Вторник, марта 19, 2024
Важное



ЭЙКАКШПОРАДОН ЛЕДСТНЕМСТЭ МЕЛЕЗЭНЬ СВАЛ ЛЕДНИ СЕХТЕ ВАЛДО ДЫ КЕНЯРКСОВ ЧИТНЕНЬ ЮТКСТО ВЕЙКЕСЬ – ТЕ ЗЯРДО ШАБРАНОК ЖИВАЕВТНЕ – ВЕЛЕСЭ МЕРИЛЬТЬ ТЕНСТ СТЯПАНКАТНЕ, ТАРГИЛЬТЬ МЕДЬ. СЫНСТ СЕСТЭ – ПЕЛЕПИНГЕДЕ ТЕДЕ ИКЕЛЕ – ВЕЛЕСЭНТЬ СЬКАМОСТ УЛЬНЕСЬ НЕШКЕПИРЕСТ.



НЕЙГАК А ЧАРЬКОДЕВИ, КОСТО, КОДА КАРМИЛИНЕК ТЕДЕ СОДАМО. КОДА ИЛЯЗО УЛЕ, ТЕ ЧИСТЭНТЬ УШ ВАЛСКЕ МАРТО ТЕКЕ НАРМУШКАТ ОЙСИЛИНЕК КУДОЁЖОСОСТ ПУТОЗЬ ЦИВТЯРДОМАС ВАЛАКАВТОЗЬ, ЭЧКЕДЕЯК ЭЧКЕ ЧОЧКОНТЬ ЛАНГС ДЫ УЧИЛИНЕК КУДАЗОРОНТЬ МИША ПОКШТЯНТЬ ТЕВЕНЗЭ ПРЯДОВОМАНТЬ. ОКОЙНИКИ, ТЕРДИЛИМИЗЬ СОВАМС КУДОВ. ЧУВТОНЬ КУВАКАДОЯК КУВАКА СТОЛЕСТ ЛАНГСО УШ АРАВТОЗЕЛЬТЬ КОЛМО ПОКШ ВАКАНТ. ВЕЙКЕНТЕНЬ КАЯЗЕЛЬ ВАНСЬКАВТОЗЬ ВЕЦАНА МЕДЬ, ОМБОЦЕНТЕНЬ – ШТАНЬ ПАЛНЭ МАРТО, КОЛМОЦЕНТЕНЬ – ЧАПАМО ЛОВСОС ЧОВОРЯЗЬ МЕДЬ. МОН ВЕЧКИЛИЯ ШТА МАРТОНТЬ. КУДАЗОРАВАСЬ АНКА БАБАМ ТЕРДИЛИМИЗЬ МИНЕК, КЕМЕНЬ-КЕВЕТЕЕШКА НОЛГАРТНЕНЬ ОЗАМО СТОЛЬ ЭКШС, ЭРЬВАНЬ ИКЕЛЕВ ПУТЫЛЬ ЧУВТОНЬ ПЕНЧ. МЕЙЛЕ СТИЛЬ СТОЛЬ ПЕНТЕНЬ ДЫ УШОДЫЛЬ КШИНЬ ПЕЧКСЕМЕ. СЕЛЬМЕНЬ ИКЕЛЕ НЕЙГАК АШТИ, КОДА МАЗЫЙСТЭ СОН ТЕНЬ ТЕЙСЬ. ЧАРЫШКА РОЗЕНЬ КШИНТЬ ЛЕПШТИЛИЗЕ СЭРЕЙ МЕШТЕЗЭНЗЭ, ПОКШ ПЕЕЛЬСЭ, ТЕКЕ ПЕЛЮМАСО, ШОЖДАСТО АХОЛДАЗЬ ПЕРЬГЕДСТИЛЬ ВЕСЕ КШИНТЬ КЕЛЕСЭ КУВАКА КОЧОМ, ОМБОЦЕ, КОЛМОЦЕ… ВЕСЕ КШИНТЬ КЕРСЕМАДО МЕЙЛЕ ИКЕЛЕНЗЭ ВАЧКАЗЬ НЕТЬ КУВАКА КОЧОМТНЕНЬ КЕРИЛИНЗЕ ЧАЧКОВ, ВАЧКИЛИНЗЕ ИКЕЛЬГАНОК ДЫ МЕРИЛЬ: «ЯРСАДО». СЕЛЬГЕНЬ НИЛЬНЕЗЬ УЧИЦЯТНЕНЬ ОДС КАРМАВТОМС ЭЗЬ САВКШНО…

