Аволь умок северная осетия – алания республикань владикавказ ошсо ютавтовсь «Тиринь келень ды тиринь литературань сехте вадря тонавтыця – 2023» весероссиянь пелькстамось. Сон аштесь зярыя пельксстэ. Пелькстамонь финалс понгсть масторонь келес сехте вадря тонавтыцятне.

Истя, «Тиринь келень ды тиринь литературань сехте вадря тонавтыця – 2023» Весероссиянь покш пелькстамонь изницякс кармась Владимир ёнксонь Гусь-Хрустальный ошсто рузонь келень тонавтыцясь Артём Гусев. 2-це таркасо – коми келень тонавтыцясь Елена Расова. Колмоцекс кармась башкирэнь келень тонавтыцясь Гузель Гайсина.

Теде башка, те покш конкурсонть лувсо Владикавказсо эсь содамочист невтизь эйкакшонь кужонь тонавтыцятне, конатне пелькстасть «Лучшие практики развития родной речи детей дошкольного возраста» номинациясонть. Сынь вейсэ лиятнень марто ютасть зярыя пелькст. Финалонь пелькстамотнес кочказельть вете сехте вадрятне, конатнень юткс понгсь Саранск ошонь 5-це № эйдень кужонь важодицясь, эрзянь авась Марина Николаевна Федорова.  Финалонь мастер-классонть сон невтизе, кода теемс «Эрзяночка» няканть-столбушканть туртов раськень оршамопельть.

Те мастер-классонть жюрись ваннось зярыя ёнксонь коряс: тонавтомань пельксэсь, информационной ды коммуникативной культурась, шкинемась. Тень мельсэ кирдезь, кочказельтькак изницятне. 

Истя, изницякс лиссь Татарстан Республикасто Айсылу Лотфуллина. Омбоце тарканть саизе Саранск ошонь 5-це № эйдень кужонь важодицясь Марина Федорова. Колмоце таркасо – Донецкой Народной Республикасто Елена Цыбина. Весе изницятненень ды призёртнэнень казнетнень максынзе  РФ-нь Просвещениянь министрась Сергей Кравцов.

Ёвтатано Марина Николаевнанень покш поздоровт ды од изнявкст! Тешкстасынек, сон чачсь-кассь эрзянь велесэ – Отяжелень райононь Сабанцелесэ. Уш кемготово иеть сон важоди воспитателекс ды тедеде лиссь изницякс «Этновоспитатель» республиканской пелькстамосонть.