Вторник, марта 19, 2024
Важное


МУЕМС ЗАКОНОНЬ КОЛЫЦЯТНЕНЬ СУРОНЬ ОТПЕЧАТКАТНЕНЬ, КАРСЕМАПЕЛЕНЬ ДЫ ТРАНСПОРТОНЬ СЛЕДТНЭНЬ ЭЛИ ОРШАМОНЬ ПЕЛЬКСКЕТНЕНЬ КОРЯС... ОПЫТНОЙ КРИМИНАЛИСТЭНТЕНЬ ПОЛИЦИЯНЬ ПОДПОЛКОВНИКЕНТЕНЬ СЕРГЕЙ НИКОЛАЕВИЧ АТЮНЬКИННЭНЬ ТЕ ВЕСЕ СОДАВИКС АВОЛЬ ВАЛОНЬ КОРЯС.
 ВАЖОДЕМАНЬ ИЕТНЕНЬ ПЕРТЬ СОНЕНЗЭ АВОЛЬ ВЕСТЬ САВКШНОСЬ АРДОМС ЗЫЯНОНЬ ЛИСЕМА ТАРКАТНЕС ЧЕМОДАНЧИК МАРТО, КОСО УЛИ ВЕСЕМЕСЬ УЛИКАТНЕНЬ ПУРНАМОНТЬ ТУРТОВ, ТЕДЕ БАШКА, СЕЕДЬСТЭ САВКШНОСЬ ЮТАВТНЕМС ЛАБОРАТОРИЯСО ЭКСПЕРТИЗАТНЕНЬГАК.

Саратовань Милициянь высшей школанть прядомадо мейле, 1996 иестэ, сон сась внутренней тевень органтнэс, ушодокшнось экспертэкс Саранск ошонь Октябрьской райононь внутренней тевень отделсэнть, ней эсь покш ды эрявикс тевенть топавты МВД-нь региональной Экспертно-криминалистической центрасонть.
Эрямонь тевенть Сергей Николаевич ламосо кочкизе тетянзо коряс. Николай Филиппович Атюнькин весе эрямонзо алтызе прокуроронь тевентень.
– Тетям чачсь Отяжелень райононь Дюрькина эрзянь велесэ. Саратовань институтонть прядомадо мейле сонзэ кучизь роботамо Мордовиянь Ковылкинань районов. Зярыя шкадо мейле кармась прокуророкс Темниковасо. Тосо мон чачиньгак. Кавтошка иень ютазь тетянь кучизь роботамо Саранскоев, ков весе семиянек сынеккак, сон кармась Октябрьской райононь прокуророкс, – ёвтни Сергей Николаевич.

Сергей Атюнькин прядызе Саранскоень 24-це № школанть, электронной приборонь техникумонть. Седе тов служась армиясо, конадонть мейле од цёрась ушодсь роботамо «Орбита» заводсо электронной оборудованиянь наладчикекс ды теке шкастонть тонавтнесь Н.П.Огарёв лемсэ МГУ-нь ФЭТ-нь чокшнень отделениясонть.
Ансяк вана прясонзо свал чарасть преступлениятнень панжомадо ды закононь колыцятнень кундамодо тетянзо ёвтнематне. Сельме икеле ульнесть фотоаппараттнэ ды эрьва кодамо техникась, кона нолдави эксперттнэнь-криминалисттнэнь важодемасо ды конанть цёрась свал некшнесь вишка пингстэ саезь. Весементь домкасто арсезь, Атюнькин кадызе тонавтнеманзо ды важодеманзо ды 1992 иестэ максынзе документэнзэ Саратовань Милициянь высшей школав. Сон кунсолынзе тетянзо кармавтоматнень ды кочкизе экспертэнь тевенть.