Вай, кодамо тантеель се медесь! Ды вантая: весень тотстятомозонок пешкедезь, вакантнэ эзть чамо пелевидьскак! Окойники, стилинек, ёвтылинек сюкпря кудазоравантень, мейле вейсэ, верьга вайгельть рангстылинек: «Миша деды, пасиба!» Каршозонок ве ёндо меревиль: «Пасиба эстенк, кода эзиде сестеть!» Монень валтнэ аволь пек вечкевильть, ансяк сынст пек валакавтсь паронь арсезь, мизолкс марто ёвтамост.

Эряви меремс, сеть иетнестэ (те монь содамга, ёвтнесть, истя ульнесь седе сыре Стяпанкатнень шкатнестэяк) те семиясь тиринь ёнкссон – Отяжелень Таразбуе велесэ, лововсь башка таркасо аштицякс, меревлинь бу, ульнесь веленть юрокс. Ламо кудотнесэ-семиятнесэ эрямо лувост ладясть сынст лангс ванозь. Тевесь тунь аволь сюпавчисэст эли кодамояк покш ули-паросост. Те сынст арасель. Мекевлангт, дивавтсь се, кода кемень(!) эйкакш марто семиясь, весеме ладсо эрязь, машты весемесэ улемс икеле молицякс ды мик сельмень сявадстыцякс. Эрьгатя, аволь ансяк а аштекшни вачодо – вейке омбоце мельга кепетиця эйкакшост школанть прядомадо мейле ильтить ве ёнов седе тов тонавтнеме. А диваяк, мекс мейле вейке семиястонть лиссть врачт, журналистт, экономистт, юристт…

Сеедьстэ савкшны марсемс: течинь эйкакштне касыть кольневтезекс, цёлакокс, мезескак а бажицякс, лавшо обуцякс. Эно, кона ёндо тень лангс варштамс. Седеяк пек – кинь теньсэ чумондомс. Ней монень кармась марявомо: течинь эйкакштнень коряс миненек сестэ ков седе ламо максовсь, меревсь теемс. Касынек олячисэ, апак тандавтне, вейкень-вейкень лангс оршамопелень-мезень коряс сельмень апак сявадстне. А вана вечкема ды мелявкс корязонок маринек аволь ансяк малавикстнэнь – весе, кода мерить, перьканок эрицятнень пельде. Тонавтсть эйсэнек аволь валсо – прянь ветямосост, тевест топавтомасост. Арасельть «сникерсэнек»-«марсонок»? Теде мелявкскак арасель – эдь минь сындест а содылинек. Весе тантеенть мукшнылинек пирестэ, паксясто, вирьстэ. Ушосто совилинек ансяк удомо – чийнемстэ прамозонок сизезь. Ярсамо, маряви, эйсэнек пек эзть тердтнеяк – аламо кинь кудосо чинь-чоп кадовкшнось покштнестэ куш кияк. Пек вачомозь, чият, цопадят кшипечть – паро, мейсэяк вадезь эли ловсо кедьгине марто.



