Важное



– Вера, Верушка, стяк, чипаесь уш менель тёкшс кепететсь! Атякштне моратадызь! – Татьяна Захаровна сырькаенть овсе арасель мелезэ пувтамс Верань, тиринь нуцькинензэ, кадык уды, од удомась пек тантей. Ансяк течи сынст пек ламо тевест. Валске Вера сырги Московов экзаменэнь максомо ды пек покш таркав – Россиянь Музыкань академияв, раськень хоронь факультетэв, раськень моронь отделенияв. Кортыть, конкурсось пек покш, весе Союзстонть од ломантне сакшныть, аволь весенень уцяскась мизолгады. Ансяк Верань сырькаезэ кемсь: нуцьказо изни! Эдь сон вишка пингестэ саезь стиль моро марто ды мадиль морсезь. Видькстама, сонзэяк теньсэ чумось ули. Урьванзо марто пек вечкить морсеме. Свадьбав-ков сынст уш васенцекс тердить. Кадык рузава урьвась, ялатеке весе морсематнень-лайшематнень тонавтнинзе. Вера школань хортнэсэ, концерттнэсэ моронь ушодыця. Виев вайгелезэ, мазый! Сонськак удалась, алкуксонь эрзянь тейтерь!



Отяжелень райононь Пилезелесэ Прохор Иванонь Веранень весе мерить сырнень вайгель. Сон ськамонзо велестэнть морамонь кияванть тусь. Вана кавто иеть уш Чебоксары ошсо музыкальной училищасо тонавтни. Ялганзо-оянзо ды тонавтыцянзо превс путызь: «Вера, тонеть тесэ а мезе теемс, эряви содамочитнень кастомс Московсо». Сась Вера кудов сырькаензэ кедьстэ превень кевкстеме, кода свал, 19 иензэ перть. «Мезе ней, Таня бабай, теемс, кодамо моро морамс?» А тонась каршонзо: «Тон иля мора, тон урнек!» Зярыя чить вечкевикс сырькаензэ марто тонавтнесть эрзянь свадьбань одирьвань урнемат. Максызе тиринь ломанесь тензэ эсензэ од порань панаронзояк, конасонть мирденень лисекшнесь, пулаензэяк содызе. Пурнызь-сэрнизь Верань веленек Московонть изнямо.