– Тетям ульнесь пек паро психологокс. Ды, зярдо мон ёвтынь мель милициянь школасо тонавтнемадонть, сон мерсь, седе паро кочкамс экспертэнь специальностенть. Истя теиньгак ды эзинь янксе тень коряс зярдояк, – тешксты Сергей Николаевич.
Тонавтнемань ниле иетне ливтязь ливтясть. Ды направлениянь коряс цёранть кучизь роботамо Саранскоень Октябрьской райононь внутренней тевень отделс, косо роботась ниле иеть, 2000 иетнень самс. Шкатне ульнесть а шождат. Эрьва чистэ киньгак чавильть, сутказонзо савиль кеветеексть ардомс саламонь тевень коряс.
Се шкастонть, 1999 иестэ, од экспертэнть чачсь Анастасия тейтерезэ. Ансяк сон малав овсе эзь некшне сонзэ, эзь нее, кода тонась стясь пильге лангс ды теинзе васенце эскелькстнэнь, эзинзе маря васень валонзо. Свал роботасоль, свал тевсэль.

– А сёпса, ульнесь пек стака. Аволь весть чарасть мельть туемс, муемс лия робота. Кирдсь коллективесь. Тесэ важодсть истят ломанть, конатнень марто явомс ульнесь а кода. Минь эринек пек покш ояксчисэ, вейке-вейкень чарькодезь ды вейке-вейкенень лездазь. Ды самай те ульнесь прявтокс, – корты Сергей Атюнькин.
Мейле, 2000 иестэ, С.Н.Атюнькин эсь тевензэ поладызе МВД-нь региональной Экспертно-криминалистической центрасонть, косо важоди течинь чис. Ансяк вана подполковникенть мельс сехте пек кадовсть стажёрокс улема шкатне ды зыянонь таркас васенце молемась.

– Зярдояк а стувтса важодемань васенце чинть, – тешксты Сергей Николаевич. – Мон сестэ ульнинь стажёрокс ошонь Ленинской РОВД-сэ. Прявтокс сестэ тосо ульнесь Костюнин. Валске сынь важодема таркав, эзинь кенере совамо, мерсть тень, течи важодема сутка. Сестэ шкатне стакальть, дежурстванть перть савкшнось ламоксть ардомс зыянонь тевс. Нейгак кучимизь квартирасто саламонь тевень коряс. Тосто велявттано, дежурноесь эйсэнек крыльця песэ учи, сёвны, мекс рациянок а роботы. Пачтясть тенек, «Раки» ресторансонть чавсть ломанть, эряви эксперт. Тов сазь, мерсть тень: вана косо васенце чавозесь, вана косо омбоцесь. Роботак. Паро, ульнесь эштё вейке эксперт, минь чокшнень ниле чассто саезь вень 12 часос весементь ванкшнынек, вешнинек отпечаткатнень, карсемапелень следтнэнь, чавомань кедьёнкстнэнь, пурнынек чумочинь панжомасо весе эрявиксэнть.

Ансяк велявтынь Ленинской РОВД-в, Костюнин эйсэнь кевкстни: «Тон чавозтнень кедень отпечаткаст саить?» Таймаскадынь – те тевенть стувтыя. Савсь ардомс моргов ды отпечаткатнень саемс уш тосо.
Те васень дежурствась монь туртов ульнесь, кода кортыть, боевой крештениякс. Ды уш мейле, важодемань весе иетнень перть, зярдояк мезеяк эзинь стувтне. Эсь тевенть теян домкасто ды кода эряви.
Сергей Николаевич ледстни ламот лия тевтненьгак, конатнень коряс савсь важодемс. Ульнесь эрьва мезе. Лиясто зыянонь теицятнень муилизь суронь отпечаткатнень, карсемапелень эли транспортонь чарынь следтнэнь коряс. Ульнесь истяяк, зярдо салыцянть кундызь пеень сусковксонь тешксэнть коряс.