Таго ледстявить Стяпанкатне. Минь эринек эйстэдест кавто кудо экшка, велень куншкакуросо. Эсь ютковаст семиянок ульнесть аволь ансяк паро шабракс – эрясть кода пек малавикс раськеть, кудонокак ульнесть теке ве семиянь. Вана тагояк васень ледстнематнестэ. Телень цят якшамо чи. Эйсэнь а нолдыть ушов. Скушна-а-а! Судом педявтозь кельмезь вальмасуликантень. Ванан солазь варинева ды моран: «Буря-погода идёт, Стяпанкань Миша придёт». Содан: Миша покштям тейсынзе кардазютконь тевензэ ды сы тенек кавалалонзо тевензэ кандозь – седе сеедьстэ те ульнесь пандовиця понань кем. Тусы монь шкавань Валя нуцьканзояк. Вана Федя покштям марто озыть стольденть ве ёнов аволь покш кудынезэнек, кундыть котьмамо, апак капша калярдозевить. Минь Валя марто – сеедьстэ тенек вейсэндявить шабрасонок эриця патянь эйкакштнеяк – ойсетяно вакскаст эли маднетяно каршост каштлангонтень, кургонь автезь кунсолотано неть кортамост-ёвтнемаст, теке мельстуиця книгань ловнома. Мейле, уш касозь, путынь неть аштекшнематненень питнейчи: эрьгатя, покштянок ды шабранок покштянть кургсто минь эзинек марсе амазый валт, эйкакшонь пилесэ амарямга ёвтнемат, минек эзимизь пансе кедьалост мешамстонок.
Стяпанкат эзть музгорде лангозонок сестэяк, зярдо куншкакуронь весе эйкакштне тундонек-кизэнек чинь-чоп чавкакс-варакакс чийнинек-рангинек вальмалост пиже, ваньксстэ кирдевиця наронть лангсо. Сы симемат – чийть апак пиря тинге куншкасост лисьмантень, тесэ, срубонть вакссо лавсине лангсо, свал ашти ведь марто ведра, вакссонзо путозь кружка. Теске ведь марто парьсэнть чамат-кедетькак ёрвалдыть.

Текенень, тешкстаса, сынст ды минек лисьмань ведтне велесэнть лововсть симемс сехте тантеекс. Пек удалыльть лангсост теезь брагась ды кулагась, пидематне-панематне. Велень омбоце пестэяк тейтертне яла сыльть кисэнзэ сехте паро оршамопелест муськемстэ.
Сеть шкатнестэ велень од тейтертне эрьва тунда тукшныльть Самара ёнов ды Москов алов торфонь таргамо. Стака тевест прядозь, кудов велявтыльть сёксь ёнов. Тень учость веленек, сехте пек вишкинетне. Аволь ансяк патянок кисэ тошнакадоманть коряс. Ладявозь коень коряс, минек велень эйкакштне «торфушкатнень» само чистэст чиилинек эрьванть кудос, арылинек поровт ваксс ды училинек. Кудазортнэ чарькодилизь-содылизь самонь тувталонок ды венстильть тенек тень туртов уш анокстазь каванямопельть.

Минь истя вастылинек аволь ансяк торфонь таргамсто сыцятнень. Чиилинек кенярдомо ошсто инжекс сыцятнененьгак. Вечкилинек Стяпанкань тейтертнень ды вейкине цёраст – мейле Весесоюзонь пек содавикс радио- ды тележурналистэнть Виктор Михайлович Живаевень ве ёндо кудов сакшномасткак. Сыньгак эдь тонавтнесть Орданьбуесэ-косо – минек туртов васоло, мазый ды сюпав ошсо, косо микшневить эрьва кодат ламбамопельть. Нама, превезэнекак а саилинек: тонавтницятне сакшныть кудов котомкинест кошкседе-мезде пештямо. Чиилинек вастомост. Ды мезе: венстильть эдь тенек мезеяк тантей! Кие соды: пельсвачодотне сынсь эйсэст таштыльть, эли аваст, Анка сырькаесь, анокстыль самодонок икелепелев содазь.

Лёмзёрт, пизёлт, чевгельть касыльть эрьвань пиресэ, ансяк Стяпанкансетне мекс-бути марявсть сехте тантеекс (эли свал кедьмаласольть?). Теке эсенек, ярсамс таргилинек морковдост-репстэсткак. Мекшест «содылимизь», а пупсильть эйсэнек.
Тельня яла мирём совилинек тенст эжнеме. Куш кустембесэ аравтозь тенстьсэнть ахолинек вейкенек-вейкенек лангсто ловонть, ялатеке мейле аштема таркасонок соламодонзо кадовиль покш начко тарка. Кода тантеекс сестэ марявсь Анка сырькаенть вентявкс розень салтозь кшикочомось! Портяно, минсь ванкшнотано тенек пек мазыекс марявиця кавто нупальс кудопотмост.