МОСКОВОСЬ СЕЛЬВЕДЬС А КЕМИ

1987 ие. Те шканть Москов ёнксонь филармониянь, Римский-Корсаков лемсэ Россиянь ВМФ-нь оркестрань солисткась, содавикс морыцясь Вера Прохорова (ней мирдензэ фамилиясо Каяцкая) ледстнесы пек парсте ды пейдезь сюлми эсь прянзо «Приходите завтра» фильмань героинянть Фрося Бурлакова марто. Кода Фросяяк, Вера сась минек масторонь прявт ошов покш мель марто – изнямс весе экзаментнэсэ. Эйстэдест Гнесинтнэнь лемсэ Россиянь Музыкань академиянтень эрявсь максомс мик кото. Одирьвань лайшеманть кисэ Прохорованень путсть сехте покш оценка: «вете». Лия пелькстамотненьгак максынзе, эсензэ мельсэ, а беряньстэ. Ансяк, редизе сеске, кодат виевть ды дока од ломанть састь Музыкань академиянтень пряст невтеме. Кой-кить уш ниле иестэ саезь музыкальной школав яксесть, Вера жо кавто иеть ансяк музучилищасо содамочить пурнась. Экзаментнэнь примицятнень ютксто пек явовсь содавикс весенень хормейстерэсь, композиторось, педагогось, раськень искусстванть кисэ аштицясь, СССР-нь народной артисткась Нина Константиновна Мешко. Сон налксеськак мейле Вера Прохоровань эрямосо пек покш роль. Ансяк те мейле, васняяк жо Вера эзизе муе эсь фамилиянзо абитуриенттнэнь спискастонть. Весе педе-пес сельмесэнзэ ваннызе – арась. Те кулясь валгстызе од тейтеренть менельстэ модас ды аволь валгстызе – вачкодизе теке эземс. Сельведтне эзть кирдеве, чумондомс а кинь, ансяк эсь прянть. Ялатеке Верань обуцязо аволь аварькаень, сыргась деканатов видечинь вешнеме, паряк, эштё мезе ёвтыть, паряк, стувтымизь? Истя арсезь, цють эзь эшкеве комиссиянь членэнть, тонавтыцянть, Северэнь хоронь художественной прявтонть Светлана Конопьяновна Игнатьевань мештес. Тонась оймавтызе, келя, иля икелепелев майсе, вешни эйсэть сонсь Нина Мешко. Вера васняяк оргодиксэль. Уцясказонзо, Нина Константиновна аштесь крыльця песэ. Кундызе кедьпеде ды максызе Прохорованень телефононзо, мерсь гайневтемс сентябрясто. Вера эзь кемезеве лездамонтень. Мезеньгак паронь апак учне, сон тусь оймсеме велев. Нина Константиновна жо тейтерьканть эзизе стувто ды муизе Галина патянзо вельде. Экзаменэнь максомсто савсь кадомс тонанть кудонь телефононзо. Галя шкань апак сатстне сась Чебоксарсто Пилезелев, мерсь саемс эрзянь оршамопельтнень ды ильтизе Верань Московонь роднянстэнь-раськенстэнь. Тосто гайневтсть Мешконень, ды тонась абунгавтынзе: ванды эряви самс мазыйстэ наряжазь Советской Союзонь Культурань министерствав ды морамс сонсензэ министранть Ивановонь туртов. Верань роднянзо оршневтизь омбо масторонь импортной, сестэ пек модной, костюмсо. Нина Константиновна жо сялдызе, культурань министранть икелев эряви лисемс ансяк раськень оршамопельсэ, конатнесэ сон ульнесь вокалонь коряс экзаменсэ.
Пельчи сынь Нина Константиновна марто учнесть министранть приёмнойсэ, зярдо тонась прядсынзе тевензэ. Окойники, тердизь. Талноманть васов кекшезь, эрзянь тейтересь поровт лангсто гайгстызе «Самсон леляй» кезэрень моронть, пильгетне сынсь сыргасть киштеме. Те чистэнть Вера ледстни ансяк министранть седеень токновтыця валонзо, а чаманзо, а кабинетэнть сон теке эзинзе нееяк. Пилесэнзэ те шкас гайги: «Спасибо. Идите учитесь. Мы выделяем вам дополнительное место». Истя 1987 иень сентябрясто Вера Прохорова понгсь Гнесинтнэнь лемсэ Россиянь Музыкань академияв.

ВЕСЕМЕСЬ ЭСЕТЬ КЕДЬСЭ

Вете иетне Академиясонть ютасть теке вете чить. Верань туртов тонавтнемс ульнесь шожда. Ломань марто ладиця обуцясь, тонавтнемадонть апелемась, содамочитнень мельга панемась пек лездасть од тейтерентень муемс кель-вал педагогтнень ды од ялгатнень-оятнень марто. Светлана Конопьяновна Игнатьева се шкастонть панжсь студентэнь ансамбля, козонь саизе Вера Прохорованьгак. 1991 иестэ «Россия» Государственной академической рузонь раськень ансамблясь, конанть прявтсоль Людмила Георгиевна Зыкина, яволявтсь пелькстамо. Сынь вешнесть од вийть ды од вайгельть. С.К.Игнатьева ветизе конкурсонтень весе ансамблянзо, ды сынь ютызь ванноматнень-кунсоломатнень. Сонськак Светлана Конопьяновна саезель тозонь хормейстерэкс.

Студентэнь эрямось, од порась, дипломонь идемась (тешкстама, Вера саинзе дипломонь темакс эрзянь ды рузонь свадьбатнень) сюлмавсть гастрольтнень марто. «Васенцеде омбо масторов молемась, ине морыцянть Людмила Зыкинань марто концерттнэ – те талновтыця шкась седеяк сюпалгавтызе монь оймем, – ёвтни Вера Ивановна. – Минь неинек, кода роботы Зыкина, минь тонавтнинек пельдензэ, вастовинек минек масторонь сехте паро музыканттнэнь марто. Вете иетне, зярс минь важодинек «Россия» ансамблясонть, монень пек ламо макссть».

Марина ДЕВЯТОВА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».