Вторник, марта 19, 2024
Важное

Сырнень сёксень алкуксонь мазычитне седе пек редявить велесэ улемстэ, вирь маласо куринкатнева ютамсто. Те арсеманть мельсэ кирдезь, аволь умок ульнинь Покш Березникень райононь Симкина кезэрень велесэнть.

Тосо ванстовсть покштятнень-бабатнень койтне-кирдатне, тосо эрить чевте седей ды паронь арсиця ломантне.

Виде, велесэнть, кода масторонь ламо лия эрямо таркатнесэ, эрицятне иестэ иес аламолгадыть. Вейкесь оймавты: ламот икелень эрицятнень эйкакшост ды нуцькаст седе сеедьстэ кармасть сакшномо покштяст-бабаст, тетяст-аваст юртнэнь содавтомо, каладозь кудотнень витнеме. Текенень поладсынек, тесэ-тосо икелень эрицятнень кудотнень вальматнесэ ней чокшне ланга редявить толнэть.
Кенярдовты, кудотнень кармасть рамамо ве ёндонь сыцят (тесэ тенст мерить дачникть).

Ули мезень коряс аштемс каштанчисэ те велень эрицятненень: зяро содавикс ломанть макссь масторонтень Симкина велень модась.
Тедеде, зярдо масторлангонь келес тешкставить Ине Изнямонь 75 иетне, кода а ледстямс Ине Отечественной войнань участниктнень Советской Союзонь Геройтнень лемест: И.П. Адушкинэнь, Н.В. Зиновонь, Д.Д. Борискинэнь. Тесэ чачсть-кассть истят содавикс ломантне, кода Мордовской АССР-нь Министрань Советэнь Председательтне И.П. Астайкин ды В.С. Учайкин, Мордовской АССР-нь здравоохранениянь икелень министрась, шкань ютазь РСФСР-нь Минздравонть юрсо теезь 4-це Главной управлениянь прявтонь полавтыцясь Н.Я. Назаркин ды ламо лия паро ломанть.

Симкина велень поселенияв совамсто (кода тесэ мерить тензэ икеле ладсо – Советэв) паро мельсэ вастымизь: велень поселениянь прявтось Любовь Ивановна Астайкина, сонзэ полавтыцясь Галина Григорьевна Ишуткина, лездыцяст Вера Дмитриевна Настина, Любовь Дмитриевна Кулавская, Татьяна Дмитриевна Леушкина, Галина Андреевна Тетюшкина, Елизавета Васильевна Новикова. Виде, неень шкань зыянов орманть мельс саезь, сынь топавтыть весе вешематнень велеваст сонзэ а нолдамга, эсест ды малавиксэст шумбрачист ванстомга. Тейтерь-аватнень вайгельсэст ялатеке марявсь покш мелявкс, васняяк, аволь эсест, седе пек малавиксэст эрямост кисэ, яла кевкстнесть, кода аштить тевтне ошсо?

Кортазевинек Галина Григорьевна Ишуткина марто. Сон ламо эйкакшонь триця семиясто. Тетянзо-аванзо, Григорий Алексеевич ды Раиса Павловна Елисеевтне, Симкинасо ломантне содавикст. Сынь трясть-кастсть ниле эйкакшт. Куш кудазорось умок уш кулось, ялатеке сонзэ ульнесть ламо тевензэ те веленть лезэс. Ве шкасто сон ульнесь колхозонь, мейле – сельпонь прявтокс. Аволь весемесь валанясто ютась те семиясонть, а ёвтавияк кодамо седейризкс печтясть 2002 иестэ сехте покш цёраст Николай Григорьевичень 43 иесэ а шкастонзо куломанзо кувалма.

Кода тенек пачтясь Симкина велень поселениянь прявтось Л.И. Астайкина, пандемиядонть икеле тосонь ломантне ютавтсть велень эрицятнень пурнавомат (рузкс: сход граждан). Ней таго велявтсть теке кевкстемантень, пандемиянть шкасто весе вешематнень топавтозь. Кортамось ульнесь самообложениянь вельде велень тевтнень топавтомс ярмаконь пурнамодо. Ледстясынек, маныть Покш Березникень райононь эрицятне, ков совась Симкина велеськак, республикасонок васенцекс ютавтсть местной референдум эрицятнень самообложениянь коряс. Пурназь средстватнень ды сыненст явозь ярмактнень лангс теевсь ламо. Ансяк, кода парсте содатано, эрямось таркасонзо а ашти. Икелепелев сынст учить эштё ламо тевть веленть паролгавтоманзо ды мазылгавтоманзо коряс.

Те шкас Симкина велень эрицятнень талновты Чугыр веленть видьс кись, кадовсь теемс вете вайгельбеть, штобу ломантне авольть майсе тиринь велев ардомсто ды лиятнеяк саевельть мель самс тов эрямо.
Эштё вейке мелень витемань паро тев рединек Симкинасо улемстэ. Тосо Христорождественской од церьковантень кармасть тееме баягань кирдема тарка. Ушодксось путозь. Неть читнестэ те велень икелень эрицятне – индивидуальной предпринимательтне Александр Викторович Астайкин ды Александр Фёдорович Новиков – Симкина велень эрицятненень лездасть валомс фундамент баягань кирдема таркантень. Те тевентень сынст баславинзе Христорождественской церьковань настоятелесь отец Каллиник.
Виде, Симкинасо меельце шкастонть пек ламо теевсь, ансяк, кода уш меринек, эрямось вейке таркасо а ашти, сон эрьва ковсто, чистэ канды од тевть.

Течи ули мелем ёвтнемс истят ломантнеде, кить ошонь сэтьме эрямонть таркас кочкизь веленть, косо тевтне свал певтеметь. Вейкесь юткстост – Тамара Александровна Вельмакина, кие Владимир Иванович мирдензэ марто Симкинав эрямо састь кемготово иеде икеле. Васня сынь сеедьстэ те мазый таркасонть ульнесть оймсема читнестэ: пачколесть калонь кундамо, вирьстэ пангонь ды ягодань кочкамо. Пенсияв лисемадо мейле кудосо кортасть-тейсть ды сайсть мель кадомс ошонть. Велень кудонть, конань рамакшнызь уш икеле, витнизь неень шкань вешематнень коряс. Сон ней прок а явови ошонь квартиранть эйстэ. Эдь те велеванть умок уш ветязь «сэнь» уштомапелесь, малав эрьва кудосо ули ведь.

Т.А. Вельмакинань ёрокчизэ певтеме. Тейтерь-авась машты кодамо, викшнеме, эрьва мезень стамо. Тамара Александровна сонсь ладси стихотвореният ды седейшкава сынст ловны.
Весть савсь сынст кунсоломс Симкинасо сыре ломанень ковонть тешкстамсто, омбоцеде – Саранскоень Культурань кудонь покш сцена лангсо «Шумбрат, Мордовия!» фестиваленть ютавтомсто. Седейс токиця стихотворения сон алтась Христорождественской церькованть панжомантень. Тешкстасынек, Тамара Александровна, кода весе Симкинань лия эрицятнеяк, лездась Пазнэнь ознома тарканть теемасо.
Кода пачтясь Л.И. Астайкина, неень шкане Симкинасо эрямо кудотнеде, кода эйсэст эрицятнедеяк, колмосядто ламо. Кизэнь шкастонть жо пурнавкшныть 500-то седе ламо ломанть. Виде, ней кой-кить юткстост тусть одов ошов ды таго кармить учомо сы кизэнть...
Кемтяно, весень вийсэ топавтовить паро тевтне, кода теевсть ламо лиятнеяк веленть паролгавтоманзо коряс.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».