– Те тевесь ульнесь зярыя иеде икеле, – ёвтни экспертэсь-криминалистэсь. – Сась пачтямо, вейке квартирасто салызь ули-паронть. Сыргинек тов. Ванкшнынек весементь, саинек отпечаткатнень, теинек эрявикс процедуратнень. Сельме икелев понгсь панжозь шоколад, конась сускозель. Саинек эйстэнзэ пеень следэнть ды, зярдо весе экспертизатнень теемадо мейле вановтонок алов понгсь чумондовицясь, пек лездась те шоколадось. Салыцясь кувать эзь видькста, ансяк вана ламбамо ярсамопелень вечкемась ваявтызе.
Сергей Атюнькин тешкстызе, сынь а стяко лемдевить криминалистэкс-экспертэкс, криминалистической экспертизатне важодемасонть – прявт тев. Истя, криминалистической прявт экспертизатнень ютксо явовить сисем: дактилоскопиясь ёвты ломаненть сонзэ суронь отпечаткатнень коряс; трасологиясь невти следтнэнь ды косто сынь саевсть, мертяно, карсемапелень; почерковедческой экспертизась невти ломантнень сёрмадома лувонть; баллистикась – ледниця оружиятне ды сезевемадост мейле кадовкстнэ; портретной экспертизась ливти ломаненть фото- ды видеоматериалтнэнь вельде; ули эштё кериця ды ёртневиця оружиянь экспертиза ды документэнь технико-криминалистической экспертиза.

–Эксперттнэ-криминалисттнэ топавтыть технической ёнксонть: пурныть, тонавтыть, снимить предметтнэнь. Сынь а теить, невтемга, верень эли кодамояк лия веществань анализэнть. Тень теить лия эксперттнэ: химиктне эли генетиктне. Тешкстаса, зярдояк а эрси истя, штобу теемс зыян ды а кадомс кодаткак следт. Лия тевесь, лиясто стака сынст редямс. Эдь тесэ покш тарка саить пертьпельксэнь условиятне, зыянонь теемань умокчись ды ламо лия ёнкстнэ. Тесэ криминалистэнтень улема седе докакс ды ёроковокс, – тешксты С.Н.Атюнькин.
Эряви меремс, правоохранительной сферанть марто сюлмавозь Атюнькинтнэнь малав весе семиясь. Кода уш ёвтынек, прокуророкс весе эрямонзо перть ульнесь тетязо – Николай Филиппович. Тетянзо кинть кочкакшнызе Сергей Николаевичень патязояк – Елена Николаевна Пинясова, кона прокуророкс роботась пенсияс лисемазонзо. Эштё вейке сазорозо, Наталья Николаевна Осюнихина, истя жо роботы органтнэсэ. Сон УМВД-нь полициянь сотрудник. Н.П.Огарёв лемсэ МГУ-нь юридической факультетэнь 3-це курсонь студентка Сергей Николаевичень тейтерезэ – Анастасия. Кодамо ёнксонть кочкасы сон, невтьсы шкась.

Зярдо Сергей Атюнькинэнь кевкстинек: кодамокс эряви улемс алкуксонь экспертэнтень-криминалистэнтень, сон кемекстась кавксо профессиональной ёнкст: аналитической ёрокчись, логикась, куроксто арсемась, пшти вановтось, аккуратнойчись, цидярдомась, эсь содамочитнень ды ёрокчинть свалшкань топавтомась, технической средстватнень тонавтнемась. А сень лангс ванозь, што шкатнень марто полавтови важодема лувось ды технологиятне, эряви а кадовомс тень эйстэяк. Лиякс меремс, вадря экспертэсь-криминалистэсь тонавтни весе эрямонзо перть.

Эйзюрковонь 1-це чистэ Россиянь МВД-нь Экспертно-криминалистической отделэнь важодицятне тешкстыть профессиональной кенярксчист. Те чистэнть, сядодо ламо иеде икеле, НКВД-нь Центррозыскенть юрсо панжозель экспертной васенце учреждения. Мордовиянь отделениянь специалисттнэ эсь кенярксчинть, кода свал, тешкстыть важодема таркасо. Эдь сынст тевест эйстэ ашти аволь ансяк видечись ды сэтьмечись, ашти ломантнень эрямосткак.
Арсетяно тенст седе аламо зыянов тевть, кадык важодемаст ули шождакс ды сэтьмекс.

Юлия ЕРЕМИНА
ФОТОСЬ Э.РЕТУНСКИЕНЬ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».