Меельце шкастонть оймсема читнестэ Республикань Культурань Дворецэсь ветькак, секень вант, а эрси чаво. Эрьва субутасто ды недлячистэ пиже валскестэ саезь сон пешкели ломанде. Тей сынст тердинзе «Шумбрат, Мордовия!» фестивалесь, кона тедеде ютавтови 23-цеде. Ожоковонь 19-це чистэ саезь, зярдо сон ушодовсь, раськень шкинемасо эсест ёрокчист невтизь Ташто Шайговань, Атюрьевань, Теньгушевань, Темниковань, Ельникень, Атяшевань, Ромодановань, Рузаевкань, Лямбирень ды Краснослободскоень, Кадошкинань, Ардатовань районтнэстэ сазь артисттнэ. Тедеде, кода икеле иетнестэяк, эрьва районось снартни анокстамс лия ёнов а молиця концерт. Ды, меремс, те бажамонть сынь топавтыть а беряньстэ.

Пек сюпаволь ды мельстуицяль концертэсь, конань невтизь Лямбирень артисттнэ. Сон ульнесь ютазь субутасто, залось пешкелесь тыц. Улиндеряволь сон кавксть седе покш, тозоньгак, маряви, авольть кельге весе, кить бажасть понгомс Лямбирень концертэнть ваномо. Те корты вейкеде: тосонь артисттнэ маштыть пряст невтеме сцена лангсо. Се чистэнтькак сынь весе седейлембест максызь ваныцятнень туртов. Пек парсте арсезель сценариень лувось. Моротнень мельга киштемат. Ды кодат! Киштицятнень кочкаряст алдо тол верьгедсь.

Лембе ёжомарямот совавтсть ваныцятнень оймес морыцятнеяк. Апак учонь казне сынст туртов тейсть Александровкасто «Пизёлнэ» ансамблясо морыцятне эсест од моросост, конань эйсэ валтнэ седе а ков парсте ладясть фестивалентень: «Фестивалев сынек, вейс минь пурнавинек. Васов гайгить моронок, мазыйть оршамонок». Истя ульнеськак. Покш Елховкасто содавикс хорось, кода свал, эсензэ моросо сельведьс токинзе кунсолыцятнень седеест.

Эрьва кодамо оршамотнень эйстэ сцена лангось неявсь цецянь пандякс. Вана лиссь «Умырзая» содавикс ансамблясь. Веенст киштить, омбонст морыть. Ды истя парсте – залось лепиясь цяпамотнеде.
Фестивалесь поладови. Сы оймсема читнестэ эсест концертэст невтьсызь Дубенкань ды Кочкуровань районтнэ – сундерьковонь 9-це чистэ, Чамзинкань ды Покш Березникень районтнэ – сундерьковонь 10-це чистэ.

Раиса ЩАНКИНА