнесь, конатнень вакссо кассь. Сон весементь лангс меельце чис вансь эсензэ сельмсэ, киньгак мелень витеме апак бажа, кемсь пингеде-пингес виде мельтнес-арсематнес. Эрьва мезенть лангс сонзэ ульнесь эсензэ вановтозо, те, меремс, аволь пек лездась эрьва чинь эрямосонть, ансяк пек лездась творчествасонть.

85 иензэ топодемась, зярдо Кузьма Григорьевич уш лоткась сёрмадомадо, республикасонок тешкстазель пек неявиксстэ. Рузонь кельсэ лиссть сонзэ романтнэнь марто сисем томт  – истямо тев те шкас вейкеяк лия национальной литературасо арасель. Вейксэньгемень иетнень топодемантень лиссть сонзэ произведениятнень марто колмо томт эрзянь кельсэ. Эрзянь валксонть нолдамосо лездась Кастрен лемсэ финнэнь обществась, редакторокс тензэ ульнесь американецэсь, эрзянь келень содыцясь Джак Рютер. Те ульнесь аволь ансяк казне сонзэ покш чинтень, те эрямстонзо путозель тензэ памятник.

Эрямонь перть монень а весть савкшнось неемс, кода васолга содасызь Абрамовонь творчестванзо. 1972 иестэ молинь тонавтнеме Свердловскоев, ды тосо университетэнь ялгам Алла Тункель седейшкава ёвтнесь тень Степан Эрьзянь скульптуратнеде. Зярдо жо 1974 иестэ «Современник» издательствасо лиссь Кузьма Абрамовонь «Сын эрзянский» романозо, сонзэ васенцекс раминек минь ялгань марто. Мейле те книганть ловнызь минек курссо, журналистикань факультетсэ, ды мик мартонок вейсэ эриця ды ве этажсо тонавтниця филологтне ды философтне. Вейке иестэ оймсинь Крымсэ, ды квартирань азоравась, косо эринь, зярдо кармась содамо – мон Мордовиясто, энялдсь тензэ кучомс Абрамовонь книгат. Видькстан, аванть мелезэ топавтовсь аволь сеске, савсь учомс сёрмадыцянть од книганть лисеманзо, те ульнесь «Олячинть кисэ» романось. Валентин Барков морыцясь (сон – Кривой Рогсто) ёвтнесь, келя, Мордовиядо кармась содамо Кузьма Абрамовонь произведениятнень вельде, сынст, ды сехте пек Степан Эрьзядо романонть ловность тетязо-авазо, сынст оятне-ялгатне. Советэнь шкатнестэ Кузьма Григорьевичень книганзо пачкодильть коллекторонть вельде масторонь келес, сынст ловность эрьва косо, кучомадо энялдомат сакшность Казахстансто, Узбекистансто, Украинасто… Неть сёрматне-энялдоматне те шкас ванстовсть книжной издательствань архивсэ. Абрамовонь произведениянзо ютавтозь зярыя кельтнес, сынь лиссть миллиондо ламо тиражсо. Мордовиясо сонзэ ловность эрьва кудосо, эрьва кудосо кортасть-толковасть произведениянзо, секс эйкакштнеяк парсте содылизь лемензэ, героензэ. Бути жо кортамс минденек, 1950-1960 иетнестэ чачозтнеде, тиринь литературань уроктнесэ сонзэ ловнынек верьга вайгельть ды вейсэ мелявтынек «Найманонь» геройтнень кисэ. 

Паряк, секс Кузьма Григорьевичень творчестванзо содылия  школасто саезь, эзия стувто, кода сон 60-це иетнестэ сёрмадыця ялгатнень марто сакшнось минек Андрейвелев, кона весемеде васоло Покш Игнатовань районсонть, ков а шождаль пачкодемс ве ёндонь инжетненень ды ялатеке – вана пачкодсть… Эли, паряк, секс: ловнынь сонзэ весе произведениятнень издательствасо важодемадо пек седе икеле, мартонзо вастовомсто зярдояк эзинь талнокшно,  сатокшность превень мелень путозь ды арсезь кунсолокшномс те превей ломаненть. Кортась жо сон свал мелень апак мольстя, весенень чарькодевиксстэ, седе, мезесь лезэв ды эрявикс ульнесь весенень: эрямодонть, эсь тевентень мелень путомадо, литературадо, эстедензэ. 

