Важное

 

Гостелерадионь комитетсэ комсьветее иень перть роботамсто кодамо ломань марто ансяк эзь савкшно вастневемс. Кой-конатне шкань ютазь стувтовить, ульнесть истяткак, конатнень марто вастовомась кадовсь пряудемезэнь эрямонь меельце читнес. Истятнэстэ вейкесь – МАССР-нь заслуженной писателесь Павел Кириллович Любаев.

Те ломанденть мон содылинь эштё школасо тонавтнемстэ. Пек вечкилинь сонзэ стихензэ. Ловнокшныя Советской Союзонь Героенть Александр Пожарскоень подвигтенть сонзэ расследованиянть. Саранскойсэ эрямсто пек вечкилинь якамо баняв, кона ульнесь ошонь Ленин лемсэ проспектсэнть. Истя лисекшнесь, теке жо чистэнть баняв яксиль Павел Кириллович Любаевгак. Парямсто а весть некшния, кода ёроковсто ахолясь килеень тенстьсэ. Весть кода-бути парямо таркантень кадовинек овсе аламонек, ды сон монень энялдсь тенстьсэ парямс кутьмерензэ, келя, эсень кедень а сатыть. Мон покш мельсэ топавтыя энялдоманзо. Банядо мейле Павел Кириллович тердимим чайде симеме банянь буфетэв. Ды вана мартонзо аштетяно вейке столь экшсэ. Мон видькстынь, што содаса сонзэ умок, ды ушодынь кевкстнемензэ эрямодонзо. Павел Кириллович васня чатьмонезь вансь лангозон, зярдо жо кармась содамо, мон радиожурналист, сестэ ушодсь отвечамо кевкстеман лангс. Самай те кортнемастонть карман ёвтнеме седе тов те ломанденть, конанень бу те иестэ топодевельть чачома чистэнзэ саезь 100 иеть.

Бути уш кортамось тусь юбилейденть, эряви ледстямс, П.К.Любаев чачсь 1919 иень декабрянь 24-це чистэ Нижегородской областень Покш Болдинань райононь Пикшень велесэ. 1936 иестэ прядокшнызе школасо тонавтнеманзо, мейле пурнась содамочить Саранскоень рабфаксо. Тонавтнемась прядозель, зярдо тензэ ульнесть кемгавксово иеть. Се шкане содамочитнес правтыцятнеде аволь пек ламольть, самай секскак П.К.Любаев лововсь образования марто ломанекс.

Рабфаконть прядомадо мейле Любаев роботась «Эрзянь правда» ды «Ленинэнь киява» газетатнень корреспондентэкс, переводчикекс, ответственной секретарекс. Те шкастонть стихензэ печатавсть республикань ды райононь газетатнесэ. Истя жо эрзянь кельс ютавтокшнынзе Тарас Шевченконь «Катерина» ды «Подземелье» поэматнестэ пелькстнэнь.

1940 иень июньстэ саезь П.К.Любаев служась армиясо. Ульнесь пулемётчикекс. Войнанть ушодовомсто саезь 1942 иень ноябряс Сталинградонь фронтсо особой отделэнь оперуполномоченноель. Воёвась 62-це армиянь составсо, конань командующеекс ульнесь А.И.Еременко. Сёрмадоманть солдатось зярдояк эзизе кадно. Гимнастёрканзо зепесэ свал ульнесь ручка ды блокнот, А.С.Пушкинэнь стихень сборник. Поэтической тетрадень страницатнесэ свал сёрмадыль ятонть а вечкемадо.

Демобилизациядо мейле Павел Любаев роботась «Эрзянь коммуна» газетасо. Сонзэ литературной эрямозо поладовсь. 1949 иестэ примазель СССР-нь Писателень союзс.

Зярыя шкань ютазь П.К.Любаевень тердизь роботамо правоохранительной органтнэс. Ульнесь оперуполномоченноекс Ковылкинань РОВД-сэ, МВД-нь кадрань отделэнь прявтонь полавтыцякс. Заочнасто прядокшнызе Самарань МВД-нь офицерской школанть, мейле Мордовиянь госуниверситетэнть.

Косо бу аволь робота Павел Кириллович, свал снартнесь сюпалгавтомс эсь содамочитнень. Газетасто туемадо мейле сон истя жо кадовкшнось поэтэкскак, писателекскак. Содавикс писательтнень ды поэттнэнь А.С.Пушкинэнь, Т.Г.Шевченконь, С.А.Есенинэнь юбилейтненень П.К.Любаев казезь зярыя медальсэ. Г.Р.Державин лемсэ Санкт-Петербургонь словесностень академиясь кочкизе сонзэ почётонь членэкс. Творчествасонзо покш тарка зани «Солнцеликая птица» повестесь, кона ёвтни Орданьбуе ошсо чачозеденть, Советской Союзонь Геройденть, комиссардонть И.А.Пожарскойде. Теде башка, Павел Кирилловичень лиссть колоньгемень поэтической сборникензэ.

Ине Отечественной войнань шкасто фронтсо воёвамонь, правопорядкань ванстомань органтнэсэ роботамонь кис П.К.Любаев казезь ламо медальсэ, Мордовской АССР-нь Верховной Советэнь Президиумонь ды СССР-нь МВД-нь Почётонь грамотасо. Эрясь Павел Кириллович Любаев 90 иеде ламо. Эсь эрямонь смустекс свал ловсь сень, кода бу улемс седе лезэвекс ломантненень.

А.Давыдов, Россиянь Журналистэнь союзонь член.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».