Вальмасост валдо ситцань шаршавт, вальмалангтнева аравтнезь цецячакшт, столест ды зярыя удома таркаст ланга каязь мазый коцт, стенасост покш чамаванома, кундосо фотот. Зярс а кандтневиця оршамопелест-мезест урядазь аволь лався
ланга – кекшезь кенкш марто шкапка. Каштомикеле/моргасо чавозь тулотнева понгавтнезь зярыя(!) нардамот – эрьванть песэ викшнезь азоронзо лемесь. Эйстэнек малавгак а эрьвань кудосо сестэ ульнесь истямо «сюпавчи». Ламо эрицятнень лангс апак вано, мельсэнь а ашти сынст ёртнезь нуласт-валаст, шукшпряв эли рудазов кияксост, кудазортнэнь эли эйкакштнень юткова аладямонь тевтне эли куш кортамотне. Кудов сазь, минськак кедезэнек саилинек тенсть, нула, явилинек эстенек башка чаманардамо, полавтылинек каргоць платиянок, куш аламос теевилинек седе кунсолыцякс, а кольницякс. Вант, муевиль вальмава понгавтомс ситцань коцт, пазаватнень пева каямс таргавиль васов урядазь викшнезь нардамо.

Сельмть сявадстыльть тейтерест. Сэрейть, ёлганят, штапелень «рузокс» стазь платиясот, мазый котасот, кедень эчксэ черьбулост карксамодо алгат. Вана бу седе курок касомс ды улемс сынст ёнов молицякс!
Покшсто касозь, чарькодевсь: самай истят семиятнесэ ладявсть ды ванстовсть паро койтне. Сынь ульнесть лембе, паро невтемапелень казицякс маласост весе уликстнэнь туртов. Вана моньгак, мартон весе ялганьгак эйкакшпораст теизь уцяскавокс, валдокс, кенярксовокс.
Эно, мон тень мария уш сестэ, тунь аволь ламо шкань ютазь. Зярдо сыре Стяпанкатне тусть ошов, эйкакшост кедьсэ эрямо, кудост миизь. Од азортнэ кустембеваст стявтсть пирявкс, кенкшентень тейсть туло.

Тингелисьмантень ветиця тикшень келей яннэнть сокизь, тарказонзо озавтсть модамарень эштё вейке кикс. Ней тува кода-бути а ён ульнесь ютнемскак, ды ломантне аламонь-аламонь лоткасть тенст ведьс сакшномадо. Виев лисьмапрянь ведесь ве семиянень а чопавтневиль, ды лисьмась курок чиниясь. Ней а мекс ульнесь совсемс пирезэст миненекак: лёмзёрксось ды пизёлкстнэ-чевгелькстнэ сеске керязельть «аэрявиксчист ды модань занямост» кувалма. Иляздано ойсе шумамо, пильсезель кудоёжостост чочкоськак. Вальмалост пиже наронть лангс кармасть содномо вазост, ревест – ней ланганзо аволь ойсемс-кеверемс, ютамс а куваль. Лия пень эйкакштне, паряк, мусть пурнавкшномань лия тарка. А мон эштё вишка эрямосон кувать маринь прям мезень-бути покшонь ды пек эрявиксэнь ёмавтозекс. Касозьгак, сеедьстэ ледстнинь се шканть. Ансяк кадовсь кургозон се меденть танстесь.

Ней сон ледсь мелезэнь те покш семиястонть вейкентень поздоровонь ёвтамо сыргамстон. Неть читнестэ тешкстызе чачома чинзэ республикасонок ламонень содавикс журналистэсь, общественникесь Татьяна Михайловна Ковалёва (тейтерькс Живаева). Сон саинзе эсест пек паро лувсо эриця семиястост весе паро ёнкстнэнь. Саинзе, ванстынзе, ламолгавтынзе ды кази сынст весе малавиксэнзэ ды содавиксэнзэ туртов. Татьяна Михайловна! Арсян Тенк шумбрачи ды валдо уцяска. Кадык седе товгак ламот кармить ладямо эрямост лангозонк ванозь, пельденк тонавтнезь. Эсень пельде – башка покштояк покш сюкпря весе семиянк-родонк кисэ!

Татьяна РЯБОВА,
Россиянь Журналистэнь союзс совицясь.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».