Ломантненень свал эряви содамс, кода, мейсэ эри вечкевикс сёрмадыцясь. Эрясь сон кода весе, сюпавчись пек эзь педякшно эйзэнзэ, сон арасель кудочисэнзэяк, зярдояк арасель шказо явомс тень лангс мель ды, арсян, виздиль весемеде седе парсте эрямс. Течи аламо кие визди теде.

Абрамовонь шожда ловномс, но пек а шожда совамс оймезэнзэ. Се, кие васня ловнынзе книганзо ды мейле теевсь содавиксэкс эсензэ сёрмадыцянть марто, васняяк абунгадыль: кода истямо ломанесь яки ды эри истя жо, кода весе, мейсэяк эйстэнек, ловт, а явови? Чевтечись кекшсь эйстэнек кеме обуцянь ломань, конанень пингезэнзэ сатотсть пек ламо а шожда цидярдомат, кие эрямонь школанть ютызе пек казямо шкатнестэ. Сон несь ломанть эрьва косо, ламонть сындест содась, ламо ёвтась. Секс, нать, а пек капшиль, а пек шныль ды а пек сялдыль.

Монень эзь стувтово сонзэ кортамозо Республикань национальной библиотекасо, косо васенцеде невтевсь «Валонь ёвтнема валксозо». Те вастовомантень сакшность госуниверситетэнь филфаконь студентт, колледжень ды школань тонавтницят. Видькстан, талнынь, кармить-арась кунсоломо Кузьма Григорьевичень, эдь, мезть сёпомс, неень од ломантне аволь покш мельсэ ловныть художественной литература. Бути кармить лисеме вастовомастонть шкадо икеле, а кармить кунсоломо…

Ансяк од ломантне кунсолость Кузьма Григорьевичень истя: карво ливтясь – марявсь. Сёрмадыцясь кортась мартост чарькодевикс валсо, седе, мезесь тенст маштови эрямонь кувака кинть лангсо. Койсэнь, сеть од ломантне эйкакшост-нуцькаст туртовгак кармить ёвтнеме: зярдо-бути маризь кортамсто эсензэ Абрамовонь!

Монень сатотсь уцяска а весть кортнекшнемс Кузьма Григорьевич марто, ульнинь сисем томонь пурнавксонь редактортнэстэ вейкекс, а весть ловнокшнынь весе произведениянзо, сехте покштне эйстэст: «Найман» трилогиясь, «Степан Эрьзя», «Пургаз», «Олячинть кисэ», «Велень тейтерь» романтнэ. Ульнинь «Сараклыч» кезэрень шкадо стихсэ повестенть редакторокс, кона лиснесь Мордовской книжной издательствасо «Монь вечкевикс книгам» сериясонть, ловнынь весе ёвтнеманзо, драматической произведениянзо, ванынь весе спектаклятнень, конат путозельть сёрмадовксонзо лангс.

Абрамовонь творчествадонзо сёрмадозь сядот статьят, кементь диссертацият. Зярыя художникть артызь портретэнзэ, Мордовиясо – А.А.Родионов ды Е.А.Ноздрин, Московсо – Н.С.Богданов. Сондензэ теезь зярыя телевизионной фильмат, киноочеркть. Кузьма Григорьевич Абрамов – Мордовиянь народной писатель. Теке марто течияк муеви критик, кона соды ды неи Кузьма Абрамовонь творчествастонзо асатыкст. Те эрси весе сёрмадыцятнень марто, Чипаеськак, кода мерить, весень туртов а вейкетьстэ эжди. Ансяк сень, мезенть теизе Кузьма Григорьевич Абрамов, а нардасы шкаськак, лия сёрмадыцяяк. Сон содавикс сёрмадыця!

Абрамовонь произведениянзо кармасть улеме мокшонь ды эрзянь литературань классикакс. Сынь ливтизь минек литературанть Мордовиянь томбалев, сондензэ кармасть содамо масторонь келес, Абрамовонь книгатнень ловныцятнеде миллионт ды миллионт… Самай сынь, ловныцятне, максызьгак сёрмадыцянтень весемеде покш питненть. Зярдояк библиотекатнесэ Абрамовонь книгатне эзть кадново апак ловно, книгань лавсялангтнестэ апак рама. Течинь чис сынст ловныть, сынь эрявить!

            Тамара БАРГОВА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».